អ្នកប្រដាល់អាជីពហ្វ៊ីលីពីនវ័យ៣៧ឆ្នាំ Manny Pacquiao បាននិយាយទៅកាន់អ្នកសារព័ត៌មានថា រូបលោកចង់ជួបអ្នកប្រដាល់មិនដែលចាញ់របស់អាមេរិកវ័យ៣៩ឆ្នាំ Floyd Mayweather លើសង្វៀន
អ្នកប្រដាល់អាជីពហ្វ៊ីលីពីនវ័យ៣៧ឆ្នាំ Manny Pacquiao បាននិយាយទៅកាន់អ្នកសារព័ត៌មានថា រូបលោកចង់ជួបអ្នកប្រដាល់មិនដែលចាញ់របស់អាមេរិកវ័យ៣៩ឆ្នាំ Floyd Mayweather លើសង្វៀនម្តងទៀត ក្រោយពីយកឈ្នះកីឡាករJessie Vargas ក្នុងជំនួបដណ្តើមខ្សែក្រវាត់ទម្ងន់មធ្យមពិភពលោកពីស្ថាប័នប្រដាល់ WBO កាលពីថ្ងៃទី៦ វិច្ឆិកា កន្លងទៅ ។
Pacquiao បន្ថែមថា ជ័យជម្នះលើកីឡាករ Jessie Vargas ធ្វើឱ្យរូបគេមានជំនឿចិត្តខ្ពស់ដើម្បីសងសឹកជាមួយ Mayweather ដែលខ្លួនបានចាញ់ក្នុងការប្រកួតប្រចាំសតវត្សរ៍ (Fight of Century) កាលពីឆ្នាំមុន ។
ទោះជាយ៉ាងណាក៏ដោយ អ្នកប្រដាល់មិនដែលស្គាល់ពាក្យថាចាញ់Mayweather បានបោះពាក្យសម្តីថា រូបគេមិនទាន់មានគម្រាងឡើងសង្វៀនវិញទេ ពោលគឺចង់សម្រាក និងមានពេលវេលាសម្រាប់ខ្លួនឯងឱ្យបានច្រើន ។ កីឡាករហ្វ៊ីលីពីនដែលធ្លាប់ប្រកាសក្តែងៗថាចូលនិវត្តន៍ជាផ្លូវការបន្ទាប់ពីយកឈ្នះកីឡាករអាមេរិកTimothy Bradley និងមុនពេលចូលកាន់តំណែងជាសមាជិកព្រឹទ្ធសភារបស់ហ្វ៊ីលីពីនបានអញ្ជើញ Mayweather ចូលរួមទស្សនាការប្រកួតរបស់គេនិងJessie Vargas ។
Pacquiao នៅតែមានជំនឿចិត្តលើជំនាញអាជីពប្រដាល់របស់គេយ៉ាងខ្លាំងដោយផ្តល់ដំបូន្មានដល់អ្នកប្រដាល់ជំនាន់ក្រោយថា អ្វីដែលអ្នកត្រូវការគឺវិន័យ និងការខិតខំប្រឹងប្រែងដើម្បីជ័យជម្នះដ៏ត្រចះត្រចង់សម្រាប់ខ្លួនឯង និងមនុស្សនៅជុំវិញខ្លួន ។ និយាយកាលពីខែតុលាកន្លងទៅ Pacquiao ប្រកាសថា រូបលោកនឹងមិនទៅណាឆ្ងាយពីសង្វៀននោះទេពោលគឺលោកចង់ធ្វើជាសមាជិកព្រឹទ្ធសភាហ្វ៊ីលីពីនដំបូងគេក្នុងអាជីពប្រដាល់ដែលក្លាយជាជើងឯកពិភពលោក ៕
ចែករំលែកព័តមាននេះ