ខេត្តបាត់ដំបង ៖ មុខសញ្ញាដែលជិះកង់ដើរលួចកាត់ខ្សែភ្លើងពេលរាត្រីស្ទើររាល់យប់យ៉ាងកក្រើកក្រុងបាត់ដំបង ពេលនេះ ត្រូវសមត្ថកិច្ចតាមចាប់ខ្លួនបានចំនួន០២នាក់ជាបន្តបន្ទាប់ នៅវេលាទៀបភ្លឺ និងព្រឹកព្រលឹមថ្ងៃទី២៤ មិថុនា នៅប៉ុន្មានម៉ោងក្រោយពីជនទាំង០២នាក់ បានធ្វើសកម្មភាពលួចកាត់ខ្សែភ្លើងជាថ្មីទៀត ក្នុងក្រុងបាត់ដំបង នាវេលាទៀបភ្លឺ មុនពេលត្រូវចាប់ខ្លួន។
ប្រភពពីសមត្ថកិច្ចបានឲ្យដឹងថា បិសាចរាត្រីទាំង០២នាក់នេះ ម្នាក់ឈ្មោះ លី ផេង អាយុ៤៥ឆ្នាំ នៅភូមិកា.ប់គោថ្មី សង្កាត់អូរចា និងម្នាក់ទៀតឈ្មោះ យ៉ា សាវ៉ុង ហៅចាប អាយុ៤០ឆ្នាំ នៅភូមិអូរចា សង្កាត់អូរចា ក្រុងបាត់ដំបង ។ ជើងខ្លាំងលួចកាត់ខ្សែភ្លើងទាំង០២នាក់នេះ ត្រូវបានកម្លាំង
ជំនាញនៃអធិការក្រុងបាត់ដំបង ធ្វើរស្រាវជ្រាវតាមចាប់ខ្លួនបានជាបន្តបន្ទាប់ នៅវេលាទៀបភ្លឺ ថ្ងៃទី២៤ មិថុនា រួមទាំងដកហូតវត្ថុតាងបានមួយចំនួនផង។
បើតាមសមត្ថកិច្ចបានប្រាប់ថា កម្លាំងជំនាញតាមក្របួចបិសាចរាត្រីនេះបាន នៅប៉ុន្មានម៉ោងក្រោយពីពួកគេធ្វើសកម្មភាពលួចកាត់ខ្សែភ្លើងអ្នកភូមិជាថ្មីទៀត។ សូមបញ្ជាក់ថា អំពើចោរកម្មលួចកាត់ខ្សែភ្លើងពេលយប់ ដែលបង្កឡើងដោយជនមិនស្គាល់មុខ បានអង្រូនយ៉ាងកក្រើកនៅប៉ុន្មានខែចុងក្រោយនេះ ស្ទើរពាស់ពេញទីក្រុងបាត់ដំបង ធ្វើឲ្យប្រជាពលរដ្ឋក្ដៅក្រហាយយ៉ាងខ្លាំងទៅនឹងបទល្មើសកំប៉ិកកំប៉ុកនេះ រហូតពលរដ្ឋដែលរងគ្រោះមួយចំនួន បានរិះគន់សមត្ថកិច្ចគ្មានសំចៃមាត់ ដោយសារតែសមត្ថកិច្ច មិនអើពើ មិនខ្វល់ខ្វាយ និងមិនទទូលបណ្ដឹង នៅពេលប្រជាពលរដ្ឋរាយការណ៏ ឬ ប្ដឹងសុំជំនួយអន្តរាគមន៏ភ្លាមៗ។
ប៉ុន្តែយ៉ាងណាក៏ដោយ ក្រោយពីមានការរិះគន់ខ្លាំងៗ ទៅលើភាពអសកម្មរបស់សមត្ថកិច្ច តាមរយះប្រព័ន្ធផ្សព្វផ្សាយ និងតាមបណ្ដាញសង្គមយ៉ាងចាស់ដៃ នាប៉ុន្មានថ្ងៃកន្លងទៅនេះ កម្លាំងជំនាញ នៃអធិការក្រុងបាត់ដំបង បានស្ទុះស្ទារនាំគ្នាចេញល្បាតតាមឃ្លាំមើលសកម្មភាពក្រុមបិសាចរាត្រីខាងលើនេះ រហូតឈានដល់ការចាប់ខ្លួនបានចំនួន០២នាក់ រួមទាំងដកហូតបានវត្ថុតាងខ្សែភ្លើងមួយចំនួនផង។ ពេលនេះមន្ត្រីជំនាញ បាននិងកំពុងសួរនាំ ដើម្បីចាត់ការតាមនីតិវិធីច្បាប់ហើយ៕
ចែករំលែកព័តមាននេះ