មហាជនទូទៅបាននិងកំពុងទទួលរងនូវផលប៉ះពាល់នៃបញ្ហាកង្វះជាតិអីុយ៉ូដក្នុងនោះ ស្ត្រីនិងកុមារគឺជាក្រុមប្រឈមខ្លាំងជាងគេដូចជា ភាពពិការខាងប្រាជ្ញា និងពិការរាងកាយដោយត្រូវក្រិនក្នុងកម្រិតកំពូល
មហាជនទូទៅបាននិងកំពុងទទួលរងនូវផលប៉ះពាល់នៃបញ្ហាកង្វះជាតិអីុយ៉ូដក្នុងនោះ ស្ត្រីនិងកុមារគឺជាក្រុមប្រឈមខ្លាំងជាងគេដូចជា ភាពពិការខាងប្រាជ្ញា និងពិការរាងកាយដោយត្រូវក្រិនក្នុងកម្រិតកំពូល ។ ផលអាក្រក់នៃបញ្ហាកង្វះជាតិអីុយ៉ូដ គឺធ្វើឲ្យខួរក្បាលទារកក្នុងផ្ទៃ ទារកទើបនឹងកើត និងកុមារតូចៗមិនមានការលូតលាស់បានដូចប្រក្រតី ។
អាហារដែលសម្បូរជាតិអីុយ៉ូដជាងគេគឺអាហារសមុទ្រមានដូចជា រុក្ខជាតិ សត្វ និងត្រីសមុទ្រ និងផលិតផលចំណីអាហារមួយចំនួនទៀត ។ អំបិលអីុយ៉ូដជាអាហារមួយក្នុងចំណោមអាហារទាំងឡាយដែលត្រូវការប្រើប្រាស់ជាប្រចាំ ។
អំបិលអីុយ៉ូដ គឺជាអំបិលធម្មតាដែលគេបន្ថែមជាតិអីុយ៉ូដ ។ អំបិលអីុយ៉ូដ មានរូបរាង រស់ជាតិ និងក្លិនដូចគ្នានឹងអំបិលធម្មតាបេះបិទ ហើយអាចប្រើប្រាស់ធ្វើអ្វីៗបានដូចគ្នាដែរ ។ អ្វីដែលខុសគ្នានោះគឺអំបិលអីុយ៉ូដមានអត្ថប្រយោជន៍ជាងអំបិលធម្មតា ព្រោះហេតុនេះហើយបានជាមានពាក្យស្លោកថា «ដើម្បីសុខភាពល្អ និងមានប្រាជ្ញាឈ្លាសវៃ ត្រូវប្រើអំបិលអីុយ៉ូដ» ។ ការបរិភោគអំបិលអីុយ៉ូដ ឬអាហារដែលសម្បូរទៅដោយជាតិអីុយ៉ូដ គឺអាចជួយការពារនិងកាត់បន្ថយបញ្ហាសុខភាពដូចជា ៖
-ពកក
-ខួរក្បាលទារកលូតលាស់យឺត(សមត្ថភាពរៀនសូត្រទន់ខ្សោយ)
-រាងការលូតលាស់មិនប្រក្រតី
-រលូតកូន កូនស្លាប់ក្នុងផ្ទៃ កូនកើតមិនគ្រប់ទម្ងន់ កូនកើតមិនគ្រប់ខែ
-អត្រាស្លាប់របស់កុមារមានកម្រិតខ្ពស់ដោយប្រព័ន្ធភាពសុំាចុះខ្សោយ
-បាត់បង់កម្លាំងពលកម្មនាំឲ្យសេដ្ឋកិច្ចគ្រូសារធ្លាក់ចុះ ។
ដើម្បីថែរក្សាជាតិអីុយ៉ូដនៅក្នុងអំបិលឲ្យបានគង់វង្សល្អ ត្រូវអនុវត្តតាមការណែនាំដូចខាងក្រោម៖
-ដាក់អំបិលអីុយ៉ូដនៅក្នុងថង់ប្លាស្ទិក ហើយចងមាត់ឲ្យជិត ឬដាក់ក្នុងកែវដែលមានគម្រប និងមួលភ្ជិត ឬទុកក្នុងក្រឡដែលមានគម្របល្អត្រឹមត្រូវ
-មិនត្រូវទុកអំបិលអីុយ៉ូដប៉ះនឹងកម្ដៅថ្ងៃខ្លាំងពេក ឬប៉ះផ្ទាល់ជាមួយនឹងពន្លឺព្រះអាទិត្យ
-មិនត្រូវទុកអំបិលអីុយ៉ូដនៅក្នុងអាកាសធាតុសើមជាពិសេសមិនឲ្យប៉ះទឹកភ្លៀង ។
លោកអ្នកគប្បីចាំថា ជាប្រការល្អគួរកុំអាលបរិភោគ ទំពាំង ដំឡូងមី ក្តួច ស្ពៃក្តោប ក្នុងពេលលោកអ្នកទទួលទានអាហារ ពីព្រោះវាអាចបង្អាក់ការបឺតស្រូបជាតិអីុយ៉ូដ ធ្វើឲ្យជាតិអីុយ៉ូដគ្មានគុណភាពសម្រាប់រាងកាយ ៕
ចែករំលែកព័តមាននេះ