រាជធានីភ្នំពេញ ៖ តំបន់សេដ្ឋកិច្ចពិសេសខេត្តព្រះសីហនុដែលនឹងប្រែក្លាយជាទីក្រុងសិនជិននៃប្រទេសកម្ពុជានោះ នឹងផ្តល់ការងារដល់កម្មករនិយោជិតប្រមាណ១០ម៉ឺននាក់នៅពេលអនាគត ។ នេះបើតាមលោក Chen Jiangang
រាជធានីភ្នំពេញ ៖ តំបន់សេដ្ឋកិច្ចពិសេសខេត្តព្រះសីហនុដែលនឹងប្រែក្លាយជាទីក្រុងសិនជិននៃប្រទេសកម្ពុជានោះ នឹងផ្តល់ការងារដល់កម្មករនិយោជិតប្រមាណ១០ម៉ឺននាក់នៅពេលអនាគត ។ នេះបើតាមលោក Chen Jiangang អគ្គនាយកក្រុមហ៊ុនតំបន់សេដ្ឋកិច្ចពិសេសនេះបានអះអាងក្នុងជំនួបពិភាក្សាទ្វេភាគីជាមួយលោក អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី២៨ វិច្ឆិកា ម្សិលមិញ នៅទីស្តីការក្រសួង ។
លោកអគ្គនាយករូបនេះបានបញ្ជាក់ថា ៖ « បច្ចុប្បន្ន មានក្រុមហ៊ុនវិនិយោគកើនឡើងដល់១០៥ក្រុមហ៊ុន ដែលផ្តល់ការងារជូនកម្មករនិយោជិតប្រមាណ១៦ពាន់នាក់ ហើយជាគោលដៅនាពេលអនាគត នឹងបង្កើនការងារជូនកម្មករនិយោជិតប្រមាណ១០ម៉ឺននាក់ » ។
ជាមួយគ្នានេះ លោកបានសម្តែងនូវអំណរគុណចំពោះការជួយគាំទ្រយ៉ាងកក់ក្តៅពីសំណាក់រាជរដ្ឋាភិបាលកម្ពុជា ជាពិសេស ក្រសួងការងារ និងបណ្តុះបណ្តាលវិជ្ជាជីវៈ ដែលបានផ្តល់កិច្ចសហការយ៉ាងល្អ ក្នុងការធានាបាននូវសុខដុមនីយកម្មទំនាក់ទំនងវិជ្ជាជីវៈ ដែលធ្វើឱ្យតំបន់សេដ្ឋកិច្ចពិសេសខេត្តព្រះសីហនុទទួលបាននូវជំនឿទុកចិត្ត រួមទាំងការទាក់ទាញវិនិយោគិន និងធ្វើឱ្យក្រុមហ៊ុនមានការវិវត្តរីកចម្រើនជាខ្លាំង ។
ថ្លែងក្នុងជំនួបនោះដែរ លោករដ្ឋមន្ត្រី អិុត សំហេង បានកោតសរសើរចំពោះក្រុមហ៊ុន ដែលបានសហការយ៉ាងល្អជាមួយគ្រប់ភាគីទាំងអស់ ជាពិសេស មន្ត្រីនៅច្រកចេញចូលតែមួយ និងអាជ្ញាធរដែនដី ។
លោករដ្ឋមន្ត្រីបានចាត់ទុកថា តំបន់សេដ្ឋកិច្ចពិសេសក្រុងព្រះសីហនុ ជាសួនឧស្សាហកម្មគ្រប់ជ្រុងជ្រោយមួយ ដែលអាចជាគំរូដល់តំបន់សេដ្ឋកិច្ចពិសេសនានានៅព្រះរាជាណាចក្រកម្ពុជា ព្រោះថា មិនត្រឹមតែមានប្រព័ន្ធគ្រប់គ្រងល្អទេ ថែមទាំងមានមជ្ឈមណ្ឌលបណ្តុះបណ្តាលវិជ្ជាជីវៈសម្រាប់ផ្តល់ជំនាញជូនដល់កម្មករនិយោជិតនាពេលអនាគតផងដែរ ។
ជាមួយគ្នានេះ លោករដ្ឋមន្ត្រីបានស្នើឱ្យក្រុមហ៊ុនបន្តយកចិត្តទុកដាក់សហការឱ្យបានល្អបន្តទៀត ដោយចូលរួមជួយផ្សព្វផ្សាយច្បាប់ស្តីពីសហជីព និងសំណូមពរឱ្យយកចិត្តទុកដាក់ខ្ពស់ដល់សុខភាព និងសុវត្ថិភាពការងាររបស់កម្មករនិយោជិត ជាពិសេស សុវត្ថិភាពដឹកជញ្ជូនកម្មករនិយោជិត ព្រមទាំងចូលរួមគាំទ្រដល់ការអនុវត្តធានារ៉ាប់រងសុខភាពជូនកម្មករនិយោជិតរបស់បេឡាជាតិរបបសន្តិសុខសង្គម ។
គួរបញ្ជាក់ថា តំបន់សេដ្ឋកិច្ចពិសេសខេត្តព្រះសីហនុ មានផ្ទៃដី១.១១៣ហិកតា ឆ្លងកាត់ការអភិវឌ្ឍរយៈពេល៨ឆ្នាំ បានបង្កើតជាសួនឧស្សាហកម្មអន្តរជាតិ ស្រូបយកសហគ្រាសចូលមកវិនិយោគ និងមានវិនិយោគិនមកពីប្រទេសចិន ជប៉ុន បារាំង កូរ៉េខាងត្បូង និងសហភាពអឺរ៉ុប ជាដើម ។ ទិសដៅខាងមុខ តំបន់សេដ្ឋកិច្ចពិសេសនឹងសម្រេចឲ្យបាននូវរោងចក្រចំនួន៣០០សហគ្រាស មកវិនិយោគនៅក្នុងតំបន់សេដ្ឋកិច្ចពិសេស និងមាននិយោជិតធ្វើការចំនួន១០ម៉ឺននាក់ និងអាចស្រូបយកកម្លាំងពលកម្មចំនួន២០ម៉ឺននាក់ ។
ក្រៅពីផ្តល់ឱកាសការងារធ្វើជូនប្រជាពលរដ្ឋ តំបន់សេដ្ឋកិច្ចពិសេសបានជួយបណ្តុះបណ្តាលភាសាចិនដល់កម្មករ កម្មការិនី សិស្សានុសិស្ស និងជួយសាងសង់សាលារៀនក្នុងឃុំបិតត្រាំង ហើយនៅថ្ងៃខាងមុខ តំបន់សេដ្ឋកិច្ចពិសេស នឹងសាងសង់មជ្ឈមណ្ឌលបណ្តុះបណ្តាលវិជ្ជាជីវៈ ដើម្បីបង្ហាត់បង្រៀនជំនាញជូនប្រជាពលរដ្ឋកម្ពុជាឲ្យកាន់តែច្រើនដើម្បីប្រកួតប្រជែងសមាហរណកម្មក្នុងតំបន់អាស៊ាន ។ ជាមួយគ្នានេះ តំបន់សេដ្ឋកិច្ចពិសេសនឹងសាងសង់មន្ទីរពេទ្យមានស្តង់ដាដើម្បីបម្រើសេវាសុខភាពជូនប្រជាពលរដ្ឋ ក៏ដូចជាកម្មករ កម្មការិនី ដោយបន្តអនុវត្តសម្រាប់ប្រយោជន៍ប្រជាពលរដ្ឋក្នុងតំបន់ទាំងមូលឱ្យមានជីវភាពកាន់តែប្រសើរឡើង ៕
ចែករំលែកព័តមាននេះ