ខេត្តកំពង់ធំ ៖ លោកយាយចាស់ជរាដែលគ្មានទីពឹង អាយុ៨៨ឆ្នាំម្នាក់ ដើរមិនរួច និងយាយអាយុ៨២ឆ្នាំម្នាក់ទៀត សុទ្ធតែងងឹតភ្នែក កំពុងតែរស់នៅលំបាកវេទនាអត់ឃ្លាន គ្មានអាហារចំណីសម្រាប់បរិភោគ
ខេត្តកំពង់ធំ ៖ លោកយាយចាស់ជរាដែលគ្មានទីពឹង អាយុ៨៨ឆ្នាំម្នាក់ ដើរមិនរួច និងយាយអាយុ៨២ឆ្នាំម្នាក់ទៀត សុទ្ធតែងងឹតភ្នែក កំពុងតែរស់នៅលំបាកវេទនាអត់ឃ្លាន គ្មានអាហារចំណីសម្រាប់បរិភោគ រស់ដោយសារអ្នកស្រុកជិតខាងហុចឲ្យ ត្រូវបានទទួលអំណោយពីឯកឧត្តម សុខ លូ អភិបាលរងខេត្ត និងជាប្រធានក្រុមការងារ យុទ្ធជនគណបក្សប្រជាជនកម្ពុជាខេត្តកំពង់ធំ នៅព្រឹកថ្ងៃទី២២ ខែវច្ឆិកា ឆ្នាំ២០១៦។ បើតាមព័ត៌មានដែលទទួលបានចំពោះលោកទាំង២នាក់ខាងលើ ទី១.លោកយាយឈ្មោះ ខាត់ ផាត់ អាយុ៨៨ឆ្នាំ ងងឹតភ្នែក ហើយឥឡូវនេះលោកយាយដើរលែងរួចហើយគ្មានកូនចៅ និងប្តី រស់នៅជាមួយនោះទេ។
លោកយាយធ្លាប់មានកូនស្រីម្នាក់បានស្លាប់បាត់ទៅហើយបន្សល់ទុកលោកយាយរស់នៅកណ្តោចកណ្តែង។ ទី២.លោកយាយ ឈ្មោះ គិន យួន អាយុ៨២ឆ្នាំ ជាចាស់ជរាក្រីក្រគ្មានកូនចៅជាទីពឹងពុំនាក់ដូចគ្នាលោកទាំង២នាក់រស់នៅភូមិបល្ល័ង្កខាងកើត សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ លោកយាយរស់នៅដោយការអត់ឃ្លាន នៅពេលបានជួបម្ចាស់ជំនួយលោកយាយមិនស្គាល់ថាជាអ្នកណានោះទេ បានលើដៃសំពះសុំលុយ ទិញអីពិសារ ធ្វើឲ្យគ្រប់គ្នាសឹងតែទប់ទឹកភ្នែកមិនបានខណៈបានឮពាក្យនេះ។
ក្នុងនោះឯកឧត្តម សុខ លូ អភិបាលរងខេត្តលោកក៏បាននាំយកអំណោយទៅជូនលោកយាយទាំង២ដោយក្នុងម្នាក់ៗទទួលបានអង្ករ៥០គីឡូក្រាម មីសៀម២កេះ ត្រីខ២០កំប៉ុង ទឹកស៊ីអ៊ីវ១យួរ ទឹកត្រី១យួរ ទឹកផ្លែឈើ២កេះ ទឹកបរិសុទ្ធ៨កេះ និងថវិកាចំនួន២០ម៉ឺនរៀល។ សកម្មភាពបែបនេះហើយ ដែលធ្វើឲ្យលោកយាយមានសេចក្តីត្រេកអរឥតឧបមា មានតែម្រាមដៃទាំង១០លើកប្រណមបួងសួងដល់វត្ថុសក្តិសិទ្ធិសូមតាមជួយបីបាច់ថែរក្សាដល់ម្ចាស់ជំនួយជួបប្រទះតែនឹងសេចក្តីសុខគ្រប់ប្រការ៕
ចែករំលែកព័តមាននេះ