រាជធានីភ្នំពេញ ៖ស្ថានឯកអគ្គរដ្ឋទូតនៃសាធារណរដ្ឋកូរ៉េ បានរៀបចំតំាងពិព័រណ៍ផលិតផលកូរ៉េរយៈពេល៣ថ្ងៃពីថ្ងៃទី២៥ដល់ថ្ងៃទី២៧ វិច្ឆិកា ២០១៦ ដោយមានស្តង់ចំនួន៥០ នៅក្នុងមជ្ឈមណ្ឌលវប្បធម៌កូរ៉េក្នុងរាជធានីភ្នំពេញ។
ការដាក់តាំងបង្ហាញលក់ផលិតផលពីប្រទេសកូរ៉េដោយមានការបញ្ចុះតម្លៃនេះដែរ មានបណ្តាក្រុមហ៊ុនមកពីប្រទេសកូរ៉េចំនួនជាង៣០ក្រុមហ៊ុនចូលរួមថែមទាំងមានក្រុមហ៊ុនដែលដាក់លក់ផលិតផលលើទីផ្សារអនឡាញជាច្រើនក្រុមហ៊ុនផងដែរ។
ប្រធានគ្រប់គ្រងមជ្ឈមណ្ឌលវប្បធម៌កូរ៉េបានថ្លែងឱ្យដឹងថា ការតាំងបង្ហាញលក់ផលិតផលពីប្រទេសកូរ៉េនេះដែរ គឺធ្វើឡើងក្នុងគោលបំណងឱ្យពលរដ្ឋកម្ពុជាបានស្គាល់ពីមុខទំនិញរបស់ប្រទេសកូរ៉េ និងមានការបញ្ចុះតម្លៃពី២០ទៅ៥០%។
ទំនិញដែលនាំមកតាំងពិព័រណ៍នេះដែរ គេឃើញមានច្រើនប្រភេទរួមមានទាំង គ្រឿងសម្អាង គ្រឿងអេឡិកត្រូវនិក សម្លៀកបំពាក់ សំឡីអនាម័យ ភេសជ្ជៈ សម្ភារកីឡា និងសម្ភារសិក្សាជាដើម។ ចំណែកក្រុមហ៊ុន កាណាម៉ល ជាក្រុមហ៊ុនផ្តល់សេវាកម្មលក់ផលិតផលតាមប្រព័ន្ធអនឡាញ ដែលបានចុះបញ្ជីស្របច្បាប់នៅក្រសួងពាណិជ្ជកម្មបាននំាយកផលិតផលកូរ៉េជាច្រើនដូចជា៖ គ្រឿងអេឡិចត្រូនិច គ្រឿងបរិក្ខាសម្រាប់គេហដ្ឋាន ការិយាល័យ សម្លៀកបំពាក់បុរសនារី និងកុមារ និងម្ហូបអាហារជាដើម ផលិតផលទំាងនោះសុទ្ធតែមានគុណភាពខ្ពស់ និងតម្លៃសមរម្យ ។
គួរបញ្ជាក់ថាទំនិញរបស់ប្រទេសកូរ៉េកំពុងបានវាយលុកក្នុងប្រទេសកម្ពុជាយ៉ាងច្រើនដែលក្រៅពីគ្រឿងអេឡិកត្រូនិកកំពុងបានទទួលការពេញនិយមហើយ ចំពោះទំនិញសម្ភារទូទៅដូចជាក្នុងផ្ទះសម្បែង និងគ្រៀងសម្អាងក៏បានទទួលការពេញនិយមប្រើប្រាស់ដូចគ្នា៕
ចែករំលែកព័តមាននេះ