ខេត្តកណ្តាល ៖ ក្រុមចោរឆ.ក់យ៉ាងសកម្មត្រូវបាននគរបាលស្រុកអង្គស្នួល ក្របូចជាប់បានហើយ បន្ទាប់ពីធ្វើសកម្មភាពឆ.ក់ទូរស័ព្ទពីពលរដ្ឋបានសម្រេចជាច្រើនលើក ដែលហេតុការណ៌នេះបានកើតឡើងនៅវេលាម៉ោង១៥និង៥០នាទី ថ្ងៃទី១៧ ខែមិថុនា ឆ្នាំ២០២២ តាមបណ្ដោយផ្លូវជាតិលេខ៤ ភូមិត្រពាំងពើក ឃុំពើក ស្រុកអង្គស្នួល ខេត្តកណ្តាល ។
ជនរងគ្រោះ០២នាក់ទី១ ឈ្មោះ តុង ងៀង រតនា ភេទស្រី ជនជាតិខ្មែរ មុខរបរសិស្ស នៅភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្ដកណ្ដាល ទី២ ឈ្មោះ ប៉ិច លួត ភេទស្រី អាយុ៤២ឆ្នាំ ជនជាតិខ្មែរ មុខរបរកម្មការនីរោងចក្រ នៅភូមិកោះគ្របបាយ ឃុំសំរោងលើ ស្រុកអង្គស្នួល ខេត្ដកណ្ដាល ។
ជនសង្ស័យទី១ ឈ្មោះ សុន ចន្ថា ហៅថា ភេទប្រុស កើតឆ្នាំ២០០៣ ជនជាតិខ្មែរ មុខរបរមិនពិតប្រាកដ នៅភូមិដំណាក់អំពិល ឃុំដំណាក់អំពិល ស្រុកអង្គស្នួល ខេត្តកណ្តាល (អ្នកឆក់ឃាត់ខ្លួន) ទី២ឈ្មោះ ណែម នាត ហៅតឿ ភេទប្រុស កើតឆ្នាំ២០០២ ជនជាតិខ្មែរ មុខរបរមិនពិតប្រាកដ នៅភូមិពងទឹក ឃុំដំណាក់អំពិល ស្រុកអង្គស្នួល ខេត្តកណ្តាល (អ្នកបើកម៉ូតូ ឃាត់ខ្លួន)។
នគរបាលស្រុកអង្គស្នួល បានប្រាប់អោយដឹងថា នៅថ្ងៃខែឆ្នាំ វេលាម៉ោងកើតហេតុខាងលើ ជនរងគ្រោះបានជិះម៉ូតូម៉ាកស្កុបពីពណ៌ទឹកប៊ិក ដោយដាក់ទូរស័ព្ទក្នុងឃ្លុមម៉ូតូខាងមុខជិះពីទិសខាងលិចទៅទិសខាងកើត តាមបណ្ដោយផ្លូវជាតិលេខ៤ ពេលជិះដល់ចំណុចកើតហេតុ ស្រាប់តែជនសង្ស័យចំនួន០២នាក់ បានជិះម៉ូតូតាមមកពីក្រោយ ហើយឆក់យកទូរស័ព្ទដៃពីឃ្លុបម៉ូតូ រួចជិះគេចខ្លួនតែម្ដង។
ក្រោយមកជនរងគ្រោះបានជិះម៉ូតូដេញតាមពីក្រោយហើយស្រែកថាចោរៗ បន្ទាប់មកក៏ជួបជាមួយសមត្ថកិច្ចស្រុកអង្គស្នួល កំពុងល្បាតតាមផ្លូវជាតិក៏បានរាយការណ៍ ក្រោយពីសមត្ថកិច្ចទទួលបានព័ត៌មានភ្លាម បានបោះដៃតាមប្រព័ន្ធវិទ្យុទាក់ទង សហការជាមួយកម្លាំងប៉ុស្ដិ៍ដំណាក់អំពិល ប៉ុស្ដិ៍ពើក ប៉ុស្ដិ៍ក្រាំងម្កាក់ ប៉ុស្ដិ៍បែកចាន បានដេញស្ទាក់រហូតដល់ចំណុចមុខភូមិត្រពាំងប្រុយ ឃុំបែកចាន ត្រូវបានប្រជាពលរដ្ឋជួយស្ទាក់នឹងឃាត់ខ្លួនជនសង្ស័យរួមជាមួយវត្ថុតាងបាន។
ក្រោយមកទើបកម្លាំងសមត្ថកិច្ចបាននាំខ្លួនជនសង្ស័យមកអធិការដ្ឋាននគរបាលស្រុក ដើម្បីសួរនាំតាមនីតិវិធីច្បាប់ ។
ជនរងគ្រោះឈ្មោះ ប៉ិច លួត បានបំភ្លឺថា នៅថ្ងៃទី១៦ ខែឧសភា ឆ្នាំ២០២២ វេលាម៉ោង១៤ និង៣០នាទី នៅចំណុចបណ្ដោយផ្លូវជាតិលេខ៤ ភូមិត្រពាំងពើក ឃុំពើក ស្រុកអង្គស្នួល ខេត្តកណ្តាល ជនសង្ស័យទាំងពីរនាក់មានឈ្មោះដូចខាងលើបានធ្វើសកម្មភាពឆក់យកទូរស័ព្ទដៃរបស់ខ្លួនចំនួនពីរគ្រឿង ម៉ាកOPPO 11bro មួយគ្រឿង និងម៉ាកiPhone 6 មួយគ្រឿង ហើយជិះម៉ូតូគេចខ្លួនបាត់ ។
ជនសង្ស័យទាំងពីរនាក់បានឆ្លើយសារភាពថា ខ្លួនពិតជាបានឆក់យកទូរស័ព្ទដៃរបស់ជនរងគ្រោះពិតមែន ហើយរបួសស្នាមនៅលើខ្លួន គឺត្រូវប្រជាពលរដ្ឋដែលឃាត់ខ្លួនបានព្រួតគ្នាវាយ ។
ចំពោះករណីនេះកម្លាំងជំនាញកំពុងកសាងសំណុំរឿង និងបន្តចាត់ការតាមនីតិវិធី ៕
ចែករំលែកព័តមាននេះ