ពង្រឹងអធិបតេយ្យ កម្ពុជាទុកឱសានវាទត្រឹមថ្ងៃ30 ធ្នូ ដល់ឧត្តមស្នងការសិទ្ធិមនុស្ស
រាជធានីភ្នំពេញ ៖ លោកប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានផ្ញើលិខិតផ្លូវការមួយច្បាប់ជូនចំពោះ
រាជធានីភ្នំពេញ ៖ លោកប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានផ្ញើលិខិតផ្លូវការមួយច្បាប់ជូនចំពោះ
រាជធានីភ្នំពេញ ៖ លោកប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានផ្ញើលិខិតផ្លូវការមួយច្បាប់ជូនចំពោះលោក Zeid Ra’ad Al Hussein ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សកាលពីថ្ងៃទី២២ វិច្ឆិកា កន្លងមកនេះដោយបានសម្តែងនូវការ ខកចិត្តចំពោះការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ។ ការខកចិត្តត្រូវបានកត់សម្គាល់ថាបានរំលោភម្តងហើយម្តងទៀតលើតួនាទីរបស់ខ្លួនដែលបាន
កំណត់នៅក្នុងអនុស្សារណៈនៃការយោគយល់គ្នា ។
សារលិខិតដដែលនេះក៏បានដាក់ឱសានវាទត្រឹមថ្ងៃ៣០ ធ្នូ ដល់ការិយាល័យឧត្តមស្នងការសិទ្ធិមនុស្សបញ្ជាក់ពីការទទួលយកអនុស្សារណៈនៃការយោគយល់គ្នាថ្មីមួយ ដោយផ្អែកលើគោលការណ៍គោរពអធិបតេយ្យ និងមិនជ្រៀតជ្រែកកិច្ចការផ្ទៃក្នុងរបស់កម្ពុជា ។
សារលិខិតបានសរសេរថា ៖ យោងលិខិតមុនៗរបស់ខ្ញុំ ខ្ញុំសូមសរសេរលិខិតមួយច្បាប់នេះផ្ញើជូនលោកដើម្បីបញ្ជាក់សារជាថ្មីម្តងទៀតពីជំហររបស់កម្ពុជាពាក់ព័ន្ធនឹងអនុស្សារណៈនៃការយោគយល់គ្នា (MoU) រវាងរាជរដ្ឋាភិបាលកម្ពុជា និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ដូចតទៅ៖
ជាមួយនឹងការប្តេជ្ញាចិត្តយ៉ាងម៉ឺងម៉ាត់ ដើម្បីប្រកាន់ខ្ជាប់នូវការគោរពប្រជាធិបតេយ្យនិង សិទ្ធិមនុស្សដូចមានចែងនៅក្នុងរដ្ឋធម្ម នុញ្ញនៃ ព្រះរាជាណាចក្រកម្ពុជា រាជរដ្ឋាភិបាលកម្ពុជាបាននិងកំពុងប្រកាន់យកយន្តការជាច្រើនសំដៅលើកកម្ពស់និងការពារសេរីភាពជាមូលដ្ឋាននៅក្នុង ដែលក្នុងនោះរួមមាន ការបន្តឱ្យមានវត្តមានអ្នកសរសេររបាយការណ៍ពិសេស ការត្រួតពិនិត្យឡើងវិញជាសកលតាមកាលកំណត់របស់ក្រុមប្រឹក្សាសិទ្ធិមនុស្ស ការអនុញ្ញាតឱ្យអង្គការក្រៅរដ្ឋាភិបាលអន្តរជាតិរាប់រយនិងបណ្តាញផ្សព្វផ្សាយសង្គម ។ល។ ដែលតួអង្គទាំងអស់នេះអាចដើរតួនាទីតាមដានផង និងផ្តល់ការប្រឹក្សាផងទាក់ទិន នឹងស្ថានភាពសិទ្ធិមនុស្សនៅកម្ពុជា ។
ម្យ៉ាងវិញទៀត ចាប់តាំងពីឆ្នាំ១៩៩៣ រាជរដ្ឋាភិបាលកម្ពុជា ក៏បានឯកភាពឱ្យមានវត្តមានការិយាល័យឧត្តមស្នងការអង្គការសហប្រជាជាតិទទួលសិទ្ធិមនុស្សនៅកម្ពុជាផងដែរ តាមរយៈកិច្ចព្រមព្រៀងទ្វេភាគីមួយ ហៅថា អនុស្សារណៈនៃការយោគយល់គ្នា រវាងរាជរដ្ឋាភិបាលកម្ពុជា និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស សម្រាប់អនុវត្តកម្មវិធីកិច្ចសហប្រតិបត្តិការបច្ចេកទេសស្តីពីសិទ្ធិមនុស្ស ហើយអនុស្សារណៈនេះបានបន្តសារជាថ្មីជាច្រើនលើករួចមកហើយ ។
ជាការគួរឱ្យសោកស្តាយ រាជរដ្ឋាភិបាលកម្ពុជា បានធ្វើការកត់សម្គាល់ប្រកបដោយការខកចិត្តជាខ្លាំង ដោយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាបាននិងកំពុងរំលោភម្តងហើយម្តងទៀតលើតួនាទីរបស់ខ្លួនដែលបានកំណត់នៅក្នុងអនុស្សារណៈនៃការយោគយល់គ្នានេះ ។ បើទោះបីជារាជរដ្ឋាភិបាលកម្ពុជាបានខិតខំប្រឹងប្រែងជំរុញកិច្ចសហប្រតិបត្តិការមួយនេះឱ្យដំណើរការទៅមុខដោយរលូន ប្រកបដោយន័យស្ថាបនា និងប្រសិទ្ធភាព ដោយឈរលើមូលដ្ឋានគោរពគ្នាទៅវិញទៅមកយ៉ាងណាក៏ដោយ ក៏ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា នៅតែបង្កើនសកម្មភាពរបស់ខ្លួនជ្រៀតជ្រែកចូលកិច្ចការផ្ទៃក្នុងរបស់កម្ពុជាដដែល ។ ជាងនេះទៅទៀត តំណាងនិងអ្នកនាំពាក្យរបស់ការិយាល័យនេះ បានបញ្ចេញឥរិយាបថព្រហើន និងមិនគោរពអធិបតេយ្យភាពកម្ពុជា ដែលជាទង្វើមិនអាចទទួលយកបាន និងជាការបំពានក្រមសីលធម៌ការទូត ដូចមានចែងនៅក្នុងមាត្រា៤១ (កថាខ័ណ្ឌ១ និង២) នៃអនុសញ្ញាទីក្រុងវីយែន ស្តីពីទំនាក់ទំនងការទូតឆ្នាំ១៩៦១ ។
លោកបានជ្រាបហើយថា អនុស្សារណៈនៃការយោគយល់គ្នាចុងក្រោយបំផុត ដែលអនុញ្ញាតឱ្យការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សមានប្រតិបត្តិការស្របច្បាប់នៅកម្ពុជា បានផុតសុពលភាពចាប់តាំងពីថ្ងៃទី៣១ ខែធ្នូ ឆ្នាំ២០១៥មកម្ល៉េះ ។ ទោះជារាជរដ្ឋាភិបាលកម្ពុជា មានសុច្ឆន្ទៈនិងការប្តេជ្ញាចិត្តម៉ឺងម៉ាត់ ក្នុងការជំរុញសិទ្ធិមនុស្សនិងនីតិរដ្ឋឱ្យរីកចម្រើនទៅមុខយ៉ាងណាក៏ដោយ ក៏ស្ថានភាពបែបនេះនឹងមិនត្រូវអនុញ្ញាតឱ្យកើតមានបន្តទៅមុខទៀតដោយគ្មានកាលកំណត់ពេលឡើយ ។
ក្នុងន័យនេះ រាជរដ្ឋាភិបាលកម្ពុជាបានសម្រេចចិត្តរង់ចាំរហូតដល់ថ្ងៃទី៣០ ខែធ្នូ ឆ្នាំ២០១៦ ឱ្យការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សបញ្ជាក់ពីការទទួលយកអនុស្សារណៈនៃការយោគយល់គ្នាថ្មីមួយ រវាងរាជរដ្ឋាភិបាលកម្ពុជា និងការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស ដោយផ្អែកលើមូលដ្ឋាននៃគោលការណ៍គោរពអធិបតេយ្យភាព និងមិនជ្រៀតជ្រែកកិច្ចការផ្ទៃក្នុងរបស់កម្ពុជា ដែលអនុលោមទាំងស្រុងតាមមាត្រា២ (កថាខណ្ឌ៧) នៃធម្មនុញ្ញអង្គការសហប្រជាជាតិ ។ បើមិនដូច្នេះទេ រាជរដ្ឋាភិបាលកម្ពុជានឹងមិនមានជម្រើសអ្វីផ្សេងក្រៅតែពីប្រើប្រាស់សិទ្ធិអធិបតេយ្យរបស់ខ្លួន សម្រេចលើអនាគតនៃវត្តមានរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ៕
ចែករំលែកព័តមាននេះ