ប្រទេសឥណ្ឌា ៖ ប្រជាជនក្នុងក្រុងដេលីប្រមាណ២០លាននាក់ប្រហែលជាមិនអាចអបអរបុណ្យជាតិរបស់ខ្លួន ដោយប្រើប្រាស់ផាវបានឡើយនៅឆ្នាំក្រោយ ។ តុលាការកំពូលរបស់ប្រទេសឥណ្ឌាបានសម្រេចថា ការលក់កាំជ្រួចនៅក្នុងទីក្រុងនេះគឺខុសច្បាប់ ដោយទីក្រុងនេះស្ថិតនៅក្នុងចំណោមទីក្រុងដែលមានបរិស្ថានកខ្វក់ជាងគេលើពិភពលោក ។
លោក Gopal Sankaranarayanan មេធាវីម្នាក់ក្នុងចំណោមមេធាវីទាំង៣រូប និយាយថា ៖ «វាគឺជាវិធីសាស្ត្រដ៏ល្អមួយ » ។
ផាវរាប់លានត្រូវបានផ្ទុះឡើងក្នុងទីក្រុងដេលីជារៀងរាល់ឆ្នាំ ដើម្បីអបអរបុណ្យសាសនា ព្រាហ្មណ៍ ជាពិសេស បុណ្យ Diwali ។ នៅឆ្នាំនេះ បរិស្ថានកខ្វក់ក្នុងរដ្ឋធានីបានកើនឡើងយ៉ាងខ្លាំងក្នុងអំឡុងប៉ុន្មានថ្ងៃបន្ទាប់ពីពិធីបុណ្យនោះ ។ ផ្សែងដ៏ខ្មួរខ្មាញ់បានធ្វើឲ្យប្រជាជនពិបាកក្នុងការមើល ហើយរដ្ឋាភិបាលក៏បានបិទសាលារៀនក្នុងក្រុងដេលី អស់ប៉ុន្មានថ្ងៃថែមទៀតផង ។
លោក Sankaranarayanan និយាយថា តុលាការក៏បានបញ្ជាដល់ក្រុមប្រឹក្សាគ្រប់គ្រងបរិស្ថានកខ្វក់កណ្តាល ដែលជាភា្នក់ងារមួយរបស់រដ្ឋាភិបាល ដើម្បីឲ្យក្រុមប្រឹក្សានេះសិក្សាពីផលប៉ះពាល់នៃកាំជ្រួច និងរាយការណ៍មកវិញក្នុងរយៈពេល៣ខែ ។ តុលាការប្រហែលជាអាចហាមឃាត់មិនឲ្យមានការផលិតផាវក្នុងមួយប្រទេសផងដែរ ។
លោក Sankaranarayanan និងមេធាវី២រូបទៀតបានដាក់បណ្តឹងទៅកាន់តុលាការតាំងពីឆ្នាំ២០១៥មក និងអះអាងថា បរិយាកាសកខ្វក់ក្នុងទីក្រុងនេះបានរំលោភដល់សិទ្ធិក្នុងការរស់នៅរបស់ពួកគេដែលមានចែងក្នុងរដ្ឋធម្មនុញ្ញ។ បរិស្ថានកខ្វក់ក្នុងឆ្នាំនេះ ពិតជាគួរឲ្យភ្ញាក់ផ្អើលណាស់ ។ ប៉ុន្តែតុលាការមិនបានចេញដីកាទាន់ពេលបុណ្យ Diwali ក្នុងឆ្នាំ២០១៥ ឬ២០១៦ឡើយ ។
ទោះជាយ៉ាងណា ផាវគ្រាន់តែជាប្រភពមួយនៃបរិស្ថានកខ្វក់ក្នុងក្រុងដេលី ដែលកំពុងតែជួបកង្វះខាតប្រព័ន្ធធ្វើដំណើរមានប្រសិទ្ធភាពមួយ ។ ទីក្រុងនេះមានយានយន្តប្រមាណ៩លានគ្រឿងឯណោះ ហើយរថយន្តថ្មីៗត្រូវបានចុះឈ្មោះចំនួន១.៤០០គ្រឿងក្នុងមួយថ្ងៃ ។
ប្រេងសម្រាប់ចម្អិនអាហារ ធូលីពីការសាងសង់ និងរោងចក្រអគ្គិសនីប្រើប្រាស់ធ្យូង បានបន្ថែមជាតិពុលដល់បរិស្ថានកខ្វក់នេះផងដែរ ។
សាលដីការបស់តុលាការកំពូលចេញផ្សាយកាលពីថ្ងៃសុក្រកន្លងមក មិនមែនជាវិធានការលើកទី១ ក្នុងការប្រឆាំងនឹងបរិស្ថានកខ្វក់នោះទេ ។ កាលពីឆ្នាំ២០១៥ តុលាការនេះក៏បានដាក់ពន្ធថ្មីលើរថយន្តដឹកជញ្ជូនធំៗដែលចូលក្នុងទីក្រុងផងដែរ ៕
ចែករំលែកព័តមាននេះ