ខេត្តបាត់ដំបង ៖ ច្រើនខែកន្លងមកហើយ ដែលមន្ត្រីពន្ធដារខិលខូចមួយចំនួនប្រចាំសាខាខេត្តបាត់ដំបង បានប្រើល្បិចទារថ្លៃសេវាក្រៅច្បាប់ចំនួន១០ដុល្លារ ជាថ្នូរនឹងការសរសេរលិខិតប្រកាសពន្ធ ជំនួសម្ចាស់អាហារដ្ឋាន ឬម្ចាស់អាជីវកម្ម ផ្សេងៗ ក្រោមហេតុ
ខេត្តបាត់ដំបង ៖ ច្រើនខែកន្លងមកហើយ ដែលមន្ត្រីពន្ធដារខិលខូចមួយចំនួនប្រចាំសាខាខេត្តបាត់ដំបង បានប្រើល្បិចទារថ្លៃសេវាក្រៅច្បាប់ចំនួន១០ដុល្លារ ជាថ្នូរនឹងការសរសេរលិខិតប្រកាសពន្ធ ជំនួសម្ចាស់អាហារដ្ឋាន ឬម្ចាស់អាជីវកម្ម ផ្សេងៗ ក្រោមហេតុ ផលថា ម្ចាស់សាមីទាំងនោះបំពេញមិនត្រឹមត្រូវតាមខ្លឹមសារដែលមាននៅក្នុងលិខិតប្រកាសពន្ធ ។ នេះបើតាមការទម្លាយឲ្យដឹងប៉ុន្មានថ្ងៃកន្លងទៅនេះ ពីម្ចាស់អាហារដ្ឋាន និងម្ចាស់អាជីវកម្មនានានៅក្នុងក្រុងបាត់ដំបង ។
ម្ចាស់អាហារដ្ឋានមួយនៅម្ដុំផ្សារថ្មីបាននិយាយនៅព្រឹកថ្ងៃទី២២វិច្ឆិកាថា កាលឆ្នាំមុន មន្ត្រីពន្ធដារបានមកទារលុយថ្លៃបង់ពន្ធដល់ផ្ទះ ហើយចេញបង្កាន់ដៃបង់ប្រាក់ឲ្យ តែឆ្នាំនេះពន្ធដារបានណែនាំឲ្យសរសេរលិខិតប្រកាសពន្ធ រួចកាន់យកទៅបង់ខ្លួនឯងនៅធនាគារ ឬនៅសាខាពន្ធដារខេត្ត ។ គាត់បានបំពេញកាតព្វកិច្ចនេះយ៉ាងល្អទៀងទាត់រាល់ខែ មិនដែលយឺតពេលមួយថ្ងៃទេ ប៉ុន្តែចុងក្រោយនេះ ស្រាប់តែមន្ត្រីពន្ធដារដែលទទួលការងារនេះ បែរជាស្ដីបន្ទោសគាត់ថា សរសេរបំពេញលើលិខិតប្រកាសពន្ធមិនត្រឹមត្រូវ ហើយទារថ្លៃសេវាពីគាត់១០ដុល្លារដោយអះអាងថា ចាំគេបំពេញឲ្យ ។
ម្ចាស់អាហារដ្ឋានរូបនេះបានបង្ហាញពីការខឹងយ៉ាងខ្លាំង ពេលគាត់រៀបរាប់អំពីល្បិចទារសេវាក្រៅច្បាប់របស់មន្ត្រីពន្ធដារនោះ ។ គាត់បាននិយាយទៀតថា គាត់បានសួរនាំម្ចាស់ហាង និងម្ចាស់អាជីវកម្ម ផ្សេងៗទៀតដែលជាប់ពន្ធដូចគាត់ ពួកគេសុទ្ធត្រូវមន្ត្រីពន្ធដាស្ដីបន្ទោសដូចៗគ្នាពីបញ្ហាសរសេរលើលិខិតប្រកាសពន្ធខុស បើទោះជាគាត់ប្រៀបធៀបនឹងលិខិតប្រកាសពន្ធដែលធ្វើ មុនៗត្រឹមត្រូវដូចគ្នាក្ដី ក៏មន្ត្រីពន្ធដារខិលខូចទាំងនោះស្ដីបន្ទោសថាខុសដដែល ។ ពោលគឺខុស ឬត្រូវស្រេចតែលើលោកមន្ត្រីពន្ធដារជាអ្នកថា ។ តាមពិតនេះជាការប្រើល្បិចដើម្បីចង់ទារសេវាក្រៅផ្លូវច្បាប់ចំនួន១០ដុល្លារសោះ ។
ស្ត្រីម្ចាស់ភោជនីយដ្ឋានមួយទៀតបាននិយាយថា «ខ្ញុំបានដឹងថាមានម្ចាស់អាហារដ្ឋាន ឬម្ចាស់អាជីវកម្មមួយចំនួនដែលជាប់ពន្ធ ពិតជាត្រូវមន្ត្រីពន្ធដារទារថ្លៃសេវាក្រៅច្បាប់១០ដុល្លារមែន ជាថ្នូរនឹងការធានារ៉ាប់រងជួយសរសេរលិខិត្រប្រកាសឲ្យ» ។ ប៉ុន្តែមន្ត្រីនោះបានប្រើល្បិច «ត្រីងៀតឆ្លៀតពង» នេះស្ដីបន្ទោសទៅលើម្ចាស់ហាង និងម្ចាស់អាជីវកម្មដទៃទៀត ដើម្បីទាមទារថ្លៃសេវា១០ដុល្លារដែរ បើទោះជាម្ចាស់សាមីទាំងនោះបានបំពេញបែបបទត្រឹមត្រូវអស់ហើយក្ដី ។ សូម្បីតែរូបខ្ញុំដែលបានបំពេញត្រឹមត្រូវតាមខ្លឹមសារក្នុងលិខិតប្រកាសពន្ធនោះដូចសព្វដង ហើយក៏ត្រូវមន្ត្រីពន្ធដារស្ដីបន្ទោសថា ធ្វើខុសដែរ »។
ស្ត្រីរូបនេះបញ្ជាក់ថា រូបគាត់ក៏ដូចម្ចាស់អាជីវកម្មនានាដែរបានព្យាយាមសួរនាំអំពីកំហុសឆ្គងមិនចេះចប់នេះ តែមន្ត្រីពន្ធដារមិនព្រមពន្យល់ឲ្យបានច្បាស់លាស់ទេ បែរជាឆ្លើយតប ដដែលៗដូច្នេះថា «ដើម្បីកុំឲ្យខុស ដដែលៗនាំខាតពេលឲ្យតែ១០ដុល្លារមកទុកឲ្យគេសរសេរឲ្យ» ។
ជុំវិញភាពមិនប្រក្រតីដែលកំពុងកើតឡើងក្នុងស្ថាប័នពន្ធដារខេត្តបាត់ដំបងនេះ លោក ជា ពិសិដ្ធ ប្រធានសាខាពន្ធដារខេត្ត បានបំភ្លឺប្រាប់កោះសន្តិភាព កាលពីព្រឹកថ្ងៃទី២៣ វិច្ឆិកាថា ជាគោលការណ៍របស់ច្បាប់ពន្ធដារ គឺម្ចាស់អាជីវកម្ម ឬម្ចាស់សហគ្រាសនានាដែលជាប់ពន្ធត្រូវបំពេញឯកសារ និងត្រូវយកប្រាក់ជាប់ពន្ធទៅបង់ដោយខ្លួនឯងនៅធនាគារ ឬនៅសាខាពន្ធដារខេត្ត ។ ប៉ុន្តែលោកបញ្ជាក់ថា មុននឹងតម្រូវឲ្យម្ចាស់អាជីវកម្មឬម្ចាស់ហាងដែលជាប់ពន្ធបំពេញឯកសារបង់ពន្ធដោយខ្លួនឯងនេះ គឺមន្រី្តជំនាញរបស់លោកបានណែនាំដល់អាជីវករទាំងអស់ច្រើនលើកហើយ ដើម្បីឲ្យពួកគាត់ចេះបំពេញឯកសារទាំងនោះ ។
ដូច្នេះបើមន្ត្រីរបស់លោកទាមទារលុយក្រៅច្បាប់ពីម្ចាស់អាជីវកម្មចំនួន១០ដុល្លារជាថ្នូរនឹងការជួយបំពេញឯងសារនោះ គឺជារឿងមិនត្រូវទេ ។ លោកជា ពិសិដ្ធ បញ្ជាក់ថា រឿងនេះប្រហែលអាចមានមែន ហើយក៏អាចមានហេតុផល២ គឺទី១-អាចម្ចាស់ហាង ឬម្ចាស់អាជីវកម្មដែលជាប់ពន្ធពឹងពាក់សុំឲ្យមន្ត្រីពន្ធដារជួយបំពេញឯកសារបង់ពន្ធទាំងនោះ រួចផ្ដល់សេវាក្រៅ និងទី២-អាចមន្ត្រីពន្ធដារឆក់ឱកាសទាមទារសេវាក្រៅច្បាប់ដើម្បីផល ប្រយោជន៍ ។
លោកប្រធានសាខាពន្ធដារខេត្ត ហាក់មិនមានប្រតិកម្មខ្លាំងទេទៅលើមន្ត្រីខិលខូច ដែលប្រព្រឹត្តខុសនោះបើទោះជាលោកទទួលស្គាល់ថា ពិតជាមានករណីនេះកើតឡើងមែនក្ដី ប៉ុន្តែលោកអះអាងថា លោកនឹងប្រជុំមន្ត្រីក្រោមឱវាទដើម្បីសួរនាំរឿងនេះ ។ លោកក៏បានផ្ដល់ជាមតិយោបល់ដែរថា មន្ត្រីពន្ធដារគួរតែព្យាយាមពន្យល់ ឬណែនាំឲ្យកាន់តែច្រើនដល់ម្ចាស់អាជីវកម្ម ឬម្ចាស់អាហារដ្ឋាននានាដែលជាប់ពន្ធឲ្យពួកគាត់ចេះបំពេញឯកសារដោយខ្លួនឯង ចៀសវាងបង្កឲ្យមានភាពមិនប្រក្រតី ធ្វើឲ្យប៉ះពាល់ដល់អង្គភាពពន្ធដារ ៕
ចែករំលែកព័តមាននេះ