រាជធានីភ្នំពេញ ៖ នៅពេលចាប់ផ្ដើមមានផែនការទិញផ្ទះ មានមនុស្សមិនតិចទេដែលពិបាក ឬស្មុគស្មាញក្នុងការសម្រេចចិត្តភ្លាមៗថាតើគួរទិញលំនៅឋានក្នុងបុរី ឬក្រុមហ៊ុនណាដើម្បីឲ្យមានសុវត្ថិភាព ព្រោះថាសព្វថ្ងៃនេះក្រុមហ៊ុនផ្គត់ផ្គង់ផ្ទះល្វែង ឬវីឡានៅតាមបុរីមានច្រើន ដែលបុរីខ្លះមិនបង្កបញ្ហាដល់អតិថិជន ប៉ុន្តែក៏មានបុរីខ្លះទៀតមិនបានគោរពតាមកិច្ចសន្យានៃការទិញលក់រវាងអ្នកទិញ និងម្ចាស់បុរីដែរ។ ជាក់ស្ដែង ប៉ុន្មានថ្ងៃមុននេះ តារាចម្រៀងទិត្យវិច្ឆិកា បានបង្ហោះសារវីឌីអូពីបញ្ហាដែលខ្លួនជួបប្រទះ គឺបង់លុយជូនក្រុមហ៊ុនសាងសង់ផ្ទះល្វែងរួចហើយ តែក្រុមហ៊ុនមិនបានគោរពតាមកិច្ចសន្យា ដោយមិនសង់ផ្ទះឲ្យតាមកាលកំណត់នោះទេ ។ ចំណុចនេះហើយដែលធ្វើឲ្យអ្នកទិញផ្ទះអន់ចិត្ត ព្រោះធម្មតាអ្នកទិញផ្ទះ គឺចង់បានផ្ទះនៅឆាប់ៗ ហើយបើអូសបន្លាយពេលកាន់តែយូរនោះ នឹងធ្វើឲ្យមានការអាក់អន់ចិត្តជាមួយគ្នាជាមិនខាន ។
ដូចនេះ មុននឹងសម្រេចចិត្តទិញផ្ទះនៅក្នុងបុរី ឬក្រៅបុរី ដែលសំដៅលើប្រភេទផ្ទះបង់រំលស់ ឬបង់ជាដំណាក់កាល មិនមែនបង់ផ្ដាច់ តើត្រូវសិក្សាពីចំណុចអ្វីខ្លះដើម្បីកុំឲ្យមានបញ្ហានៅពេលក្រោយធ្វើកិច្ចសន្យាទិញ ?
មានអ្នកជំនាញខាងវិស័យអចលនទ្រព្យជាច្រើនបានលើកឡើងស្រដៀងគ្នា និងផ្ដល់យោបល់មួយចំនួនដល់អ្នកមានបំណងចង់ទិញផ្ទះ ដូចជា ៖
១-ត្រូវគិតជាមុនថា តើអ្នកណាជាអ្នកអភិវឌ្ឍន៍គម្រោងលំនៅឋាននោះ ដែលសំដៅលើបុរី តើម្ចាស់បុរីជាអ្នកណា មកពីណា និងមានប្រវត្តិយ៉ាងម៉េច ។ ដូចដែលបានដឹងហើយថា បុរីមានច្រើន ហើយបុរីទាំងអស់នោះ ក៏មិនប្រាកដថាម្ចាស់បុរីទាំងអស់សុទ្ធជាអ្នកមានទ្រព្យផ្ទាល់ខ្លួនមកវិនិយោគនោះទេ ជួនកាល ម្ចាស់បុរីអាចយកឥណទានពីធនាគារដើម្បីមកអភិវឌ្ឍន៍។
២-ត្រូវមើលទីតាំងរបស់បុរីដែលចង់ទិញផងថា តើបុរីនោះមានប្រវត្តិលិចទឹកដែរទេ ស្ថិតនៅតំបន់មានសន្តិសុខដែរទេ អាចប្រកបអាជីវកម្ម ឬក៏នៅជិតតំបន់អាចប្រកបអាជីវកម្មដែរឬទេ ដូចជា នៅជិតផ្សារ សាលារៀន រោងចក្រសហគ្រាស និងមន្ទីរពេទ្យជាដើម ។
៣-បើតាមអ្នកដែលធ្លាប់ទិញផ្ទះក្នុងបុរីកន្លងមក ក៏បានឲ្យយោបល់ដែរថា បើចង់ទិញផ្ទះក្នុងបុរី ត្រូវសម្លឹងមើលពីគុណភាពសំណង់ផ្ទះផងដែរ ព្រោះកន្លងមកអ្នកទិញផ្ទះក្នុងបុរីទិញ ទើបតែបានប៉ុន្មានឆ្នាំសោះ បែរជាប្រេះបែកជញ្ជាំងបាត់ទៅហើយ ។
ចំណុចមួយទៀត អ្នកទិញផ្ទះក៏គួរតែប្រមើលមើលពីអនាគតនៃតំបន់ដែលខ្លួនរស់នៅដែរ ជាក់ស្ដែង នៅជុំវិញរាជធានីភ្នំពេញ ក៏ត្រូវដឹងថាតើថ្ងៃអនាគត ប៉ែកខាងណាដែលមានសក្ដានុពលទាំងការរស់នៅ និងការធ្វើអាជីវកម្ម ព្រោះបើថ្ងៃណាចង់ដូរទីតាំងនោះ ដោយត្រូវការលក់ផ្ទះវិញ ក៏ទទួលបានចំណេញច្រើន ។ ប៉ុន្តែបើសិនជាទៅរស់នៅតំបន់ដែលគ្មានការអភិវឌ្ឍ ឬមិនមែនជាគោលដៅអភិវឌ្ឍន៍របស់រាជរដ្ឋាភិបាល នៅពេលចង់លក់ផ្ទះវិញ ក៏មិនចំណេញប៉ុន្មានដែរ ឬអាចខាតផងក៏មិនដឹង ។
ដោយឡែកបច្ចុប្បន្ននេះ ទន្ទឹមនឹងមានការផ្ដល់ជូនលក្ខខណ្ឌងាយៗរបស់ក្រុមហ៊ុនផ្គត់ផ្គង់លំនៅឋាន ឬបុរីជាច្រើនក៏ដោយ ប៉ុន្តែអ្នកទិញក៏គួរសម្លឹងមើលឲ្យបានច្បាស់ផងដែរទៅថ្ងៃអនាគត ជាក់ស្ដែង ម្ចាស់បុរីផ្ដល់ជូនអតិថិជនរបស់ខ្លួន ដោយមិនចាំបាច់ដាក់ប្រាក់កក់ដំបូងឡើយ ដោយគ្រាន់តែចុះកិច្ចសន្យាទិញលក់ ហើយបង់ប្រចាំខែរយៈពេលយូររហូតដល់១៧ឆ្នាំឯណោះ ។ ត្រង់ចំណុចនេះ អ្នកទិញផ្ទះក៏គួរគិតផងដែរថា តើមានចំណូលប៉ុន្មានក្នុងមួយខែ ។
បើតាមអ្នកជំនាញខាងហិរញ្ញវត្ថុលើកឡើងថា ទិញរបស់អ្វីមួយបង់រំលស់ ត្រូវលៃយ៉ាងណាបង់ត្រឹមតែ៣០%នៃប្រាក់ចំណូលឬប្រាក់ខែ ឧទាហរណ៍ បើប្រាក់ចំណូល១.០០០ដុល្លារ គឺអាចទិញរបស់បង់រំលស់ត្រឹម៣០០ដុល្លារអាមេរិកបានហើយ ប៉ុន្តែបើលើសលប់ពេក នៅពេលមានបញ្ហាកើតឡើង វានឹងមានវិបត្តិហិរញ្ញវត្ថុនៅក្នុងគ្រួសារ និងអាចឈានដល់វិបត្តិសេដ្ឋកិច្ចប្រទេសផងដែរ ក្នុងករណីពលរដ្ឋម្នាក់ៗចេះតែនាំគ្នាទិញរបស់បង់រំលស់លើសពីប្រាក់ចំណូលច្រើនពេក ៕
ចែករំលែកព័តមាននេះ