ខេត្តកណ្ដាល ៖ ផ្ទះប្រជាពលរដ្ឋ៨ខ្នង ដែលសង់លយចូលក្នុងស្ទឹងព្រែកត្នោត ស្ថិតនៅចំណុចភូមិព្រែកតាពៅ សង្កាត់ដើមមៀន ក្រុងតាខ្មៅ បានបាក់រអិលចូលក្នុងស្ទឹងបន្តបន្ទាប់ ដែលហេតុការណ៍នេះបង្កឱ្យភ្ញាក់ផ្អើល កាលពីរសៀលថ្ងៃទី២២ វិច្ឆិកា ២០១៦ បន្ទាប់ការប្រហារដោយសារទឹកភ្លៀងហូរខ្លាំងពេកនៅមាត់ស្ទឹង ដោយមនុស្សនាំគ្នារត់ទាន់ មិនមានអ្នករងគ្រោះថ្នាក់នោះទេ ។
ក្រោយពេលកើតហេតុ អាជ្ញាធរសង្កាត់ និងនគរបាលបានទៅពិនិត្យកន្លែងកើតហេតុ ក៏បានប្រាប់ឱ្យដឹងថា បន្ទាប់ពីមានភ្លៀង ធ្លាក់ខ្លាំង តាំងពីយប់រហូតដល់ម៉ោង១០ព្រឹកថ្ងៃទី២២ វិច្ឆិកា នោះ បណ្ដាលឱ្យទឹកស្ទឹងព្រែកត្នោតហូរខ្លាំងច្រោះដី និងបណ្ដាលឱ្យរអិលបាក់មាត់ស្ទឹងចូលក្នុងស្ទឹង ធ្វើឱ្យផ្ទះប្រជាពលរដ្ឋចំនួន៨ខ្នង ត្រូវបាក់រអិលធ្លាក់ចូលស្ទឹង ប៉ុន្តែមិនបណ្ដាលឱ្យមនុស្សរងរបួស ឬស្លាប់នោះទេ ។ ផ្ទះពលរដ្ឋទាំងនោះ ជាផ្ទះឈើប្រក់សង្ក័សី សង់នៅជាប់និងច្រាំងស្ទឹង លយចូលទៅក្នុងស្ទឹង ពេលទឹកស្ទឹងហូរខ្លាំង ច្រោះដី ខាងក្រោម ក៏បណ្ដាលអោយ រអិល បាក់ច្រាំង ស្ទឹង និងផ្ទះ មកតែម្ដង។ ផ្ទះទាំងនោះមិនបានបាក់ខ្ទេចទាំងស្រុងទេ ម្ចាស់ផ្ទះអាចរុះរើចេញ យកទៅសង់នៅកន្លែងផ្សេងវិញបាន និងសម្ភារនៅក្នុផ្ទះ ត្រូវបានម្ចាស់ផ្ទះជញ្ជូនចេញទាន់បានគ្រប់ៗដែរ។
ប្រជាពលរដ្ឋរងគ្រោះបានឱ្យដឹងថា ពួកគាត់ជាប្រជាជនក្រីក្រ គ្មានដីសំរាប់សាងសង់ផ្ទះ មកសង់ផ្ទះនៅលើដីចំណីមាត់ស្ទឹង លយចូលក្នុងស្ទឹង ។ ពេលថ្មីៗនេះ ដីច្រាំងស្ទឹងបានរអិលបាក់ជាបន្តបន្ទាប់ មកដល់ជើងសសរផ្ទះ ដោយសារទឹកស្ទឹងហូរខ្លាំង ។
បើទោះបីជាដឹងថា ដីច្រាំងស្ទឹង និងរអិលបាក់នាំយកទាំងផ្ទះ នៅថ្ងៃណាមួយ ក៏ដោយចុះ ក៏ទ្រាំរស់នៅទាំង ក្តីព្រួយបារម្ភ ។ បន្ទាប់ពីមានភ្លៀងធ្លាក់ខ្លាំងច្រើបម៉ោង ធ្វើឱ្យបាក់ច្រាំងរអិលផ្ទះពួកគាត់ទៅក្នុងស្ទឹង មិនអាចរស់នៅទៀតបាន ត្រូវតែបង្ខំចិត្តរុះរើចេញតែម្ដង ៕
ចែករំលែកព័តមាននេះ