រាជធានីភ្នំពេញ ៖ បន្ទាប់ពីសារព័ត៌មានកោះសន្តិភាពចេញផ្សាយអត្ថបទចំណងជើង «កម្មករដែលចរន្តអគ្គីសនីឆក់ត្រូវគ្រូពេទ្យកាត់ដៃទាំងពីរ» តើរស់បែបណា បើដៃទាំងពីរកាត់អស់ទៅហើយ ព្រហ្មលិខិតពិតជាឥតមេត្តា កាលពីថ្ងៃទី២ កញ្ញា កន្លងមកនេះ ត្រូវបានលោកជំទាវហ៊ុន ម៉ាណា អគ្គនាយិកានៃអគ្គនាយកវិទ្យុ និងទូរទស្សន៍បាយ័ន មានក្តីអាណិតអាសូរពន់ពេក បានបរិច្ចាគធនធានផ្ទាល់ខ្លួន ជូនដល់កម្មកររងគ្រោះឈ្មោះញឹម គឹមសៀង ដែលកំពុងសំរាកព្យាបាលនៅមន្ទីរពេទ្យកាល់ម៉ែត កាលពីរសៀលថ្ងៃទី២ កញ្ញា ២០១០ ។
លោកហួត ឃាងថេង អគ្គនាយករងស្ថានីយវិទ្យុ និងទូរទស្សន៍បាយ័នបានមានប្រសាសន៍ថា លោកជំទាវអគ្គនាយិកានៃអគ្គនាយកវិទ្យុ និងទូរទស្សន៍បាយ័ន បានឧបត្ថម្ភដល់យុវជនរងគ្រោះ ដែលចរន្តអគ្គិសនីឆក់ត្រូវគ្រូពេទ្យកាត់ដៃទាំងពីរចំនួន១.០០០ដុល្លារសហរដ្ឋអាមេរិក នេះជាការជួយរំលែកទុក្ខសោក និងការលំបាក ហើយកន្លងមក លោកជំទាវតែងតែជួយឧបត្ថម្ភ ដល់ជនក្រីក្រមិនរើសពណ៌សម្បុរ ឬគណបក្សនយោបានណាមួយនោះទេ ។
លោកញ៉ាន ញឹម ដែលត្រូវជាឪពុកបង្កើតរបស់កម្មកររងគ្រោះញឹម គឹមស្រៀង បានថ្លែងទាំងអួលដើម.កឱ្យកោះសន្តិភាពដឹងថា ទឹកប្រាក់ចំនួន១.០០០ដុល្លារអាមេរិក ដែលលោកជំទាវហ៊ុន ម៉ាណា អគ្គនាយិកានៃអគ្គនាយកវិទ្យុ និងទូរទស្សន៍បាយ័ន ដែលបានផ្តល់មកឱ្យកូនរបស់លោកនេះ ពិតជាមិនអាចកាត់ថ្លៃបានឡើយ ហើយទឹកប្រាក់ដ៏ថ្លៃថ្លានេះមួយជីវិតរបស់លោក និងក្រុមគ្រួសាររបស់លោកគ្មានសង្ឃឹមនឹងបានស្គាល់វានោះទេ ។
លោក និងក្រុមគ្រួសារលើកដៃប្រណម្យបួងសួងដល់ទេវតាអារុក្ខអារក្សអ្នកតា ទាំងឡាយតាមថែរក្សាលោកជំទាវហ៊ុន ម៉ាណា ព្រមទាំងស្វាមី ឱ្យជួបតែសេចក្តីសុខគ្រប់ប្រការ ។ ជាមួយគ្នានេះ លោកក៏មិនភ្លេចគុណសារព័ត៌មានកោះសន្តិភាព ដែលខិតខំអំពាវនាវ ដល់សប្បុរសជនជួយដល់កម្មកររងគ្រោះញឹម គឹមស្រៀង ហើយសូមអរគុណផងដែរ ដល់នាយកមន្ទីរពេទ្យកាល់ម៉ែត និងគ្រូពេទ្យដែលបានយកចិត្តទុកដាក់ជួយវះកាត់ និងព្យាបាលដល់កូនរបស់លោកឱ្យរួចផុតពីសេចក្តីស្លាប់ បើទោះបីជាអស់ដៃទាំងពីរក៏ដោយ ៕
ចែករំលែកព័តមាននេះ