ប្រទេសជប៉ុនកាលពីថ្ងៃទី៨ មីនា បានសម្រេចអនុម័តលើទណ្ឌកម្មប្រឆាំងប្រទេសលីប៊ី ក្នុងនោះមានដូចជាការផ្អិបទ្រព្យសម្បត្តិ និងការហាមប្រាមលើការធ្វើដំណើរប្រឆាំងអតីតមេដឹកនាំប្រទេសនេះ ជាពិសេសលោកមូអាម៉ា កាដាហ្វី ដើម្បីឱ្យស្របទៅតាមដំណោះស្រាយមួយរបស់អង្គការសហប្រជាជាតិ ដែលសម្រេចបានកាលពីខែមុន ។
គណៈរដ្ឋមន្ត្រីរបស់នាយករដ្ឋមន្ត្រីជប៉ុន លោកណាអូតូ កាន បានសម្រេចភ្លាមៗចំពោះការផ្អិបទ្រព្យសម្បត្តិដែលមាននៅក្នុងប្រទេសជប៉ុនរបស់លោកកាដាហ្វី រួមទាំងអតីតមេដឹកនាំលីប៊ី៥រូបទៀត ហើយហាមមិនឱ្យធ្វើដំណើរចេញនិងចូលប្រទេសជប៉ុន ។
ក្រុមប្រឹក្សាសន្តិសុខអង្គការសហប្រជាជាតិ ដោយមានការគាំទ្រពីប្រទេសអារ៉ាប់ និងប្រទេសអាហ្វ្រិក កាលពីថ្ងៃទី២៦ កុម្ភៈ កន្លងមក បានសម្រេចអនុម័តជាឯកច្ឆន្ទលើទណ្ឌកម្មប្រឆាំងរបបរបស់លោកកាដាហ្វី ដែលប្រើកម្លាំងបង្ក្រាបបាតុករ ។
មន្ត្រីក្រសួងការបរទេសជប៉ុនមួួយរូបនិយាយថា ស្ថិតក្រោមទណ្ឌកម្មនេះជប៉ុននឹងផ្អិបទ្រព្យសម្បត្តិរបស់លោកកាដាហ្វី និងសមា
ជិកគ្រួសាររបស់លោក ។ មន្ត្រីដដែលបានប្រាប់ទីភ្នាក់ងារសារព័ត៌មានបារាំង AFP ថា វិធានការនានាដែលអនុម័តដោយប្រទេសជប៉ុនក៏មានការហាមប្រាមលើការនាំចូលអាវុធនៅប្រទេសលីប៊ីដែរ ៕
ចែករំលែកព័តមាននេះ