រាជធានីភ្នំពេញ ៖ ក្រុមគោព្រៃកម្ពុជាបានបាត់បង់ឱកាសឡើងទៅវគ្គ៤ក្រុមចុងក្រោយ ឬវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ AFF Suzuki Cup 2016 បន្ទាប់ពីត្រូវក្រុមម្ចាស់ផ្ទះមីយ៉ាន់ម៉ាលត់យ៉ាងចាស់ដៃក្នុងលទ្ធផល១-៣
រាជធានីភ្នំពេញ ៖ ក្រុមគោព្រៃកម្ពុជាបានបាត់បង់ឱកាសឡើងទៅវគ្គ៤ក្រុមចុងក្រោយ ឬវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ AFF Suzuki Cup 2016 បន្ទាប់ពីត្រូវក្រុមម្ចាស់ផ្ទះមីយ៉ាន់ម៉ាលត់យ៉ាងចាស់ដៃក្នុងលទ្ធផល១-៣ ក្នុងជំនួបកាលពីល្ងាចថ្ងៃទី២៣ វិច្ឆិកា នៅកីឡដ្ឋាន Thuwunna YTC Stadium ស្ថិតក្នុងទីក្រុង Yangon ប្រទេសមីយ៉ាន់ម៉ា ធ្វើឱ្យអ្នកគាំទ្រសោកស្តាយ និងខកចិត្តយ៉ាងខ្លាំង ។
ក្រុមគោព្រៃកម្ពុជារកបាន១គ្រាប់មុនដោយកីឡាករ សុះ ស៊ូហាណា បន្ទាប់ពីកីឡាករ ចាន់ វឌ្ឍនាកា បញ្ជូនបាល់ឱ្យនៅនាទីទី១៤ ប៉ុន្តែត្រូវកីឡាករ Zaw Min Tun របស់ក្រុមមីយ៉ាន់ម៉ា រកបាន២គ្រាប់វិញនៅនាទីទី៣៥ និង៤០មុនចប់តង់ទី១ ។ ចូលដល់តង់ទី២ កីឡាករ Aung Thu របស់មីយ៉ាន់ម៉ារកបាន១គ្រាប់ទៀតនៅនាទីទី៥៦ មុនចប់ការប្រកួតពេញម៉ោង ។ ការបរាជ័យចំនួន២ប្រកួត ក្នុងចំណោម៣ប្រកួតនៅវគ្គនេះ ធ្វើឱ្យក្រុមគោព្រៃកម្ពុជាបាត់បង់ឱកាសទាំងស្រុង ក្នុងការឡើងទៅប្រកួតនៅវគ្គពាក់កណ្តាលផ្តាច់ព្រ័ត្រនៃពានរង្វាន់ខាងលើនេះ ។
ដោយឡែក នៅថ្ងៃនិងកីឡដ្ឋានដដែលមុនពេលក្រុមគោព្រៃកម្ពុជាជួបក្រុមម្ចាស់ផ្ទះមីយ៉ាន់ម៉ា ក្រុមវៀតណាម បានយកឈ្នះក្រុមម៉ាឡេស៊ី ១-០ ទាំងត្រដាបត្រដួស ។ គ្រាប់បាល់ជ័យជម្នះនេះរកបានដោយកីឡាករ Nguyên Trong Hoàng នៅតង់ទី២នាទីទី៨០ ខណៈតង់ទី១ក្រុមទាំងពីរបញ្ចប់ដោយលទ្ធផលស្មើគ្នា ០-០ ។
សម្រាប់ចំណាត់ថ្នាក់បណ្តោះអាសន្នបច្ចុប្បន្ន របស់ក្រុមស្ថិតក្នុងពូលB ក្រុមវៀតណាមឈរនៅកំពូលតារាងមាន៦ពិន្ទុ ក្រុមមីយ៉ាន់ម៉ាលេខ២មាន៣ពិន្ទុ ក្រុមម៉ាឡេស៊ីលេខ៣មាន៣ពិន្ទុ និងក្រុមកម្ពុជាស្ថិតនៅបាតតារាងដោយគ្មានពិន្ទុ។ ការប្រកួតលើកចុងក្រោយនៅក្នុងវគ្គនេះធ្វើឡើងនៅវេលាម៉ោង៦និង៣០នាទីល្ងាចថ្ងៃទី២៦ វិច្ឆិកា ដោយក្រុមគោព្រៃកម្ពុជា ត្រូវជួបក្រុមវៀតណាមនៅកីឡដ្ឋាន Wunna Theikdi Stadium ស្ថិតក្នុងទីក្រុង Naypyidaw ចំណែកក្រុមម៉ាឡេស៊ី ត្រូវជួបក្រុមមីយ៉ាន់ម៉ានៅកីឡដ្ឋាន Thuwunna YTC Stadium ស្ថិតក្នុងទីក្រុង Yangon ប្រទេសមីយ៉ាន់ម៉ា ៕
ចែករំលែកព័តមាននេះ