ខេត្តបន្ទាយមានជ័យ ៖ នារីម្នាក់បានស្លាប់ក្នុងថ្លុកឈាម និងយុវជនម្នាក់ទៀតរងរបួសធ្ងន់ ហើយត្រូវគេបញ្ជូនទៅសង្គ្រោះនៅមន្ទីរពេទ្យបង្អែកមិត្តភាពកម្ពុជា-ជប៉ុននៅស្រុកមង្គលបូរី បន្ទាប់ពីមានហេតុការណ៍គ្រោះថ្នាក់ចរាចរណ៍ កាលពីវេលាម៉ោង១១ និង៣០នាទីយប់ថ្ងៃទី២១ វិច្ឆិកា ស្ថិតនៅលើកំណាត់ផ្លូវជាតិលេខ៥ ក្នុងទីប្រជុំជនត្រង់ចំណុចផ្លូវចូលពន្ធនាគារខេត្ត ភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ រវាងម៉ូតូនិងរថយន្ត ។
ប្រភពឱ្យដឹងថា នារីដែលស្លាប់ឈ្មោះអ៊ិន គន្ធា អាយុ២១ឆ្នាំ មានទីលំនៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ និងម្នាក់អ្នករងរបួសធ្ងន់ឈ្មោះសាមុត ចក់ អាយុ២០ឆ្នាំ រស់នៅភូមិបាណយ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ជិះម៉ូតូម៉ាកហុងដា MSX ពណ៌.ស ពាក់ស្លាកលេខប.មានជ័យ 1N.4622 ។
លោកនាយរងការិយាល័យបានបញ្ជាក់ថា មុនពេលកើតហេតុ អ្នកជិះម៉ូតូធ្វើដំណើរពីខាងកើតទៅលិច ពេលទៅដល់ចំណុចគ្រោះថ្នាក់បានបើកឡើងជែង ជាមួយរថយន្ត១គ្រឿងម៉ាកហ៊ីយ៉ាន់ដាយ ពណ៌.ស ប្រភេទដឹកទំនិញធុនធំដឹកខ្សាច់ ពាក់ស្លាកលេខកំពង់ធំ3A.1248 (អ្នកបើកបររត់គេចខ្លួនបាត់) កំពុងធ្វើដំណើរពីខាងមុខ ក្នុងទិសដៅស្របទិសគ្នា ។
ពេលម៉ូតូជែងនោះ ក៏ជ្រុលបុករថយន្ត១គ្រឿង ម៉ាកតូយ៉ូតា ពណ៌ស្ពៃជ្រក់ (ដោយអ្នកបើកបាត់ដែរ) កំពុងធ្វើដំណើរបញ្ច្រាសទិសគ្នា បណ្តាលឱ្យម៉ូតូដួល អ្នកបើកម៉ូតូ និងអ្នករួមដំណើរចូលក្រោមរថយន្តធំ ហើយត្រូវកង់រថយន្តទី២កិនទាំងម៉ូតូ និងមនុស្សតែម្តង រួចបើកហួសប្រមាណ១០០ម៉ែត្រ បានរថយន្តឈប់ខាងស្តាំដៃ អ្នកបើករថយន្តគេចខ្លួនអស់ ។
បន្ទាប់មក រថយន្ត១គ្រឿងទៀតម៉ាកហ៊ីយ៉ាន់ដាយ ពណ៌ក្រហម ប្រភេទដឹកអ្នកដំណើរធុនធំ ពាក់ស្លាកលេខភ្នំពេញ 3C.7287 បើកបរដោយឈ្មោះគូ ចាន់សុភាព ភេទប្រុស អាយុ២៦ឆ្នាំ នៅភូមិសិរីសុខា ឃុំក្រែក ស្រុកពញាក្រែក ខេត្តកំពង់ចាម (ត្រូវបានចាប់ខ្លួន) ធ្វើដំណើរពីកើតទៅលិច មើលពុំឃើញពីចំងាយ ទៅជាន់អ្នករួមដណើរបន្ថែមទៀតបណ្តាលឲ្យស្លាប់ ។
ចែករំលែកព័តមាននេះ