លំនៅឋាន គឺជាអចលនទ្រព្យ និងក្តីសុបិនរបស់មនុស្សជាច្រើននាក់ដែលមានអាយុសមល្មម និងមានប្រាក់ចំណូលជារបស់ខ្លួន ។ គំនិតក្នុងការមានលំនៅឋាននេះ តែងកើតឡើងដោយសារហេតុផលចង់បង្កើតគ្រួសារ ឬមានផ្ទះជាកម្មសិទ្ធិផ្ទាល់ខ្លួន ។
បច្ចុប្បន្ននេះ ស្ថានភាពសេដ្ឋកិច្ចថមថយបានធ្វើឲ្យមនុស្សជាច្រើនព្រួយបារម្ភក្នុងការសុំខ្ចីប្រាក់ទិញផ្ទះ ខណៈធនាគារផ្សេងៗមានការពិនិត្យ និងពិចារណាយ៉ាងហ្មត់ចត់បំផុតមុននឹងផ្តល់ប្រាក់កម្ចី ។ ដូច្នេះ មុននឹងខ្ចីប្រាក់ទិញលំនៅឋាន ចំណុចអ្វីខ្លះដែលអ្នកគួរតែពិនិត្យជាមុន ?
១-មិនទាន់ត្រៀមខ្លួន កុំប្រថុយ ៖
ការទិញលំនៅឋានសម្រាប់រស់នៅ គឺជាភារកិច្ចរយៈពេលយូរ គួរតែពិចារណាឱ្យបានល្អជាមុនសិន មុននឹងប្រថុយក្នុងរឿងបំណុល ។
២-ជ្រើសរើសកន្លែងរស់នៅស័ក្តិសម ៖
រឿងសំខាន់បំផុត គឺអ្នកគួរតែជ្រើសរើសផ្ទះ ឬកន្លែងរស់នៅឱ្យស័ក្តិសមជាមួយនឹងលទ្ធភាពក្នុងការបង់រំលស់របស់អ្នក ។ កុំពឹងទៅលើក្តីសុបិន ឬការចង់បានតែម្យ៉ាងនោះ ព្រោះបើសិនជាអ្នកបង់រំលស់មិនបានទេ សុបិនដែលល្អនេះ វាអាចនឹងក្លាយទៅជាសុបិនអាក្រក់ភ្លាមៗ។
៣-ជម្រះការបង់រំលស់ផ្សេងៗ ៖
យើងយល់ហើយថា សព្វថ្ងៃនេះ ជីវិតរបស់យើងប្រៀបដូចជាជីវិតនៃការបង់រំលស់ មិនថា ទូរស័ព្ទ រថយន្ត និងគ្រឿងអគ្គិសនី ។ល។ មនុស្សជាច្រើនប្រើវិធីបង់រំលស់ជាមួយនឹងសម្ភារទាំងនេះ ។ ប៉ុន្តែបើសិនជាអ្នកនឹងទិញផ្ទះ គួរតែជម្រះនូវការបង់រំលស់គ្រប់យ៉ាងឱ្យរៀបរយជាមុនសិន ។
៤-កាតឥណទាន ៖
តើដឹងឬទេថា កាតឥណទានដែលអ្នកមានក្នុងហោប៉ៅដ៏ច្រើននោះ នឹងត្រូវរាប់ជាបំណុលទាំងអស់ (ទោះបីជាអ្នកនៅមិនទាន់បានដកចេញម្តងក្តី) ហើយការបូកបញ្ចូលគ្នានៃកាតឥណទានបានក្លាយទៅជាបំណុលសរុប ។ នៅពេលបូកបញ្ចូលគ្នាហើយ បើមានតម្លៃច្រើនជាងប្រាក់ចំណូល៤០%នោះ អ្នកនឹងខ្ចីប្រាក់បានតិច ឬមិនអាចខ្ចីបាន ។
៥-ពិនិត្យប្រវត្តិឥណទាន ៖
បើសិនជាអ្នកសុំខ្ចីប្រាក់ពីធនាគារ គឺគួរតែពិនិត្យព័ត៌មានពីប្រវត្តិឥណទានថា ប្រវត្តិនៃការទូទាត់បំណុលរបស់អ្នកយ៉ាងដូចម្តេច ។ ការខុសពេលកំណត់ទូទាត់ប្រាក់ទៅធនាគារ វានឹងអាចប៉ះពាល់ដល់ការខ្ចីប្រាក់ ។
៦-ការបង់រំលស់រថយន្ត ៖
បើសិនជាកំពុងតែបង់រំលស់លើរថយន្ត អ្នកអាចត្រូវគិតលើរឿងខ្ចីប្រាក់ទិញផ្ទះ ។ វិធីណែនាំ គឺអាចឱ្យគ្រឹះស្ថានហិរញ្ញវត្ថុប៉ាន់ស្មានជាមុនថា អ្នកនឹងអាចបង់រំលស់ផ្ទះបានទៀតឬអត់ ។
៧-បង្កើតឥណទានដល់ខ្លួនឯង ៖
ការបង្កើតឥណទានដល់ខ្លួនឯង នឹងធ្វើឱ្យគ្រឹះស្ថានហិរញ្ញវត្ថុផ្តល់ប្រាក់កម្ចីដល់អ្នកដោយងាយ ។ វិធីណែនាំ គឺអ្នកអាចសាកល្បងបិទបញ្ជីធនាគារ និងសន្សំប្រាក់រយៈពេល១-២ឆ្នាំ ដែលវានឹងជួយរឿងក្រេឌីត និងបង្កើតរបៀបសន្សំប្រាក់ផងដែរ ។
៨-ការខ្ចីឥណទានរួមគ្នា ៖
ការខ្ចីឥណទានរួមគ្នា ចំណុចគួរឱ្យជឿជាក់នោះដូចជា ត្រូវរកអ្នកមានការងារគង់វង្ស ដែលនឹងទទួលបានការពិចារណាទទួលប្រាក់កម្ចីពីធនាគារដោយងាយស្រួល ៕
ចែករំលែកព័តមាននេះ