រាជធានីភ្នំពេញ ៖ ទោះបីចាញ់ក្រុមខ្លាម៉ាឡេស៊ី២-៣ នៅថ្ងៃបើកឆាកដំបូងនៃពានរង្វាន់ AFF Suzuki Cup 2016 ក្តី ក៏ក្រុមគោព្រៃកម្ពុជាមិនបាក់ទឹកចិត្តឡើយពេលជួបក្រុម
ម្ចាស់ផ្ទះមីយ៉ាន់ម៉ានាល្ងាចថ្ងៃទី២៣ វិច្ឆិកា នេះ
រាជធានីភ្នំពេញ ៖ ទោះបីចាញ់ក្រុមខ្លាម៉ាឡេស៊ី២-៣ នៅថ្ងៃបើកឆាកដំបូងនៃពានរង្វាន់ AFF Suzuki Cup 2016 ក្តី ក៏ក្រុមគោព្រៃកម្ពុជាមិនបាក់ទឹកចិត្តឡើយពេលជួបក្រុម
ម្ចាស់ផ្ទះមីយ៉ាន់ម៉ានាល្ងាចថ្ងៃទី២៣ វិច្ឆិកា នេះ នៅកីឡដ្ឋាន Thuwunna YTC Stadium ស្ថិតនៅក្នុងទីក្រុង Yangon ប្រទេសមីយ៉ាន់ម៉ា ។
ជាក់ស្តែងនៅលើទំព័រហ្វេសប៊ុករបស់ខ្សែប្រយុទ្ធប្រាក់ មុន្នីឧត្តម បានសរសេរបង្ហោះនូវពាក្យពេចន៍ដ៏មានន័យ បន្ទាប់ពីក្រុមគោព្រៃកម្ពុជាចាញ់ក្រុមខ្លាម៉ាឡេស៊ីថា៖ «ថ្ងៃនេះពួកយើងព្រមទទួលពាក្យបរាជ័យក្នុងការប្រកួតថ្ងៃនេះ ប៉ុន្តែពួកយើងមិនព្រមទទួលពាក្យប្រមាថដែលធ្វើឱ្យក្រុមទាំងមូលបាក់ទឹកចិត្តនោះទេ ពួកយើងនឹងតស៊ូឱ្យដល់ទីបញ្ចប់ដើម្បីប្រទេសជាតិរបស់ពួកយើង» ។ ទន្ទឹមនឹងការបង្ហោះពាក្យពេចន៍ដ៏មានន័យនេះ ក៏មានអ្នកគាំទ្រជាច្រើនបានបញ្ចេញមតិគាំទ្រ និងកែតម្រូវចំពោះទម្រង់លេងរបស់ក្រុមគោព្រៃកម្ពុជាផងដែរ ។ មតិភាគច្រើនបានលើកឡើងថា ការប្រកួតលើកនេះក្រុមទាំងមូលធ្វើបានល្អច្រើន ជាពិសេសខ្សែបម្រើ និងខ្សែប្រយុទ្ធ តែអ្វីដែលជាចំណុចខ្សោយ
ធ្វើឱ្យចាញ់គេនោះគឺនៅត្រង់ប្រព័ន្ធការពារដែលមានកង្វះខាតច្រើនធ្វើឱ្យគូប្រកួតមានឱកាសវាយបកវិញ ។ ប៉ុន្តែលោកLee Tae Hoon គ្រូបង្វឹកក្រុមគោព្រៃកម្ពុជាបានលើកយកបញ្ហាអាកាសធាតុធ្វើជាមូលហេតុដែលនាំឱ្យក្រុមរបស់លោកលេងមិនបានតាមគម្រោងដែលបានរៀបចំទុក និងកីឡាករខ្សោយផ្នែកស្មារតីក្នុងការយកឈ្នះពេលជួបក្រុមដែលមានសមត្ថភាពខ្លាំងជាង។ ទោះបីយ៉ាងណាលោកទទួលស្គាល់ថា នេះជាបទពិសោធន៍ថ្មីរបស់ក្រុមគោព្រៃកម្ពុជាក្នុងការឈានមកដល់វគ្គនេះ។
មុនការប្រកួតចាប់ផ្តើមនៅល្ងាចនេះ លោក Lee Tae Hoon បានថ្លែងថា យើងខកខានមិនបានឡើងដល់វគ្គនេះយូរហើយ ។ នេះជាឱកាសដ៏ល្អដែលយើងបានជួបក្រុមខ្លាំងជាច្រើននៅក្នុងតំបន់ ។ ពិតណាស់ គ្រប់ការប្រកួតទាំងអស់មិនមែនជារឿងងាយស្រួលឡើយ ព្រោះគូប្រជែងសុទ្ធតែមានសមត្ថភាពខ្ពស់ជាងយើង ។ លោកគិតថា ការប្រកួតល្ងាចនេះពិតជាសំខាន់ និងលំបាកមែនទែន ព្រោះយើងត្រូវជួបក្រុមម្ចាស់ផ្ទះមីយ៉ាន់ម៉ាដែលមានប្រៀបជាងយើង និងកំពុងស្រេកឃ្លានជ័យជម្នះយ៉ាងខ្លាំង បន្ទាប់ពីចាញ់មួយប្រកួតដូចយើងដែរ ។ ទោះបីយ៉ាងណា លោកនឹងព្យាយាមឱ្យអស់ពីលទ្ធភាពដើម្បីដឹកនាំក្រុមគោព្រៃកម្ពុជាស្វែងរក៣ពិន្ទុឱ្យបានដើម្បីបន្តក្តីសង្ឃឹមឆ្ពោះទៅវគ្គបន្ត ក៏ដូចជាបំបែកកំណត់ត្រាក្នុងប្រវត្តិសាស្ត្របាល់ទាត់កម្ពុជាយកឈ្នះក្រុមខ្លាំងមួយនេះឱ្យបានដើម្បីបំពេញចិត្តអ្នកគាំទ្រ ។
ចំណែកគ្រូបង្វឹកក្រុមខ្លាម៉ាឡេស៊ី លោក Ong Kim Swee បានវាយតម្លៃខ្ពស់ចំពោះទម្រង់លេងរបស់ក្រុមគោព្រៃកម្ពុជាថាពិតជាខ្លាំងមិនធម្មតា ។ ការថ្លែងបែបនេះហាក់ដូចជាលោកកំពុងផ្ញើសារប្រាប់ទៅក្រុមម្ចាស់ផ្ទះមីយ៉ាន់ម៉ា និងវៀតណាមថា ជំនួបជាមួយក្រុមគោព្រៃកម្ពុជាពេលនេះមិនមែនជារឿងងាយស្រួលដូចមុនឡើយ។
ដូច្នេះ សូមរង់ចាំទស្សនាទាំងអស់គ្នានៅលើ កញ្ចក់ទូរទស្សន៍បាយ័នព័ត៌មាន (BTV News) នៅវេលាម៉ោង៦ និង៣០នាទីល្ងាចនេះ ថាតើក្រុមគោព្រៃកម្ពុជាអាចបំបែកកំណត់ត្រាយកឈ្នះក្រុមម្ចាស់ផ្ទះមីយ៉ាន់ម៉ាបានឬយ៉ាងណា? យោងតាមប្រវត្តិជួបគ្នាចំនួន៦លើករវាងក្រុមទាំងពីរបង្ហាញឱ្យឃើញថា ក្រុមគោព្រៃកម្ពុជាមិនដែលឈ្នះសោះ ចាញ់៥ និងស្មើ១ ៕
ចែករំលែកព័តមាននេះ