ប្រទេសថៃ ៖ យោងតាមទិន្នន័យរបស់ក្រសួងពាណិជ្ជកម្ម ដែលបានចេញផ្សាយកាលពីថ្ងៃចន្ទឲ្យដឹងថា ការនាំចេញដោយមិនគិតពន្ធក្នុងខែតុលា បានធ្លាក់ចុះដោយនឹកស្មានមិនដល់បន្ទាប់ពីបានកើនឡើងក្នុងរយៈពេល២ខែកន្លងមក ។ ការនាំចេញបានធ្លាក់ចុះ៤,២% បើធៀបនឹងឆ្នាំមុន ។
មន្ត្រីមួយរូបក្នុងក្រសួងនិយាយថា ការនាំចេញធ្លាក់ចុះនេះ គឺមកពីការអន់ថយនៃពាណិជ្ជកម្មពិភពលោក, ការអន់ថយនៃការនាំចេញផលិតផលមាសនិងប្រេង ក៏ដូចជាការនាំចេញបានកើនឡើងខ្លាំងក្នុងឆ្នាំមុន ។ រីឯការនាំចូលបានកើនឡើងច្រើនជាងការគិតទុកផងដែរ គឺកើនឡើង៦,៥%បើធៀបនឹងឆ្នាំមុន ។
អ្នកសេដ្ឋកិច្ចគិតថា នឹងមានការកើនឡើង ៣,៦% បន្ទាប់ពីកើនឡើង៥,៦%ក្នុងខែកញ្ញា។ វានឹងបង្កើតជាផលលើសពាណិជ្ជកម្ម ដែលមានតម្លៃ២៥០លានដុល្លារអាមេរិកក្នុងខែតុលា ។ ផលិតផលជាច្រើនដែលប្រទេសថៃនាំចូល គឺត្រូវបានយកមកកែច្នៃជាផលិតផលសម្រេច និងនាំចេញម្តងទៀត ។
ការនាំចេញរបស់ថៃ ស្មើនឹង២ភាគ៣នៃ GDP របស់ប្រទេស និងបានធ្លាក់ចុះក្នុងរយៈពេល៣ឆ្នាំកន្លងមក ។ វាធ្វើឲ្យរដ្ឋាភិបាលថៃខកចិត្ត ខណៈបានប្រឹងប្រែងលើកស្ទួយសេដ្ឋកិច្ចជាតិសាជាថ្មី ។
កាលពីសប្តាហ៍មុន ភ្នាក់ងារគម្រោងរដ្ឋបានព្យាករណ៍ថា ការនាំចេញនឹងគ្មានការផ្លាស់ប្តូរឡើយក្នុងឆ្នាំនេះ មិនដូចការព្យាករថា នឹងធ្លាក់ចុះ១,៩%ឡើយ ។ ពួកគេព្យាករណ៍ថា សេដ្ឋកិច្ចនឹងកើនឡើង៣,២%ក្នុងឆ្នាំនេះ ច្រើនជាងឆ្នាំមុន ដែលស្មើតែ២,៨%ប៉ុណ្ណោះ ៕
ចែករំលែកព័តមាននេះ