បន្ទាប់ពីបានយកឈ្នះក្រុមសិង្ហបុរីក្នុងលទ្ធផល១-០ កាលពីថ្ងៃទី២២ វិច្ឆិកា កន្លងទៅ ធ្វើឱ្យក្រុមដំរីចម្បាំងថៃ ដែលស្ថិតនៅក្នុងពូល Aមានឱកាសឡើងទៅវគ្គពាក់កណ្តាលផ្តាច់ព្រ័ត្រមុនគេ បើទោះជានៅសល់១ប្រកួតក្នុងដៃទៀតក្តី។
គួររំលឹកថា ក្នុងការប្រកួតជាមួយក្រុមសិង្ហបុរីនៅលើទឹកដីហ្វ៊ីលីពីននេះ ខ្សែបម្រើ-ប្រយុទ្ធក្រុមដំរីចម្បាំងថៃ Sarawut Masuk ធ្វើបានសម្រេចដោយការតែតបញ្ចូលទីគូប្រកួតរបស់ខ្លួននៅនាទីទី ៨៩ បន្ទាប់ពីទទួលបានបាល់ទាត់ចេញពីជើងកីឡាករ Bunmathan ។
ចំណែកឯក្រុមម្ចាស់ផ្ទះហ្វ៊ីលីពីន ដែលបានប៉ះជាមួយក្រុមឥណ្ឌូណេស៊ី នាល្ងាចថ្ងៃដដែលនោះដែរនៅតែរកបាន១ពិន្ទុបន្ថែមប៉ុណ្ណោះ តាមរយៈលទ្ធផលស្មើគ្នា២-២ ។ ចំពោះក្រុមម្ចាស់ផ្ទះហ្វ៊ីលីពីន ត្រូវរង់ចាំលទ្ធផលនៃការប្រកួតជុំបន្ទាប់ ដើម្បីឱ្យដឹងច្បាស់ថាតើអាចមានឱកាសឡើងទៅវគ្គបន្តឬយ៉ាងណា ខណៈដែលបច្ចុប្បន្នឈរនៅលេខ២ និងមាន២ពិន្ទុក្នុងតារាងពូល A ។
សម្រាប់ចំណាត់ថ្នាក់បណ្តោះអាសន្នក្នុងតារាងពូលA ក្រុមដំរីចម្បាំងថៃឈរនៅកំពូលតារាងមាន៦ពិន្ទុ ក្រុមហ្វ៊ីលីពីនឈរនៅលេខ២ ខណៈសិង្ហបុរី ឈរនៅលេខ៣មាន១ពិន្ទុ និងឥណ្ឌូណេស៊ីឈរនៅបាតតារាងមាន១ពិន្ទុដែរ ។ ចំពោះការប្រកួតជុំចុងក្រោយក្នុងពូលAនេះ នឹងប្រព្រឹត្រទៅនៅថ្ងៃទី២៥ វិច្ឆិកា ដែលក្រុមសិង្ហបុរី ត្រូវប៉ះជាមួយក្រុមឥណ្ឌូណេស៊ីនាវេលាម៉ោង៧យប់នៅពហុកីឡដ្ឋាន Rizal Memorial Stadium ខណៈនៅម៉ោងដដែលនេះ ក្រុមម្ចាស់ផ្ទះហ្វ៊ីលីពីន ក៏ត្រូវប៉ះក្រុមថៃ នៅពហុកីឡដ្ឋាន Philippine Stadium ទីក្រុង Bocaue ៕
ចែករំលែកព័តមាននេះ