រាជធានីភ្នំពេញ ៖ អាស៊ែបៃហ្សង់ ជាប្រទេសដែលមានសមត្ថភាពខ្ពស់ក្នុងវិស័យប្រេងកាត និងឧស្ម័ន និងជាប្រទេសទីមួយមានសមត្ថភាពផលិតប្រេងដែនគោក ដែលមានក្រុមហ៊ុនប្រកបដោយជំនាញ សមត្ថភាព និងប្រើប្រាស់បច្ចេកវិទ្យាទំនើប ហើយពេលនេះកំពុងមានចំណាប់អារម្មណ៍យ៉ាងខ្លាំងក្នុងការមកវិនិយោគលើវិស័យប្រេងកាត និងឧស្ម័ននៅកម្ពុជា ។ នេះបើយោងតាមខ្លឹមសារក្នុងជំនួបពិភាក្សាការងាររវាងលោក Anar Imanov ឯកអគ្គរដ្ឋទូតអាស៊ែបៃហ្សង់ប្រចាំកម្ពុជា កាលពីព្រឹកថ្ងៃទី២៣ វិច្ឆិកា កន្លងទៅ នៅទីស្តីការក្រសួងរ៉ែ និងថាមពល ជាមួយលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ។
ក្នុងកិច្ចពិភាក្សានោះ លោករដ្ឋមន្ត្រី ស៊ុយ សែម បានលើកឡើងពីការងារសំខាន់ៗរបស់ក្រសួងពាក់ព័ន្ធនឹងវិស័យរ៉ែ ប្រេងកាត និងថាមពលនៅកម្ពុជា និងបានបង្ហាញជំហរស្វាគមន៍ចំពោះក្រុមហ៊ុនមកពីអាស៊ែបៃហ្សង់ ដែលមានចំណាប់អារម្មណ៍មកវិនិយោគលើវិស័យប្រេងកាត និងឧស្ម័ននៅកម្ពុជា ។
ចំណែកលោកឯកអគ្គរដ្ឋទូតបានបញ្ជាក់ថា ៖ « អាស៊ែបៃហ្សង់ ជាប្រទេសដែលមានសមត្ថភាពខ្ពស់ក្នុងវិស័យប្រេងកាត និងឧស្ម័ន ហើយផ្គត់ផ្គង់៥០% ទៅកាន់ពិភពលោក និងជាប្រទេសទីមួយមានសមត្ថភាពផលិតប្រេងដែនគោក ដែលមានក្រុមហ៊ុនប្រកបដោយជំនាញ សមត្ថភាព និងប្រើប្រាស់បច្ចេកវិទ្យាទំនើបក្នុងវិស័យនេះ ។ ក្រុមហ៊ុនទាំងនោះមានចំណាប់អារម្មណ៍យ៉ាងខ្លាំងក្នុងការមកវិនិយោគនៅកម្ពុជា » ។
នេះជាបច្ច័យមួយយ៉ាងល្អ ស្របពេលដែលជំនាញ និងបទពិសោធន៍របស់កម្ពុជាក្នុងវិស័យនេះនៅមានកម្រិត លោករដ្ឋមន្ត្រី ស៊ុយ សែម បានសម្ដែងការរីករាយស្វាគមន៍ និងផ្តល់កិច្ចសហប្រតិបត្តិការជានិច្ចដល់វិនិយោគិនអាស៊ែបៃហ្សង់ ក្នុងការមកវិនិយោគនៅកម្ពុជា ដែលជួយជំរុញឲ្យវិស័យប្រេង និងឧស្ម័ននៅប្រទេសកម្ពុជាកាន់តែអភិវឌ្ឍ និងរីកចម្រើននាពេលអនាគត ។
គួររំឭកថា បច្ចុប្បន្ន កម្ពុជាក៏មានក្រុមហ៊ុនពីរកំពុងសហការគ្នា សាងសង់រោងចក្រចម្រាញ់ប្រេងកាត់ដែលមានទីតាំងនៅប៉ែកនិរតីនៃប្រទេសផងដែរ ដោយកាលពីថ្ងៃទី៤ ឧសភា ឆ្នាំ២០១៦ កន្លងមក ក្រុមហ៊ុនខេមបូឌាន ភេត្រូខេមីខល ខូអិលធីឌី (CPC) បានចុះហត្ថលេខាសហការវិនិយោគរួមគ្នាជាមួយក្រុមហ៊ុន CNPC Northeast Refining & Chemical Engineering របស់ចិន ក្នុងការសាងសង់រោងចក្រចម្រាញ់ប្រេងកាតរបស់ខ្លួន ដែលគ្រោងនឹងដំណើរការនៅចុងឆ្នាំ២០១៨ខាងមុខ ។ ទោះបីយ៉ាងណា គិតមកដល់ពេលនេះ ពុំទាន់ដឹងថាលទ្ធផលសម្រេចបានយ៉ាងណានោះទេ។ រោងចក្រចម្រាញ់ប្រេងកាតនេះ នឹងអនុវត្តនៅដំណាក់កាលទី១ ក្នុងទំហំទឹកប្រាក់៦២០លានដុល្លារអាមេរិក ដែលមានសមត្ថភាពផលិតបាន២លានតោនក្នុង១ឆ្នាំ ស្ថិតនៅស្រុកព្រៃនប់ ខេត្តព្រះសីហនុ លើផ្ទៃដីប្រមាណ៤០ហិកតា ក្នុងចំណោមផ្ទៃដីសរុប៤០០ហិកតា ។
រោងចក្រចម្រាញ់ប្រេងកាតនេះ ជាគម្រោងវិនិយោគលើវិស័យប្រេងឥន្ធនៈប្រកបដោយមហិច្ឆតាតែមួយគត់ មិនធ្លាប់មានពីមុននៅកម្ពុជាគិតមកដល់ពេលនេះ នឹងត្រូវប្រើទឹកប្រាក់បណ្តាក់ទុនប្រមាណ៣ពាន់លានដុល្លារអាមេរិក។ នៅពេលសាងសង់រួចជាស្ថាពរហើយ ដំណើរការពេញសមត្ថភាពរោងចក្រនេះអាចផលិតប្រេងបាន៥លានតោនក្នុង១ឆ្នាំ ។
គួរបញ្ជាក់ថា បច្ចុប្បន្ន កម្ពុជាបាននាំចូលនូវប្រេងឥន្ធនៈទាំងស្រុងពីប្រទេសវៀតណាម សិង្ហបុរី និងថៃ មកធ្វើការផ្គត់ផ្គង់រាប់លានតោនក្នុង១ឆ្នាំៗ ៕
ចែករំលែកព័តមាននេះ