នារីម្នាក់ស្រែកយំខ្លាំងៗ និងស្រែកឲ្យអ្នកជិតខាងជួយ
ខេត្តប៉ៃលិន ៖ នារីវ័យក្មេងស្រស់ស្អាតម្នាក់បានស្រែកយំខ្លាំងៗ និងស្រែកឲ្យអ្នកជិតខាងជួយ នៅពេលដែលអ្នកជិតខាងទៅដល់ ស្រាប់តែឃើញនាងរងរបួសភ្លាត់ក្បាលជង្គង់ …
ខេត្តប៉ៃលិន ៖ នារីវ័យក្មេងស្រស់ស្អាតម្នាក់បានស្រែកយំខ្លាំងៗ និងស្រែកឲ្យអ្នកជិតខាងជួយ នៅពេលដែលអ្នកជិតខាងទៅដល់ ស្រាប់តែឃើញនាងរងរបួសភ្លាត់ក្បាលជង្គង់ខាងស្តាំបាត់ទៅហើយ ពេលសួរនាងហេតុអ្វីនាងថាត្រូវប្តីវ៉ៃ ។ អំពើហិង្សាក្នុងគ្រួសារនេះកើតឡើងកាលពីវេលាម៉ោង៧ និង៣០នាទីយប់ ថ្ងៃទី២៥ ខែវិច្ឆិកា ឆ្នាំ២០១៦ នៅផ្ទះរបស់នារីរងគ្រោះ ស្ថិតនៅភូមិអូរបេង ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានបានឱ្យដឹងថា នារីរងគ្រោះឈ្មោះ ទូច គឹមអ៊ា អាយុ២៩ឆ្នាំ បានរងរបួសភ្លាត់ក្បាលជង្គង់ ចំណែកប្តីឈ្មោះ បង វែង អាយុ៤៣ឆ្នាំ មានកូនស្រី២នាក់នៅក្នុងបន្ទុក ។ ទាំង២នាក់ជាបុគ្គលិកកាស៊ីណូនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានបានឱ្យដឹងទៀតថា មុនពេលកើតហេតុ ប្តី-ប្រពន្ធនេះបានឈ្លោះទាស់ទែងពាក្យសម្តីគ្នាទៅវិញទៅមក ដោយសារតែប្រចណ្ឌដាក់គ្នា លុះដល់យប់ស្រាប់តែឮសម្លេងស្រែកយំឱ្យអ្នកជិតខាងទៅជួយ ខណៈពេលទៅដល់គេឃើញនារីជាប្រពន្ធបានភ្លាត់ក្បាលជង្គង់បាត់ទៅហើយ ដោយនាងប្រាប់ថា ត្រូវប្តីវាយទើបរងរបួសបែបនេះ ។
ប្រភពបន្តទៀតថា ក្រោយពេលកើតហេតុរហូតដល់ព្រឹកថ្ងៃទី២៦ ខែវិច្ឆិកា នារីរងគ្រោះអត់បានទៅប្តឹងសមត្ថកិច្ចនោះទេ ព្រោះខ្លាចគេចាប់ប្តីទៅធ្វើបាប អត់មានអ្នកណាមើលថែរក្សាកូនទាំង២នាក់ ។
លោក ជុំ វឿន នាយប៉ុស្តិ៍នគរបាលឃុំស្ទឹងកាច់ បានឱ្យដឹងថា លោកទើបតែទទួលបានដំណឹងមកពីសាលាខេត្តប៉ៃលិនប្រាប់ឱ្យចុះទៅមើលនារីរងគ្រោះខាងលើដោយសារប្តីប្រើអំពើហិង្សា ពេលចុះទៅដល់នារីរងគ្រោះអត់មាននិយាយរឿងអ្វីនោះទេ ហើយសុំឱ្យលោកជួយសម្របសម្រួល និងណែនាំប្តីកុំឱ្យវាយនាងដៃធ្ងន់ៗពេកក្រែងស្លាប់ចោលកូនទាំង២នាក់ទៅ ។
លោកបញ្ជាក់ទៀតថា ប្តីប្រពន្ធនេះធ្លាប់ឈ្លោះប្រកែកគ្នាជាច្រើនលើកច្រើនសារមកហើយ ដោយសារតែប្តីប្រចណ្ឌប្រពន្ធ ហើយជួនកាលទៀតប្រពន្ធប្រចណ្ឌប្តី ហើយក៏វាយគ្នាទៅវិញទៅមក ដោយបានចូលធ្វើកិច្ចសន្យានៅក្នុងប៉ុស្តិ៍របស់លោក២-៣លើកមកហើយ តែនៅមិនរាងចាល រហូតមកដល់ពេលនេះបានវាយប្រពន្ធរហូតដល់រងរបួសធ្ងន់ថែមទៀង ។
ទោះបីជាយ៉ាងណា ខាងលោកនឹងសហការជាមួយមេភូមិដើម្បីហៅប្តីមកជួបធ្វើកិច្ចសន្យា បើនៅតែប្រចណ្ឌវាយធ្វើបាបប្រពន្ធឱ្យរងរបួសធ្ងន់ធ្ងរបែបនេះទៀត លោកនឹងរៀបចំសំណុំរឿងបញ្ជូនទៅតុលាការជាក់ជាមិនខាន ៕
ចែករំលែកព័តមាននេះ