តាមជំនឿរបស់ជនជាតិឥណ្ឌា នៅពេលរៀបអាពាហ៍ពិពាហ៍ គឺគេបាញ់កាំភ្លើងដើម្បីរំដោះគ្រោះ ។
ជារឿងអកុសល ក្នុងពិធីរៀបអាពាហ៍ពិពាហ៍មួយដោយការបាញ់កាំភ្លើងនោះបង្កឱ្យបងប្អូនខាងកូនកំលោះស្លាប់ និងប៉ូលិសកំពុងតាមចាប់ខ្លួនអ្នកបាញ់យកទៅដាក់ទោសតាមផ្លូវច្បាប់ ។
«ម៉េត្រូ» កាលពីពេល ថ្មីៗកន្លងមកផ្សាយថា ពិធីរៀបការនៅក្រុង Karnal រដ្ឋហាហ៉ាណា ភាគខាងជើងប្រទេសឥណ្ឌាមានបាញ់កាំភ្លើងរំដោះគ្រោះ ប៉ុន្តែជាអកុសលត្រូវចំភ្ញៀវម្នាក់ដែលជាសាច់ញាតិកូនកំលោះ បណ្តាលឱ្យស្លាប់ និង៤នាក់ទៀតរងរបួស ។
លោកស្រីស៊ុតធី ទេវា ថាគូរ៉ា មេដឹកនាំគណបក្សនៅក្រុង «ហីុនឌូ មហាសាផា» បានទទួលការអញ្ជើញពីម្ចាស់ដើមការឱ្យធ្វើជាអ្នកបាញ់កាំភ្លើងកិត្តិយស ។ លោកស្រីស៊ុតធី និងអ្នកប្រារព្ធពិធីបានឈរនៅខាងមុខរោងការដើម្បីបាញ់កាំភ្លើង ។ មានកាំភ្លើងមួយដើមរបស់អ្នកចូលរួមរអាក់រអួលបណ្តាលឱ្យរៀលកៃទៅត្រូវភ្ញៀវច្រើននាក់ ។ ភ្លាមនោះអ្នកកាន់កាំភ្លើងគេចខ្លួនបាត់ ។
ស្ត្រីរងគ្រោះឈ្មោះស៊ូនីតា អាយុ៤៨ឆ្នាំ ជាភ្ញៀវ និងជាសាច់ញាតិរបស់កូនកំលោះត្រូវគ្រាប់ត្រង់ដើមទ្រូង ហើយស្លាប់នៅមន្ទីរពេទ្យ ។ មានភ្ញៀវ៤នាក់ទៀតរងរបួស ក្នុងនោះម្នាក់ជាក្មេងស្រីអាយុ១១ឆ្នាំ ។
ចាត់ទុកថាជារឿងអពមង្គលមួយពីការបាញ់កាំភ្លើងក្នុងពិធីរៀបអាពាហ៍ពិពាហ៍ តាមទំនៀមទម្លាប់របស់ជនជាតិឥណ្ឌា ៕
ចែករំលែកព័តមាននេះ