ខេត្តបន្ទាយមានជ័យ ៖ នគរបាលស្រុកស្វាយចេក តាមចាប់ខ្លួនជនសង្ស័យចំនួន៣នាក់បានជាបន្តបន្ទាប់ ក្រោយពីពួកគេជិះម៉ូតូ១គ្រឿងធ្វើសកម្មភាពឆក់កាបូបហើយរត់គេចខ្លួន ។ សកម្មភាពឆក់កាបូបនេះ កើតឡើងកាលពីវេលាម៉ោងប្រមាណ១១និង២៨នាទីព្រឹកថ្ងៃទី២០ ខែមិថុនា ឆ្នាំ២០២២កន្លងទៅ នៅចំណុចផ្លូវកោងភូមិតាស្មន់ ឃុំរលួស ស្រុកស្វាយចេក ។
វរសេនីយ៍ឯក ជា ស្លូញ អធិការនគរបាលស្រុកកស្វាយចេក បានឲ្យដឹងថា ជនរងគ្រោះជាស្ត្រី២នាក់ ម្នាក់ឈ្មោះ សៀង សារុំ អាយុ៤៧ឆ្នាំ រស់នៅភូមិរលួស ឃុំរលួស និងម្នាក់ទៀតឈ្មោះ សុីវ ដាណេ អាយុ៣៦ឆ្នាំ រស់នៅភូមិក្លឹង ឃុំស្វាយចេក ជិះម៉ូតូហុងដាឌ្រីមឌុបគ្នាពីខាងត្បូងទៅខាងជើង ។ លុះទៅដល់ចំណុចខាងលើ ស្រាប់តែមានមនុស្សប្រុស៣នាក់ជិះម៉ូតូហុងដាឌ្រីម១គ្រឿង ពណ៌ខ្មៅ គ្មានផ្លាកលេខ ធ្វើសកម្មភាពឆក់កាបូបស្ពាយពីស្ត្រីឈ្មោះ សៀង សារុំ ។
សកម្មភាពនេះ បណ្តាលឲ្យម៉ូតូជនរងគ្រោះដួលរងរបួសទាំង២នាក់ ក្នុងនោះធ្ងន់១នាក់បាក់ឆ្អឹងដងកាំបិតខាងឆ្វេង និងត្រូវបានបងប្អូនដឹកយកទៅព្យាបាលនៅគ្លីនិកបានសុខ ក្រុងសិរីសោភ័ណ ។ ចំណែកជនសង្ស័យទាំង៣នាក់ ជិះម៉ូតូរត់គេចខ្លួនទៅទិសខាងជើងបាត់ស្រមោលទៅ ។
លោកអធិការបន្តថា បើតាមជនរងគ្រោះប្រាប់ នៅក្នុងកាបូបដែលចោរឆក់យកទៅនោះមានប្រាក់ដុល្លារ ១.០៥០ដុល្លារ ប្រាក់បាត ៧៥.៣០០បាត និងប្រាក់រៀល ៩១០.០០០រៀល ខ្សែដៃមាស៥ជី ទូរស័ព្ទដៃ១គ្រឿងម៉ាកអុបប៉ូកាតគ្រីម៉ូតូ២សន្លឹក កាតចាក់វ៉ាក់សាំង១សន្លឹក និងអត្តសញ្ញាណប័ណ្ណសញ្ជាតិខ្មែរ១សន្លឹក ។
ក្រោយពីទទួលបានព័ត៌មានខាងលើ លោកបានចាត់ឲ្យកម្លាំងនគរបាលផ្នែកកព្រហ្មទណ្ឌដឹកនាំដោយវរសេនីយ៍ត្រី គក់ សុភ័ក្ត្រ អធិការរង សហការជាមួយនគរបាលប៉ុស្តិ៍ ដេញតាមចាប់បានជនសង្ស័យម្នាក់ឈ្មោះ យ៉ុម តៃវ៉ាន់ ភេទប្រុស អាយុ២២ឆ្នាំ រួមជាមួយម៉ូតូ១គ្រឿង។
ចំណែកបក្សពួក២នាក់ទៀត រត់គេចខ្លួនបាត់។បន្ទាប់ពីសួរនាំរួច កម្លាំងនរបាលបានបន្តស្រាវ
ជ្រាវរហូតឈានដល់ឃាត់ខ្លួនបានបក្ខ២នាក់ទៀតនេះ នាវេលាម៉ោងប្រមាណ៤ល្ងាចថ្ងៃដដែលនោះ ដែលម្នាក់ឈ្មោះ ឈ្មោះ រ៉ូ ឌី ភេទប្រុស អាយុ១៩ឆ្នាំ នៅភូមិពាមឯក ឃុំពាមឯក ស្រុកឯកភ្នំ ខេត្តបាត់ដំបង និងម្នាក់ទៀតឈ្មោះ ឃឿត ផាន ភេទប្រុស អាយុ២៣ឆ្នាំ នៅភូមិគង់ទុំ ឃុំពាមឯក ស្រុកឯកភ្នំ ព្រមទាំងដកហូតបានវត្ថុតាងកាបូបនិងសម្ភារៈដែលពួកគេឆក់បាន ។
លោកអធិការ ជា ស្លូញ បានបញ្ជាក់ថា ជនសង្ស័យទាំង៣នាក់ និងវត្ថុតាងមូ៉តូដែលជាមធ្យោបាយជិះធ្វើសកម្មភាព ត្រូវបានកសាងសំណុំរឿងបញ្ជូនទៅស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី ។ ចំណែកសម្ភារៈជនរងគ្រោះ ស្នើសុំគោលការណ៍ប្រគល់ជូនម្ចាស់ដើមវិញ ៕
ចែករំលែកព័តមាននេះ