ខេត្តព្រះសីហនុ ៖ ការជួយគាំទ្រផ្នែកសង្គម និងសកម្មភាពពង្រឹងសិទិ្ធជាម្ចាស់ដល់ស្ត្រី ក្នុងការបង្កើនប្រាក់ចំណូលនៅសហគមន៍ គឺជាការឆ្លុះបញ្ចាំងឲ្យឃើញពីឆន្ទៈដ៏ធំធេងក្នុងការចូលរួមចំណែកអភិវឌ្ឍន៍ប្រទេសកម្ពុជា ។ នេះបើយោងតាមប្រសាសន៍លោកជំទាវ ហៀក ហ៊ីមុល្លី អភិបាលរងខេត្ត ក្នុងឱកាសបើកសិក្ខាសាលា ស្តីពីសមិទ្ធផល និងការផ្តល់រង្វាន់ដល់គម្រោងពង្រឹងសហគ្រិនស្ត្រីក្នុងខេត្ត របស់ក្រុមហ៊ុនគ្រីសអេនើជី (អប្សរា) លីមីធីត នាព្រឹកថ្ងៃទី២២ វិច្ឆិកា ។
លោកជំទាវ ហៀក ហ៊ីមុល្លី គូសបញ្ជាក់ថា រាជរដ្ឋាភិបាលកម្ពុជាបានផ្តោតលើការពង្រីកឱកាសសេដ្ឋកិច្ចដល់ស្ត្រី និងផ្តល់ការគាំទ្រដល់ស្ត្រី ក្នុងការបង្កើនប្រាក់ចំណូលដល់គ្រួសាររួមមាន ការបង្កើតមជ្ឈមណ្ឌលអភិវឌ្ឍន៍ស្ត្រីនៅខេត្តមួយចំនួនដើម្បីផ្តល់នូវជំនាញវិជ្ជាជីវៈ និងសេវាអភិវឌ្ឍន៍អាជីវកម្មជូនស្ត្រី ។ ជាងនេះទៀត រាជរដ្ឋាភិបាលកម្ពុជាបានកៀងគរការចូលរួមពីបណ្តាដៃគូពាក់ព័ន្ធពីស្ថាប័នរដ្ឋ វិស័យឯកជន និងដៃគូអភិវឌ្ឍន៍ ដើម្បីសម្រេចបាននូវយុទ្ធសាស្ត្រសំខាន់ពាក់ព័ន្ធនឹងការបង្កើនភាពអង់អាចផ្នែកសេដ្ឋកិច្ចដល់ស្ត្រី រួមមាន ៖
-ការពង្រីកជំនាញវិជ្ជាជីវៈដល់ស្ត្រីទៅតាមតម្រូវការទីផ្សារ ។
-ការអភិវឌ្ឍសហគ្រាសខ្នាតតូច និងមធ្យមសម្រាប់ស្ត្រី ។
-ការបង្កើនជីវភាពរស់នៅតាមជនបទ ជាពិសេស ស្ត្រី ។
ការជួយគាំទ្រផ្នែកសង្គមនាពេលនេះ បានឆ្លុះបញ្ចាំងឲ្យឃើញពីឆន្ទៈដ៏ធំធេងក្នុងការចូលរួមចំណែកអភិវឌ្ឍន៍ប្រទេសកម្ពុជា ជាពិសេស ការបង្កើនភាពអង់អាចផ្នែកសេដ្ឋកិច្ចដល់ស្ត្រី ផ្តល់ការគាំទ្រដល់ស្ត្រីក្នុងការបង្កើនប្រាក់ចំណូលដល់គ្រួសារ និងការអភិវឌ្ឍអាជីវកម្មខ្នាតតូច ដែលនេះជាអាទិភាពមួយក្នុងចំណោមអាទិភាពជាច្រើនទៀតរបស់រាជរដ្ឋាភិបាលកម្ពុជា ហើយក៏ជាផ្នែកមួយនៃការទទួលខុសត្រូវក្នុងសង្គមរបស់ក្រុមហ៊ុនគ្រីសអេនើជី ផងដែរ ។ ដូចនេះ តាមរយៈសិក្ខាសាលា គឺមានសារសំខាន់ខ្លាំងណាស់សម្រាប់បងប្អូនជាស្ត្រី និងអ្នកចូលរួមទាំងអស់ជាក្រុមពង្រឹងសិទ្ធិជាម្ចាស់ដល់ស្ត្រី គណៈកម្មការប្រឹក្សាយោបល់ស្ត្រីសន្សំប្រាក់ និងអាជីវកម្មក្រុមមកជួបជុំគ្នាដើម្បីចែករំលែកបទពិសោធន៍ និងរៀនសូត្រពីគ្នាទៅវិញទៅមក ព្រមទាំងបង្ហាញពីបញ្ហាប្រឈម និងការដំណោះស្រាយនានាដែលបានកើតទ្បើងចំពោះក្រុមរបស់ខ្លួន ។
លោកស្រី ហ៊ីណា អាយចាស៍ ប្រធានផ្នែកបរិស្ថាន សុខភាព សុវត្ថិភាព និងសន្តិសុខ និងជាអ្នកគ្រប់គ្រងកម្មវិធីទទួលខុសត្រូវផ្នែកសង្គមរបស់ក្រុមហ៊ុនអេនើជី ប្រចាំប្រទេសសិង្ហបុរី បានថ្លែងថា អេនើជី គឺជាក្រុមហ៊ុនប្រេង និងឧស្ម័នឯករាជ្យមួយនៅក្នុងតំបន់អាស៊ីអាគ្នេយ៍។ យើងបានមកធ្វើការនៅក្នុងប្រទេសកម្ពុជាតាំងពីឆ្នាំ២០១០មកម្ល៉េះ ហើយបច្ចុប្បន្ន យើងគឺជាប្រតិបត្តិករនៃប្លុកអា ដែលមានទីតាំងស្ថិតនៅប្រមាណជាង១៧៥គីឡូម៉ែត្រពីខេត្តព្រះសីហនុ ជាកន្លែងដែលយើងមានគម្រោង និងអភិវឌ្ឍការដ្ឋានប្រេងអប្សរា ។
ក្រុមហ៊ុនគ្រីសអេនើជីបានប្តេជ្ញាចិត្តចំពោះប្រទេសកម្ពុជា ហើយមានបំណងក្លាយជាក្រុមហ៊ុនមួយទទួលខុសត្រូវចំពោះសហគមន៍ ។ យើងបានបង្កើតដៃគូជាមួយអង្គការនានា ដើម្បីធ្វើឲ្យគុណភាពជីវិតរស់នៅរបស់ជនងាយរងគ្រោះមានភាពល្អប្រសើរឡើង និងជួយកសាងសហគមន៍ឲ្យមានភាពរឹងមាំក្នុងខេត្តព្រះសីហនុ ក្រោមការដឹកនាំរបស់ថ្នាក់ដឹកនាំកម្ពុជា ៕
ចែករំលែកព័តមាននេះ