រាជធានីភ្នំពេញ ៖ បញ្ហាតម្លៃស្រូវធ្លាក់ចុះ នៅតែជាកង្វល់របស់ប្រជាកសិករ និងរាជរដ្ឋាភិបាលកម្ពុជាទាំងមូល ព្រោះប្រជាកសិករមួយចំនួនធំបានប្រើប្រាស់កម្ចីឥណទានរបស់គ្រឹះស្ថានមីក្រូហិរញ្ញវត្ថុ សម្រាប់ទិញជី និងជួលគ្រឿងចក្រធ្វើស្រែបង្កបង្កើនផលស្រូវ។ ប៉ុន្តែនៅពេលតម្លៃស្រូវធ្លាក់ចុះនោះ វាបានធ្វើឲ្យមានបញ្ហាក្នុងការសងប្រាក់កម្ចីត្រឡប់ទៅធនាគារ ឬមីក្រូហិរញ្ញវត្ថុវិញ ។ ទាក់ទងនឹងបញ្ហាតម្លៃស្រូវនេះ រាជរដ្ឋាភិបាលបានប្រឹងប្រែងដោះស្រាយជាបន្តបន្ទាប់ ។ ជាក់ស្ដែង រាជរដ្ឋាភិបាលបានបញ្ចេញថវិកាសម្រាប់ប្រមូលទិញស្រូវស្តុកទុកនៅធនាគារស្រូវជាដើម ប៉ុន្តែនៅតែមិនអាចដោះស្រាយបានទូលំទូលាយឡើយ ។
ថ្មីៗនេះ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវដល់មីក្រូហិរញ្ញវត្ថុ និងស្ថាប័នហិរញ្ញវត្ថុផ្សេងៗដែលបានផ្ដល់ប្រាក់កម្ចីដល់ប្រជាកសិករ សូមមេត្តាយោគយល់ដល់ទុក្ខលំបាករបស់ពួកគាត់ ខណៈតម្លៃស្រូវធ្លាក់ចុះ ។ សម្ដេចមានប្រសាសន៍ថា ៖ « តម្លៃស្រូវចុះនេះ វាមិនមែនចុះតែនៅក្នុងប្រទេសកម្ពុជាទេ គឺស្ទើរតែគ្រប់ប្រទេសទាំងអស់ ហើយវាមិនមែនតែស្រូវមួយមុខទេ គឺកសិផលផ្សេងៗ រាប់ទាំងជ័រកៅស៊ូជាដើម » ។
សម្ដេចតេជោបន្តថា ឆ្នាំនេះ បើតាមការប៉ាន់ស្មានទុកជាមុន កម្ពុជាអាចនឹងសល់ស្រូវប្រមាណ៥លានតោនក្រោយពីកាត់ទុកហូប និងទុកពូជរួចរាល់ហើយ ។ សម្ដេចមានប្រសាសន៍ថា ៖ « បរិមាណនៅសល់ស្រូវជុំវិញ៥លានតោននេះ យើងអាចនាំចេញទៅទីផ្សារដែលមានស្រាប់ ក្នុងនោះចិនប្រមាណ២០ម៉ឺនតោន, វៀតណាមប្រមាណ៣០ម៉ឺនតោន និងអឺរ៉ុបមួយចំនួនទៀត ។
ប៉ុន្តែការនាំចេញនៅតែមានបញ្ហា ព្រោះតំបន់ទាំងនោះមានតម្លៃទាបនៅឡើយ អីចឹងទេមានតែអំពាវនាវដល់ប្រជាពលរដ្ឋរបស់យើងយោគយល់ចំពោះការលំបាករួមរបស់ប្រទេសជាតិ ដែលតម្លៃកសិផល និងស្រូវនៅលើទីផ្សារមានតម្លៃទាប ហើយចំពោះការទិញស្រូវរបស់បរទេសដូចជាចិនជាដើម មិនមែនមានន័យថា ចិនខ្វះអង្ករទេ តែការទិញអង្កររបស់ចិន គឺដើម្បីជួយសម្រួលដល់ប្រទេសយើងកុំឲ្យសល់ស្រូវច្រើនពេក » ។
សម្ដេចបញ្ជាក់ផងដែរថា ស្របពេលដែលកម្ពុជាមានទីផ្សារអង្ករនៅក្រៅប្រទេសហើយនោះ ឈ្មួញនាំចេញក៏ត្រូវធ្វើយ៉ាងណាបង្កើនគុណភាពកុំឲ្យខូចពូជ មានន័យថា កុំឲ្យអង្ករលាយពីរបីពូជ ហើយបើធ្វើបែបនេះ វានឹងធ្វើឲ្យខូចពូជខ្មែរ ឬលក់ផ្លូវខ្លួនឯងដែរ ។ សម្ដេចបញ្ជាក់ថា ៖ « រាជរដ្ឋាភិបាលខិតខំណាស់ ដើម្បីរកទីផ្សារជូនប្រជាកសិករ តែបញ្ហានេះវាមិនងាយទេ ព្រោះថាប្រទេសផ្សេងៗក៏គេផលិតស្រូវ ឬកសិផលផ្សេងៗដែរ ហើយតម្លៃរបស់គេអាចនឹងទាបជាងយើងផង » ។
គួរបញ្ជាក់ថា បើតាមរបាយការណ៍ពីមីក្រូហិរញ្ញវត្ថុនានានៅក្នុងប្រទេសកម្ពុជា អតិថិជនដែលប្រើប្រាស់កម្ចីឥណទានភាគច្រើន គឺជាកសិករ និងសហគ្រិនខ្នាតតូច ។ ដូចនេះ អាចបញ្ជាក់បានថា ប្រជាកសិករកម្ពុជាភាគច្រើនប្រើប្រាស់កម្ចីឥណទានសម្រាប់ពង្រីកអាជីវកម្ម និងសងត្រឡប់វិញក្នុងរយៈពេលមួយឆ្នាំ ។
តាមរបាយការណ៍របស់ធនាគារជាតិនៃកម្ពុជា គិតរហូតមកដល់ពេលនេះ ប្រជាពលរដ្ឋកម្ពុជាប្រមាណជាង២លាននាក់កំពុងប្រើប្រាស់ឥណទានក្នុងវិស័យមីក្រូហិរញ្ញវត្ថុ ៕
ចែករំលែកព័តមាននេះ