រាជធានីភ្នំពេញ ៖ រយៈពេលប្រមាណ៣ខែមកហើយ ដែលលោកគន្ធ ជីវ័ន្ត អ្នកអត្ថាធិប្បាយកីឡាប្រដាល់ប្រចាំស្ថានីយទូរទស្សន៍អាស៊ីអាគ្នេយ៍ និងជាអ្នកវិភាគកីឡាប្រចាំស្ថានីយទូរទស្សន៍បាយ័ន បានបាត់មុខពីកញ្ចក់ទូរទស្សន៍ ។ មានការបញ្ជាក់ថា លោកនឹងត្រូវបាត់មុខយ៉ាងហោច៣ខែបន្តទៀត ដោយសារតែជាប់រវល់ការងារនៅក្រៅប្រទេស ។
លោក គន្ធ ជីវ័ន្ត មិនទាន់អាចសុំការបញ្ជាក់បានទេ ប៉ុន្តែយោងតាមលោកញាណ សុធី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍ បានអះអាងថា ពិធីករប្រដាល់រូបនេះ បានដាក់ពាក្យសុំច្បាប់ពីកម្មវិធីប្រដាល់របស់លោករយៈពេល៦ខែ ដែលមកទល់នឹងដំណាច់ខែធ្នូ ឆ្នាំ២០១៦នេះ គឺមានរយៈពេល៣ខែហើយ ។ លោកថា លោក គន្ធ ជីវ័ន្ត បានដាក់ក្នុងច្បាប់ថា ជាប់រវល់ទៅបំពេញការងារនៅក្នុងប្រទេសចិន ប៉ុន្តែត្រង់ថាការងារនោះពាក់ព័ន្ធកិច្ចការអ្វីលោកមិនបានដឹងច្បាស់នោះទេ ។ លោក គន្ធ ជីវ័ន្ត មិនទាន់ច្បាស់ថា នឹងអាចវិលត្រឡប់មកកាន់ក្បាលមេក្រូអត្ថាធិប្បាយព្រឹត្តិការណ៍កីឡានៅក្នុងសង្វៀនទូរទស្សន៍អាស៊ីអាគ្នេយ៍ដូចដើមនោះទេ ក្នុងពេលដែលការសុំច្បាប់របស់លោកមានរយៈពេលដល់កន្លះឆ្នាំ ដែលលោកយល់ថា បើដាក់អ្នកថ្មីហើយប្រគល់តំណែងឱ្យលោកក្រោយពេលត្រឡប់មកវិញ ក៏ជារឿងប៉ះពាល់ផងដែរ ។
លោកថា មកទល់ពេលនេះពិធីករដែលត្រូវបានជ្រើសរើសឱ្យមកអត្ថាធិប្បាយប្រដាល់ជំនួសលោក គន្ធ ជីវ័ន្ត កាន់តែថ្នឹកនឹងការងារល្អ អ៊ីចឹងលោកក៏នឹងធ្វើការពិចារណាផងដែរក្នុងពេលដែលពិធីករកីឡារូបនេះ ចំណាយពេលសុំឈប់យូរពេក ដែលលោកមិនចង់ឱ្យអ្នកជំនួសមានអារម្មណ៍អន់ចិត្ត។ លោកនិយាយថា៖ «ជីវ័ន្តគាត់សុំច្បាប់៦ខែ ហើយខ្ញុំគិតថា នេះជាការសុំក្នុងរយៈពេលយូរដែលប៉ះពាល់ដល់ការងាររបស់ខ្ញុំដែរ ប្រសិនបើគេចង់ភ្លេចមុខគាត់ហើយស្រាប់តែមកដកអ្នកថ្មី ហើយដាក់គាត់វិញក្រោយពេលគាត់ត្រឡប់មក!» ។ រយៈពេល៦ខែ អាចធ្វើឱ្យអ្នកស្នេហាវិស័យប្រដាល់ជាប់ចិត្តនឹងអ្នកមកជំនួសក្នុងរយៈពេលបាត់មុខនោះដែរ ទើបលោកប្រកាសថា តំណែងរបស់លោក គន្ធ ជីវ័ន្ត សម្រាប់ការអត្ថាធិប្បាយប្រដាល់នៅទូរទស្សន៍អាស៊ីអាគ្នេយ៍ អាចនឹងមានភាគរយតិចសម្រាប់ការត្រឡប់មកវិញ ។ ទោះបីយ៉ាងណា លោកថា ថ្វីមាត់របស់ពិធីកររូបនេះ ក៏នឹងធ្វើឱ្យលោកពិចារណាសម្រាប់ការដោះដូរផងដែរ ដោយសារតែលោកក្រៅពីអាចកំប្លុកកំប្លែងក្នុងពេលប្រដាល់ដំណើរការបានល្អ ក៏អាចអត្ថាធិប្បាយជាភាសាបរទេស និងអាចប្រកាសណែនាំកីឡាករជាតិ និងអន្តរជាតិនៅលើរេញក្នុងព្រឹត្តិការណ៍ប្រដាល់អន្តរជាតិធំៗ បានរស់រវើកពិបាករកអ្នកជំនួសដែរ ។ លោកថា លោក គន្ធ ជីវ័ន្ត ស្ថិតនៅប្រទេសចិននៅឡើយ ហើយក៏មិនទាន់ច្បាស់ថា ពិធីករកីឡារូបនេះនឹងសុំខ្លួនត្រឡប់មកវិញឬក៏អត់ផង ទើបលោកបញ្ជាក់ថា លុះត្រាតែលោកត្រឡប់មកសុំកៅអីរបស់ខ្លួនជាមុនសិន ទើបអាចដឹងថា តើត្រូវដោះដូរ ឬអាចមិនទទួលយកសំណើនោះ ។
មុនពេលបាត់មុខ លោក គន្ធ ជីវ័ន្ត គឺជាអ្នកអត្ថាធិប្បាយប្រដាល់នៅក្នុងព្រឹត្តិការណ៍ប្រដាល់អន្តរជាតិរៀងរាល់ចុងសប្ដាហ៍របស់ទូរទស្សន៍អាស៊ីអាគ្នេយ៍ ។ ថ្វីដ្បិតតែសង្វៀននេះមានការដោះដូរអ្នកអត្ថាធិប្បាយច្រើននាក់ ប៉ុន្តែគេនៅតែកត់សម្គាល់ថា ពិធីកររូបនេះលេចមុខជាងគេ ដោយសារតែលោកអត្ថាធិប្បាយកីឡាដៃគូជាមួយលោកហេរ៉ូ មានភាពស៊ីសង្វាក់ និងប្រឡាក់ក្រឡាគ្នាដោយភាពកំប្លុកកំប្លែង ទៀតផង ។ លោកក៏ត្រូវមហាជនកោតសរសើរថា ជាអ្នកវិភាគកីឡាដែលមានប្រជាប្រិយភាព និងដឹងច្បាស់ពីទម្រង់ប្រកួត និងប្រវត្តិរបស់កីឡាករច្បាស់លាស់ផងដែរ ទើបធ្វើឱ្យការបាត់មុខរបស់លោកមានការចាប់អារម្មណ៍ ។ ជាពិសេសបន្ទាប់ពីមានការបន្លុយថា លោកអាចនឹងមិនត្រូវបានធានាការត្រឡប់ចូលទូរទស្សន៍អាស៊ីអាគ្នេយ៍វិញ ក្រោយបញ្ចប់បេសកកម្មនៅប្រទេសចិន ។ លោក គន្ធ ជីវ័ន្ត ត្រូវគេប្រកាសថា សម្ងំកើបលុយក្រៅស្រុកមិនធម្មតា ទើបលោកសម្រេចចិត្តទម្លាក់ចោលការងារក្នុងស្រុករហូតដល់កន្លះឆ្នាំ ខណៈដែលលោកក៏ហាក់មិនខ្វល់រឿងត្រឡប់មកវិញនឹងបានតំណែងចាស់ ឬតំណែងថ្មីនោះដែរ ។ មុនពេលបាត់មុខ លោកបានប្រកាសថា លោកនឹងទៅក្រៅប្រទេសមួយខ្យល់ធំ ហើយសង្ឃឹមថា នឹងបានលុយច្រើនៗត្រឡប់មកវិញ ដើម្បីឱ្យប្រពន្ធ និងកូនរបស់លោកសប្បាយចិត្ត ។ លោកថា ការងារក្នុងស្រុកក៏លុយច្រើនដែរ ប៉ុន្តែមកពីលោកចង់មើលពិភពខាងក្រៅផង និងចង់ដើរកម្សាន្តផង ទើបលោកសម្រេចចិត្តបាត់មុខ។ លោកថា ធ្វើការក្រៅស្រុក បើទោះជាអាចប្រឈមនឹងបាត់មុខពីការងារចាស់ជារៀងរហូត ប៉ុន្តែអ្វីដែលលោកទទួលបានគឺក្រេឌីតការងារ និងបទពិសោធន៍ ទើបលោកយល់ថា ប្រសិនបើខ្លួនត្រឡប់មកវិញហើយបែរជាមិនអាចមកអង្គុយកន្លែងចាស់បាន គឺមានតែបន្តស្វែងរកទ្រនំថ្មីក្នុងពេលបន្តបន្ទាប់ ។ យ៉ាងណាមិញ គេកត់សម្គាល់ថា លោកគន្ធ ជីវ័ន្ត ធ្លាប់បាត់មុខប្រមាណជាមួយរយៈធំផងដែរ បន្ទាប់ពីលោកចាកចេញពីទូរទស្សន៍CTN ហើយនៅតាមស្ថាប័នទូរទស្សន៍ផ្សេងទៀតដែលមានព្រឹត្តិការណ៍កីឡា ក៏មានពិធីកររបស់គេប្រចាំការល្អៗមិនខុសគ្នានឹងលោកដែរ ។ លោកញាណ សុធី បញ្ជាក់ថា ស្ថានភាពក្រោយត្រឡប់មកវិញរបស់ពិធីករកីឡារូបនេះ លុះត្រាតែចាំអ៊ុតសិនទើបដឹង ៕
ចែករំលែកព័តមាននេះ