រាជធានីភ្នំពេញ ៖ រាជរដ្ឋាភិបាលបានចាត់ទុកការតភ្ជាប់វិនិយោគបរទេសដោយផ្ទាល់ជាមួយក្រុមហ៊ុនក្នុងស្រុក ជាកត្ដាសំខាន់សម្រាប់អភិវឌ្ឍឧស្សាហកម្មនៅកម្ពុជា ។ នេះបើតាមការលើកឡើងរបស់មន្ត្រីជាន់ខ្ពស់នៃក្រសួង
រាជធានីភ្នំពេញ ៖ រាជរដ្ឋាភិបាលបានចាត់ទុកការតភ្ជាប់វិនិយោគបរទេសដោយផ្ទាល់ជាមួយក្រុមហ៊ុនក្នុងស្រុក ជាកត្ដាសំខាន់សម្រាប់អភិវឌ្ឍឧស្សាហកម្មនៅកម្ពុជា ។ នេះបើតាមការលើកឡើងរបស់មន្ត្រីជាន់ខ្ពស់នៃក្រសួងពាណិជ្ជកម្ម ដែលបានថ្លែងក្នុងកិច្ចប្រជុំពិភាក្សាក្រៅផ្លូវការមួយរវាងវិស័យសាធារណៈ និងឯកជន ស្ដីពី «ការវិនិយោគបរទេសដោយផ្ទាល់ និងទំនាក់ទំនងជាមួយឧស្សាហកម្មក្នុងស្រុក» កាលពីព្រឹកថ្ងៃទី២៩ វិច្ឆិកា ម្សិលមិញ ។
កិច្ចប្រជុំពិភាក្សានេះ ធ្វើឡើងដើម្បីស្វែងរកដំណោះស្រាយបញ្ហាប្រឈមដែលក្រុមហ៊ុនប្រកបធុរកិច្ចនៅកម្ពុជាជួបប្រទះ និងបានផ្ដល់ពេលឲ្យក្រុមហ៊ុនទាំងអស់លើកឡើងពីបញ្ហាប្រឈម និងដំណោះស្រាយសម្រាប់រាយការណ៍ជូនតំណាងរាជរដ្ឋាភិបាល ស្វែងរកកិច្ចអន្តរាគមន៍នានា ។
បញ្ហាភាគច្រើនដែលបានលើកឡើងក្នុងកិច្ចប្រជុំ គឺទាក់ទងនឹងការផ្គត់ផ្គង់ រួមមាន កង្វះខាតអ្នកផ្គត់ផ្គង់ក្នុងស្រុកសម្រាប់ផ្គត់ផ្គង់វត្ថុធាតុដើម ដែលជាធាតុផ្សំចាំបាច់ក្នុងការផលិត។ អ្នកផ្គត់ផ្គង់ភាគច្រើនមានភាពខ្វះខាតដូចជា ធនធានមនុស្ស ទំហំនៃការផ្គត់ផ្គង់ បច្ចេកវិទ្យា ចំណេះដឹង ឬមិនអាចទុកចិត្តបាន ។ បញ្ហាផ្សេងទៀតរួមមាន កង្វះខាតហេដ្ឋារចនាសម្ព័ន្ធ ជាពិសេស អគ្គិសនីដែលមានតម្លៃថ្លៃជាងប្រទេសជិតខាង ក៏ដូចជាគោលនយោបាយ និងនីតិវិធីមួយចំនួនមិនទាន់ច្បាស់នៅឡើយ ដែលបង្កើតជាបញ្ហាដល់ក្រុមហ៊ុន ទាំងហិរញ្ញវត្ថុ និងធនធានមនុស្ស ។
ចំពោះបញ្ហាប្រឈមទាំងឡាយ ក្រុមហ៊ុនទាំងនោះក៏បានផ្ដល់នូវដំណោះស្រាយមួយចំនួនផងដែរ ។ ក្រុមហ៊ុនខ្លះចាត់ទុកការប្រើប្រាស់វត្ថុធាតុដើម ឬធនធានក្នុងស្រុក គឺសំខាន់ក្នុងប្រតិបត្តិការរបស់គេ ។ ដូចនេះ ក្រុមហ៊ុនបរទេសអាចទាក់ទាញយកដៃគូផ្គត់ផ្គង់របស់គេមកវិនិយោគព្រមគ្នា ហើយដៃគូផ្គត់ផ្គង់នោះអាចចាប់ដៃគូជាមួយក្រុមហ៊ុនក្នុងស្រុកដើម្បីសម្រួលដល់ការផ្ទេរចំណេះដឹង និងបច្ចេកវិទ្យា ដែលជាគន្លឹះសំខាន់ក្នុងការអភិវឌ្ឍវិស័យឧស្សាហកម្មក្នុងស្រុក និងអនុញ្ញាតឲ្យក្រុមហ៊ុនក្នុងស្រុកមានឱកាសពង្រីកខ្លួនក្លាយជាអ្នកផ្គត់ផ្គង់ពេញលេញ ។
ក្រុមហ៊ុនបរទេសក៏អាចជួយអភិវឌ្ឍអ្នកផ្គត់ផ្គង់ក្នុងរូបភាពមួយផ្សេងទៀត ដោយជួយផ្ទាល់ដល់ក្រុមហ៊ុនក្នុងស្រុកឲ្យក្លាយជាដៃគូមួយសំខាន់ក្នុងខ្សែសង្វាក់ផ្គត់ផ្គង់ ។ ចំពោះបញ្ហាថ្លៃអគ្គិសនី ក្រុមហ៊ុនក៏កំពុងតែពិចារណាលើការប្រើប្រាស់ប្រភពអគ្គិសនីថ្មីៗ ប៉ុន្តែអាស្រ័យលើគោលនយោបាយរបស់រាជរដ្ឋាភិបាល ។ ក្រៅពីនេះ ក្រុមហ៊ុនទាំងអស់ស្នើសុំឲ្យរាជរដ្ឋាភិបាលពិនិត្យឡើងវិញនូវគោលនយោបាយ និងនីតិវីធីមួយចំនួនដើម្បីឲ្យមានភាពងាយស្រួល និងច្បាស់លាស់សម្រាប់ក្រុមហ៊ុនទាំងអស់ប្រតិបត្តិ។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម ក៏ដូចជាតំណាងដទៃទៀតរបស់រាជរដ្ឋាភិបាលបានឯកភាពថា បញ្ហាប្រឈមដែលលើកឡើង គឺសុទ្ធតែចាំបាច់ដែលត្រូវដោះស្រាយ ។ រាជរដ្ឋាភិបាលយល់ឃើញថា ការបណ្ដុះបណ្ដាលបច្ចេកទេស និងវិជ្ជាជីវៈ ជាជំហានបន្ទាប់ដើម្បីប្រែក្លាយពលកម្មកម្ពុជា ទៅជាពលកម្មដែលមានបច្ចេកទេស និងចំណេះដឹងគ្រប់គ្រាន់សម្រាប់ជួយទ្រទ្រង់ដល់ការលូតលាស់នៃវិស័យឧស្សាហកម្ម ។
ចំពោះបច្ចេកវិទ្យាវិញ គឺចាំបាច់បំផុត ប្រសិនបើកម្ពុជាចង់ពង្រឹងភាពប្រកួតប្រជែងជាមួយប្រទេសដទៃទៀត ដែលឧស្សាហកម្មរបស់គេមានការអភិវឌ្ឍ និងបច្ចេកវិទ្យាខ្ពស់ ។ រាជរដ្ឋាភិបាលអបអរចំពោះក្រុមហ៊ុនទាំងអស់ដែលមានគំនិតផ្ដួចផ្ដើមជួយអភិវឌ្ឍក្រុមហ៊ុនក្នុងស្រុកដើម្បីកាត់បន្ថយគម្លាតជំនាញ និងចំណេះដឹង ។
ទន្ទឹមនឹងនេះ រាជរដ្ឋាភិបាលក៏អាចជួយសម្របសម្រួលឲ្យក្រុមហ៊ុនបរទេសជួបជាមួយក្រុមហ៊ុនក្នុងស្រុក ដើម្បីពិភាក្សាពីការប្រកបធុរកិច្ច និងទាក់ទាញអ្នកផ្គត់ផ្គង់បរទេសមកដាក់ទុនវិនិយោគនៅកម្ពុជាផងដែរ ។ ចំពោះបញ្ហាទាក់ទងនឹងហេដ្ឋារចនាសម្ព័ន្ធ តម្លៃអគ្គិសនី សម្រួលគោលនយោបាយ និងនីតិវិធីនោះ រាជរដ្ឋាភិបាលបានរៀបចំដំណោះស្រាយមួយចំនួនហើយ ដោយបញ្ហានេះមិនត្រឹមតែប៉ះពាល់ដល់វិនិយោគិនក្រៅស្រុកប៉ុណ្ណោះទេ ប៉ុន្តែក៏ប៉ះពាល់ដល់អ្នកប្រកបអាជីវកម្មទាំងមូលផងដែរ ។
លោករដ្ឋមន្ត្រីបានលើកទឹកចិត្តឲ្យវិនិយោគិនទាំងអស់ធ្វើការយ៉ាងស្អិតរមួតជាមួយក្រសួងពាណិជ្ជកម្ម ដែលតែងត្រៀមជានិច្ចដើម្បីជួយដោះស្រាយបញ្ហាតាមដែលអាចធ្វើទៅបាន ដើម្បីគាំទ្រដល់ការរីកដុះដាលនៃឧស្សាហកម្មកម្ពុជា ៕
ចែករំលែកព័តមាននេះ