អតីតគ្រូបង្រៀនជាប់កិច្ចសន្យាម្នាក់ មានសតិមិនប្រក្រតី បានយកកាំបិតប៉័ងតោ កា.ប់ប្រ.ហារទៅលើបងថ្លៃប្រុសរបស់ខ្លួន បណ្ដាលឲ្យរងរបួសធ្ងន់។ ហេតុការណ៍នោះ
ខេត្តត្បូងឃ្មុំ ៖ អតីតគ្រូបង្រៀនជាប់កិច្ចសន្យាម្នាក់ មានសតិមិនប្រក្រតី បានយកកាំបិតប៉័ងតោ កា.ប់ប្រ.ហារទៅលើបងថ្លៃប្រុសរបស់ខ្លួន បណ្ដាលឲ្យរងរបួសធ្ងន់។ ហេតុការណ៍នោះបានកើតឡើងនៅវេលាម៉ោង២០និង៣០នាទីយប់ ថ្ងៃទី១៨ ខែមិថុនា ឆ្នាំ២០២២ នៅចំណុចផ្ទះឈ្មោះសឹម ញ៉ ភេទស្រី អាយុ៧៣ឆ្នាំ ស្ថិតនៅក្នុងភូមិអណ្ដូងពក ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ ដែលបង្កដោយជនសង្ស័យម្នាក់ឈ្មោះ សាន ម៉ារីណា ភេទស្រី អាយុ៣៥ឆ្នាំ ជាតិខ្មែរ មានទីលំនៅភូមិ-ឃុំកើតហេតុ។ ហើយក្រោយពេលកើតហេតុ កម្លាំងប៉ុស្តិ៍រដ្ឋបាលមូលដ្ឋាន បានចុះទៅឃាត់ខ្លួនស្ត្រីរូបនោះ បញ្ជូនមកសួរនាំផងដែរ។
លោកវរសេនីយ៍ឯក សាំ ហេង អធិការនគរបាលស្រុកត្បូងឃ្មុំ បានប្រាប់ឲ្យដឹងថា ជនរងគ្រោះខាងលើមានឈ្មោះ ព្រុំ ថុន ភេទប្រុស អាយុ៥៧ឆ្នាំ ជាជនជាតិខ្មែរ រស់នៅភូមិ-ឃុំកើតហេតុ (ត្រូវជាបងថ្លៃ) រងរបួសចំនួន៤កន្លែង ៖ ១- ត្រូវស្មាមួយកន្លែង ២- ត្រូវសៀតផ្កាមួយកន្លែង ៣-ត្រូវចំលើក្បាលមួយកន្លែង និង៤- ត្រូវក.ផ្នែកខាងក្រោយមួយកន្លែង (កម្រិតធ្ងន់) ខណៈពេលជនរងគ្រោះអង្គុយលើកៅអីនៅក្រោមផ្ទះ កំពុងតែលេងទូរស័ព្ទ។
លោកអធិការនគរបាលស្រុកត្បូងឃ្មុំបន្តឲ្យដឹងទៀតថា ជនរងគ្រោះត្រូវបានក្រុមគ្រួសារយកទៅព្យាបាលនៅមន្ទីរពេទ្យខេត្តត្បូងឃ្មុំ ។ ហើយបន្ទាប់ពីទទួលបណ្តឹងនៅយប់ថ្ងៃដដែល ដោយបានការឯកភាពពីលោកឧត្តមសេនីយ៍ស្នងការ និងការសម្របសម្រួលពីលោក ហាក់ សៀកលីម ព្រះរាជអាជ្ញារង នៃអយ្យការអមសាលាដំបូងខេត្តត្បូងឃ្មុំ, កម្លាំងជំនាញនៃអធិការដ្ឋាននគរបាលស្រុកត្បូង សហការជាមួយកម្លាំងប៉ុស្តិ៍នគរបាលរដ្ឋបាលស្រឡប់ បានចាត់ការជាបន្ទាន់ចុះដល់កន្លែងកើតហេតុ និងធ្វើការពិនិត្យ ឃាត់ខ្លួនបានជនសង្ស័យឈ្មោះ សាន ម៉ារីណា ខាងលើ ព្រមទាំងដកហូតវត្ថុតាងកាំបិតប៉័ងតោចំនួន០១ រួចបញ្ជូនជនសង្ស័យមកអធិការដ្ឋាននគរបាលស្រុកត្បូងឃ្មុំតែម្តង។
សូមបញ្ជាក់ថា ជនសង្ស័យជាប្អូនថ្លៃរូបនេះ ពីមុនជាគ្រូបង្រៀនជាប់កិច្ចសន្យា តែក្រោយមក ជំងឺបានយាយីមកលើរាងកាយ ទើបធ្វើឲ្យស្ត្រីរូបនេះលាឈប់ពីគ្រូបង្រៀន ដោយសារតែមានសតិមិនប្រក្រតី ដែលគិតរហូតមកដល់ពេលនេះ គឺជិត១០ឆ្នាំមកហើយ។
ហើយនៅចំពោះមុខសមត្ថកិច្ច ស្ត្រីប្អូនថ្លៃដែលជាប់ចោទបានឆ្លើយសារភាពថា មូលហេតុដែលកា.ប់បងថ្លៃនេះ គឺដោយសារតែជនរងគ្រោះបានបបួលគាត់ចង់អីៗ… ដោយមើលឃើញនូវទង្វើបែបនេះ ក៏សម្រេចកា.ប់បងប្រុសថ្លៃតែម្ដង។
អធិការនគរបាលស្រុកត្បូងឃ្មុំ បានបញ្ជាក់ថា នៅពេលដែលបញ្ជូនស្ត្រីសង្ស័យមកដល់អធិការនគរបាលស្រុក មិនមានការអន្តរាគមន៍ ដើម្បីសុំឲ្យជនជាប់ចោទរួចពិរុទ្ធនោះទេ ហើយក៏មិនមានលិខិតបញ្ជាក់ពីមន្ទីរពេទ្យណាមួយដែលថា ស្ត្រីរូបនេះមានភាពមិនប្រក្រតីដែរ។ដោយសារគ្រួសារជនរងគ្រោះ បានឲ្យបញ្ជូនជនដៃដល់ចាត់ការតាមច្បាប់៕
ចែករំលែកព័តមាននេះ