រាជធានីភ្នំពេញ៖ ទុរេនត្រូវបានគេស្គាល់ថាជាស្តេចផ្លែឈើ និងមានតម្លៃល្អនៅលើទីផ្សារដែលកសិករដែលដាំដុះទុរេនអាចរកចំណូលបានល្អ ដោយសារតែការលក់បានកំរៃខ្ពស់ ។ តែយ៉ាងណាមិញ ម្ចាស់ចំការទុរេនបានពោលត្អូញត្អែរថា តម្លៃទីផ្សារទុរេន ទាំងការលក់ជាសាច់សុទ្ធ និងលក់ជាផ្លែ…
រាជធានីភ្នំពេញ៖ ទុរេនត្រូវបានគេស្គាល់ថាជាស្តេចផ្លែឈើ និងមានតម្លៃល្អនៅលើទីផ្សារដែលកសិករដែលដាំដុះទុរេនអាចរកចំណូលបានល្អ ដោយសារតែការលក់បានកំរៃខ្ពស់ ។ តែយ៉ាងណាមិញ ម្ចាស់ចំការទុរេនបានពោលត្អូញត្អែរថា តម្លៃទីផ្សារទុរេន ទាំងការលក់ជាសាច់សុទ្ធ និងលក់ជាផ្លែ គឹមានការធ្លាក់ចុះ បើធៀបនឹងឆ្នាំមុនៗ ដោយក្នុងនោះកត្តាដែលនាំតម្លៃទុរេនត្រូវបានក្រឡុកថ្លៃ គឺដោយសារតែមានការនាំចូលច្រើនពីប្រទេសជិតខាង។
លោក គីម សេង ដែលជាម្ចាស់ចំការទុរេន មួយរូបដែលបានដាំដុះទុរេននៅស្រុកស្ទឹងត្រង់ ខេត្តកំពង់ចាម បានឱ្យដឹងថា ទុរេនដែលពេញនិយមទទួលទានពីសំណាក់ប្រជាពលរដ្ឋខ្មែរ គឺទុរេនពូជឪខាក់ និងម៉នថង ដែលជាពូជមានកេរ៏ឈ្មោះល្បីយូរមកហើយ។ តែបញ្ហាចម្បងសម្រាប់រដូវកាលប្រមូលផលលក់ទុរេនក្នុងទីផ្សារនាឆ្នាំ២០០២នេះគឺតម្លៃក្រឡុកខ្លាំងណាស់ មានន័យថា លក់បានថោកជាងឆ្នាំមុនៗ ដោយសារតែមានការនាំចូលពីវៀតណាមនិងថៃ ហើយមានការលក់អនឡាញនូវទុរេននាំចូលបន្លំថារបស់ខ្មែរក្នុងតម្លៃថោកខ្លាំង។
«ជារួម ឆ្នាំនេះទីផ្សារទុរេនគឺក្រឡុកខ្លាំងមែនទែន ដោយសារតែមានការនាំចូលពីប្រទេសជិតខាងច្រើន ហើយយើងឃើញមានការលក់តាមអនឡាញក្នុងតម្លៃថោកមែនទែន តែមិនដឹងប្រភពច្បាស់លាស់ថាជាទុរេនមកពីខាងណានោះទេ ដែលធ្វើឱ្យយើងជាកសិករដាំដុះលក់មិនសូវបានថ្លៃ ខណៈតម្លៃប្រេងហក់ឡើងខ្ពស់ តែយើងបែរជាលក់បានថោកជាងឆ្នាំមុនៗ»។ នេះជាការលើកឡើងរបស់លោក គីម សេង។
ម្ចាស់ចំការទុរេនរូបនេះបានបន្តថា កាលពីឆ្នាំមុនៗ នារដូវប្រមូលផលខែ៥ និងខែ៦នេះ គឺតម្លៃទុរេនខ្មែរដាំដុះដោយកសិករខ្មែរ គឺលោកអាចលក់បានក្នុងតម្លៃ ២៨ ០០០ រៀល ក្នុងមួយគីឡូក្រាមសម្រាប់ការលក់រាយនូវទុរេនប្រភេទម៉នថងសាច់ទឹកគោស្ងូត និងការបោះដុំចាប់ពី៥០គីឡូឡើងតម្លៃ ២៤ ០០០ រៀល និងលក់ជាសាច់សុទ្ធតម្លៃ ១០ម៉ឺនរៀល ក្នុងមួយគីឡូក្រាម។ តែឆ្នាំនេះ លោកត្អូញត្អែរថា ការចំណាយលើការថែទាំទុរេន គឺខ្ពស់ខ្លាំងដោយសារតែការឡើងថ្លៃប្រេងសាំង តែតម្លៃទុរេនបែរជាលក់បានថោកជាងមុន ពោលសាច់សុទ្ធ លក់បានច្រើនបំផុតត្រឹម ៨ម៉ឺនរៀលក្នុងមួយគីឡូក្រាម និងបោះដុំលក់ទាំងផ្លែមូលចាប់ពី៥០គីឡូឡើងបានត្រឹមតែ ១៨ ០០០រៀលក្នុងមួយគីឡូក្រាម។
ចំណែកលោក វាសនា ដែលមានចំការទុរេននៅខេត្តកំពត បានពោលស្រដៀងគ្នានេះថា ឆ្នាំនេះដោយសារតែកសិករដាំដុះច្រើន ហើយរដូវប្រមូលផលឆ្នាំនេះគឺមានទុរេននាំចូលពីថៃ និងវៀតណាមច្រើនផង ធ្វើឱ្យលោកលក់មិនបានថ្លៃនោះទេ ខណៈចំណាយថ្លៃសាំងលើការបូមទឹកស្រោចដំណាំ រួមទាំងចំណាយថ្លៃសាំងលើការដឹកជញ្ជួនពីខេត្តមកភ្នំពេញ និងសេវាដឹកជូនអតិថិជនតាមផ្ទះបានកើនឡើងក្តី។
«ឆ្នាំនេះជាឆ្នាំទី៣ ដែលខ្ញុំប្រមូលផលពីចំការទុរេន ព្រោះត្រូវចំណាយពេលដាំនិងថែទាំយ៉ាងតិច៥ឆ្នាំទើបប្រមូលផលទុរេនបានខ្លះ តែឆ្នាំនេះខ្ញុំលក់មិនបានថ្លៃទេ ភ្ញៀវយកទៅលក់បន្តក៏តថ្លៃ អ្នកទិញទៅហូបផ្ទាល់ក៏ប្រាប់ថា ទុរេនកន្លែងផ្សេងលក់ថោកជាងយើងក៏មាន» ។ នេះជាការបញ្ជាក់របស់លោកវាសនា។
សម្រាប់លោកវាសនា បានបន្តថា ឆ្នាំនេះលោកប្រមូលផលបានជាង៥តោន តែក្នុងមួយគីឡូ (ផ្លែមូល) លក់បានត្រឹមតែ ១៤ ០០០ រៀលសម្រាប់ការបោះដុំជូនឈ្មួញដែលទទួលទិញចាប់ពី១០០ គីឡួក្រាមឡើងយកទៅលក់បន្ត ខណៈការលក់រាយជូនមិត្តភ័ក្ត្របានត្រឹមតែ ១៧ ០០០រៀលក្នុងមួយគីឡូក្រាមសម្រាប់ប្រភេទម៉នថងដែលជាប្រភេទសាច់ស្ងួតនិងពណ៌ទឹកដោះគោដែលមានសំបកស្តើង សាច់ក្រាស់ គ្រាប់តូច សាច់ព៌ណទឹកដោះគោ ស្ងួតខ្ទិះរមួតដែលដាំដុះលើខ្ពង់រាបដីក្រហមដែលត្រូវការនូវការថែទាំយ៉ាងពិសេសបំផុតដើម្បីបានផ្លែមូលៗល្អ។
«ឆ្នាំនេះទីផ្សារទុរេន គឺតម្លៃថោកណាស់ រកចំណេញបានតិចតួចបំផុត ព្រោះជួលកម្លាំងពលកម្មប្រមូលផលផង ថ្លៃទឹកជញ្ជួនក៏ខ្ពស់ ព្រោះសាំងឡើងថ្លៃ»។ លោកវាសនា បញ្ជាក់។ «ចង់បានតម្លៃទីផ្សារល្អ លុះត្រាតែបន្ថយការនាំចូលពីប្រទេសជិតខាង ព្រោះទុរនេខ្មែរអាចដាំដុះបានល្អដោយកសិករខ្មែរ ដូច្នេះចង់ឱ្យកសិករខ្មែរដាំដុះទុរេនរស់បាន លុះត្រាតែទប់ស្កាត់នូវការនាំចូលច្រើនពេកពីប្រទេសជិតខាង ព្រោះទុរេនាំចូលមានតម្លៃថោកណាស់ដែលយើងពិបាកនឹងប្រកួតប្រជែង ដោយសារតែយើងដាំដុះមិនប្រើជីគីមី គឺដាំដុះដោយបច្ចេកទេសត្រឹមត្រូវដើម្បីសុវត្ថិភាពអ្នកហូប»។
អ្នកនាងធីតា ដែលបម្រើការងារនៅក្រុមហ៊ុនឯកជនមួយនៅរាជធានីភ្នំពេញ ទទួលស្គាល់ថាតម្លៃទុរេនឆ្នាំនេះពិតជាធូរថ្លៃជាងឆ្នាំមុន ទាំងតម្លៃផ្លែមូលនិងការទិញជាសាច់សុទ្ធ។
អ្នកនាងធីតា ពោលឱ្យដឹងថា «រាល់ឆ្នាំ ខ្ញុំជាវពីម៉ូយរបស់ខ្ញុំជាអ្នកលក់ទុរេនយកមកពីកំពង់ចាម គឺតម្លៃ ៨ម៉ឺនរៀលក្នុងមួយគីឡូក្រាម ជាទុរេនសាច់សុទ្ធនិងប្រភេទម៉នថន។ ឆ្នាំនេះខ្ញុំទិញត្រឹមតែ៦ម៉ឺនរៀលតែប៉ុណ្ណោះ ហើយគាត់ដឹកជូនដោយមិនគិតថ្លៃទៀតពេលទិញចាប់ពី ២គីឡូក្រាមឡើង»។
«តែខ្ញុំឃើញអ្នកលក់អនឡាញខ្លះ លក់ទុរេនសាច់សុទ្ធតែ ៥ម៉ឺនរៀលក្នុងមួយគីឡូក្រាម តែខ្ញុំមិនហ៊ានទិញទេ ព្រោះមិនដឹងថាជាទុរេនខ្មែរ ឬជាទុរេនមកពីណានោះទេ»។ នេះជាការលើកឡើងរបស់អ្នកនាងធីតា៕
ចែករំលែកព័តមាននេះ