អ្នកណាបំផ្លាញរូបសំណាកលោកតាក្រហមក ?
ខេត្តឧត្តរមានជ័យ ៖ ប្រជាពលរដ្ឋនៅស្រុកអន្លង់វែង មានការភ្ញាក់ផ្អើលយ៉ាងខ្លាំង ដោយសារតែមានជនមិនស្គាល់មុខ
ខេត្តឧត្តរមានជ័យ ៖ ប្រជាពលរដ្ឋនៅស្រុកអន្លង់វែង មានការភ្ញាក់ផ្អើលយ៉ាងខ្លាំង ដោយសារតែមានជនមិនស្គាល់មុខ
ខេត្តឧត្តរមានជ័យ ៖ ប្រជាពលរដ្ឋនៅស្រុកអន្លង់វែង មានការភ្ញាក់ផ្អើលយ៉ាងខ្លាំង ដោយសារតែមានជនមិនស្គាល់មុខ បានលួចបំផ្លាញរូបសំណាកលោកតាកែវ ពេជ្ររស្មី ឬអ្នកស្រុកតែងតែហៅថា លោកតាក្រហមក កាលពីយប់ថ្ងៃទី២៣ វិច្ឆិកា ឱ្យបាក់បែកខ្ទេចខ្ទី ។ រូបលោកតាក្រហមកនេះ ស្ថិតនៅចម្ងាយប្រមាណជា៥០ម៉ែត្រ ពីរូបសំណាកលោកយាយម៉ៅ នៅចំណុចចង្កេះភ្នំដងរែក ផ្លូវជាតិលេខ៦៧B ដែលជាផ្លូវឡើងទៅច្រកទ្វារអន្តរជាតិជាំ ក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ។
លោក ខៀវ ផន មេបញ្ជាការរងកងរាជអាវុធហត្ថស្រុកអន្លង់វែង ថា តាមការត្រួតពិនិត្យជាក់ស្តែងនៅកន្លែងកើតហេតុ រូបសំណាកលោកតាកែវពេជ្ររស្មី ឬលោកតាក្រហមកនេះ ត្រូវបានគេច្រានផ្តួល ឬរុញផ្តួល បណ្តាលឱ្យបាក់ត្រឹមប្រអប់កជើងរូបក៏ដួលបោកនឹងស៊ីម៉ងត៍នៅខាងក្រោម បណ្តាលឱ្យបែកបាក់ជាច្រើនកំណាត់ ។ រូបបដិមានេះមាន កម្ពស់ជិត២ម៉ែត្រ។ បានជាសង្ស័យថា មានគេរុញផ្តួលនេះ ដោយសារបំណែករូបបដិមានេះពុំឃើញមានស្នាមវាយបំបែកនោះទេ ។
លោកបានបញ្ជាក់ថា តាមការរៀបរាប់ពីក្មេងប្រុសម្នាក់សុំមិនបញ្ចេញឈ្មោះដែលនៅក្បែររូបសំណាកលោកយាយម៉ៅ ក្នុងអំឡុងពេលកើតហេតុ បាននិយាយថា ដោយសារយប់ងងឹតគេមើលពុំសូវច្បាស់ទេ តែបានឃើញមនុស្សប្រុស២នាក់ជិះម៉ូតូ១គ្រឿង ធុនC១០០ផលិត ឆ្នាំ២០១៥ ពណ៌ខ្មៅគ្មានកញ្ចក់ និងគ្មានស្លាកលេខ បានបើកទៅឈប់នៅអាស្រមលោកតាកែវពេជ្រេរស្មី ឬលោកតាក្រហមកស្រាប់មួយសន្ទុះក្រោយមក ក៏ឮស្នូរធ្លាក់ថ្មបាក់ ក្នុងអាស្រម បន្ទាប់មកបុរសទាំងពីរនាក់ ក៏បានបើកម៉ូតូចេញពីអាស្រមយ៉ាងលឿនចុះពីភ្នំដងរែកទៅដោយឆ្ពោះមកទីរួមស្រុកអន្លង់វែង ។
ស្ត្រីវ័យចំណាស់ម្នាក់ឈ្មោះ គង់ លាត អាយុ ៦៣ឆ្នាំ ដែលមានមុខរបរលក់ផ្លែឈើ ទៀនធូប និងគ្រឿងសែនព្រេនជាដើម ដែលស្នាក់នៅខ្ទមក្បែរអាស្រមលោកតាប្រមាណជា ៣០ម៉ែត្របានប្រាប់ឱ្យដឹងថា ក្រោយពេលគាត់បិទទ្វារតូបនៅអំឡុងម៉ោង៧យប់ ថ្ងៃទី២៣ វិច្ឆិកា គាត់បានឮស្នូរដូចថ្មរលំបាក់ដែរ តែគាត់មិនបានចាប់អារម្មណ៍ តែនៅពេលកូនប្រុសរបស់គាត់ត្រឡប់មកពីធ្វើការស៊ីឈ្នួលគេវិញ គាត់បានប្រើឱ្យទៅមើល ក៏ឃើញរូបសំណាកលោកតាបានដួលបាក់ខ្ទេចខ្ទីអស់ទៅហើយ ។
ស្ត្រីដដែលបានបញ្ជាក់ថា រូបសំណាកលោកតាកែវពេជ្រ ឬលោកតាក្រហមក និងអាស្រម ត្រូវបានកសាងនៅឆ្នាំ២០១១ ហើយនិងរូបសំណាកលោកយាយម៉ៅដែលនៅក្បែរគ្នា ដែលជាទីសក្ការៈបូជាដ៏ពូកែស័ក្តិសិទ្ធិ តែងតែមានប្រជាពលរដ្ឋ និងអ្នកធ្វើដំណើរឆ្លងកាត់ចូលទៅអុជធូបបន់ស្រន់ ដើម្បីសុំសេចត្តីសុខ ឬយកដង្វាយទៅថ្វាយសុំលេខឆ្នោតផងដែរ ។
លោក ហោជិន វីរៈយុទ្ធ អភិបាលស្រុកអន្លង់វែង ប្រាប់តាមទូរស័ព្ទឱ្យដឹងថា អាជ្ញាធរកំពុងតែថ្កោលទោសទៅលើអ្នកបំផ្លាញ ដែលបានកម្ទេចរូបសំណាកបដិមា ដែលជាវត្ថុគោរពបូជារបស់ប្រជាជនទូទៅ ហើយអាជ្ញាធរបានស្នើឱ្យប្រជាពលរដ្ឋមេត្តាចូលរួមសហការជាមួយអាជ្ញាធរ និងសមត្ថកិច្ច ដើម្បីឈានដល់ការវែកមុខ ។
នេះជាករណីទី២ហើយនៅឆ្នាំ២០១៦នេះ ដែលកាលពីខែតុលាកន្លងមក រូបសំណាកលោកតាស្រុះលើភ្នំដោះក្រមុំ ដែលជាទីគោរពបូជារបស់ជន្មានុជនទូទៅ ពិសេសបងប្អូនជនជាតិព្នង ក៏ត្រូវបានវាយបំផ្លាញដោយជនសសៃប្រសាទម្នាក់ ដែលជាអតីតគ្រូបង្រៀន ៕
ចែករំលែកព័តមាននេះ