រាជធានីភ្នំពេញ ៖ ឃុន សំខាន់ មកពីក្លិបកងពលតូចលេខ៧០ និងផង់ សុភាព មកពីក្លិបតាឡីដំរីមានរិទ្ធ ត្រូវការ៣ពិន្ទុបន្ថែមទៀតដើម្បីបានឡើងទៅវគ្គបន្ត ខណៈការប្រកួតវគ្គសន្សំពិន្ទុដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាមនៅលើសង្វៀនស៊ីអិនស៊ី ថ្ងៃសៅរ៍ទី២៦ វិច្ឆិកា សប្តាហ៍នេះ ឈានចូលដល់ទីបញ្ចប់ហើយ ។
សម្រាប់ការប្រកួតលើកនេះ ឃុន សំខាន់ ត្រូវជួបកីឡាករថៃឈ្មោះនឹងត្រាក់កាន ក.កាមមន្តវ៉ាត ចំណែកឯផង់ សុភាព ត្រូវជួបប្រកួតជាមួយកីឡាករថៃឈ្មោះ ចមភព ស.វិរ៉ាវ៉ាន់ ។ ឃុន សំខាន់ និងកីឡាករថៃឈ្មោះ នឹងត្រាក់កាន ក.កាមមន្តវ៉ាត់ ប្រកួតបាន៣លើក ឈ្នះ២ ចាញ់១ ដូចគ្នា ។ កីឡាករទាំងពីរសុទ្ធតែមានបំណងស្វែងរក៣ពិន្ទុបន្ថែមដូចគ្នា ដូច្នេះគូនេះពិបាកវាយតម្លៃថានរណាខ្លាំងជាងនរណាណាស់ ព្រោះទាំងសងខាងហាក់មានសមត្ថភាពប្រហែលគ្នា ។
ផង់ សុភាព ដែលត្រូវជួបចមភព ស.វិរ៉ាវ៉ាន់ លើកនេះប្រហែលជាពិបាកបន្តិចហើយ ព្រោះកីឡាករថៃរូបនេះបានឡើងទៅវគ្គបន្តដោយស្វ័យប្រវត្តិតាមរយៈប្រកួតបាន៣លើកឈ្នះទាំង៣លើក។ ឯផង់ សុភាព វិញ ប្រកួតបាន៣លើកដូចគ្នាឈ្នះ២ ចាញ់១ ។ ចាំមើលផង់ សុភាពអាចទប់ទល់ជាមួយកីឡាករថៃរូបនេះបានដោយរបៀបណា?
ក្រៅពីគូដណ្ដើមខ្សែក្រវាត់ក៏មានការប្រកួតមិត្តភាពរវាងកីឡាករកម្ពុជានិងកម្ពុជា ចំនួន២គូទៀតផងដែរ ដូចជាកីឡាករ មាឃ សុវណ្ណារ៉ា មកពីក្លិបរាជសីហ៍ខេត្តរតនៈគីរី ប្រកួតជាមួយកីឡាករ ងឿន វិចិត្ត មកពីក្លិបតាព្រហ្មមានជ័យ និងកីឡាករ រិន សារដ្ឋ មកពីក្លិបខេត្តព្រៃវែង ប្រកួតជាមួយកីឡាករ រឿង សារ័ត្ន មកពីក្លិបកងទ័ពពិសេសឆ័ត្រយោង៩១១ ។
ដោយឡែកនៅលើសង្វៀនទូរទស្សន៍ស៊ីធីអិននាថ្ងៃសៅរ៍ដដែលក៏មានការប្រកួតលក្ខណៈមិត្តភាពអន្តរជាតិរវាងកីឡាករកម្ពុជា-ថៃផងដែរ ។ កីឡាករ ភិន សុទី មកពីក្លិបអប់រំកាយស្រុកអន្លង់វែង ប្រកួតជាមួយកីឡាករថៃឈ្មោះឃុំស្នេហ៍ ស.វិរ៉ាវ៉ាន់ ក្នុងប្រភេទទម្ងន់៦៥គីឡូក្រាម ខណៈកីឡាករបារាំងរបស់ក្លិបតាព្រហ្មមានជ័យឈ្មោះBidaut Derek ប្រកួតជាមួយកីឡាករថៃឈ្មោះភុតណយ ស.វិរ៉ាវ៉ាន់ ក្នុងប្រភេទទម្ងន់៦៥គីឡូក្រាម ។
ចំណែកគូប្រកួតមិត្តភាពធម្មតាវិញមានកីឡាករ ទេស សុខហេង មកពីក្លិបកងពលតូចលេខ៧០ ប្រកួតជាមួយកីឡាករវ៉ិក ឈាង មកពីសមាគមកីឡាប្រដាល់ក្រសួងការពារជាតិ ។ កីឡាករ ហ៊ែល វ៉ា មកពីក្លិបឃ្លាំងមឿងកីឡា ប្រកួតជាមួយកីឡាករ ជ័យ ប៊ុនសង់ មកពីក្លិបគីសែមានរិទ្ធ ខណៈកីឡាករម៉ឺន ដា មកពីក្លិបខ្លារខិនមានរិទ្ធ ប្រកួតជាមួយគង់ ហូវ មកពីសមាគមកីឡាប្រដាល់ក្រសួងការពារជាតិ ។
នៅលើសង្វៀនទូរទស្សន៍ស៊ីអិនស៊ី ថ្ងៃអាទិត្យទី២៧ វិច្ឆិកា មានទាំងអស់៦គូ ។ គូទី១ កីឡាករ ពីន ណាថៃ មកពីក្លិបអប់រំកាយស្រុកអន្លង់វែង ប្រកួតជាមួយកីឡាករហូ សុភា មកពីក្លិបឃ្លាំងមឿងកីឡា ។ កីឡាករ ឡុង ខេត្ត មកពីក្លិបខ្លារខិនមានរិទ្ធ ប្រកួតជាមួយសិទ្ធ លីដា មកពីក្លិបសាមគ្គីកូនខ្មែរ ។ កីឡាករ អាន ទាវ មកពីក្លិបសុភានូមានជ័យ ប្រកួតជាមួយផា ផាន់ណាក់ មកពីក្លិបសាលវ័ន្តកីឡា ។ កីឡាករ ផាន រះ មកពីក្លិបតាព្រហ្មមានជ័យ ប្រកួតជាមួយកីឡាករ តាំង សីហា មកពីក្លិបកងពលតូចលេខ៧០ ។
កីឡាករ ចាន់ សំអាត មកពីក្លិបអប់រំកាយស្រុកអន្លង់វែង ប្រកួតជាមួយផាន់ សារុន មកពីក្លិបគជសារកីឡា ខណៈគូប្រកួតចុងក្រោយកីឡាករ ភឿ វ៉ាន់ឆ័យ មកពីក្លិបកងពលតូចលេខ៧០ ប្រកួតជាមួយនួន រ៉ាថេន មកពីក្លិបតាឯកមានរិទ្ធ ៕
ចែករំលែកព័តមាននេះ