រាជធានីភ្នំពេញ ៖ យុវជនម្នាក់ពាក់របាំងមុខ ពណ.ស និងម្នាក់ទៀតពាក់របាំងមុខពណ៌ខ្មៅ ចូលធ្វើសកម្មភាពគាស់ទ្វារបង្អួចដែកនិងកញ្ចក់ផ្ទះមួយកន្លែង ខណៈដែលម្ចាស់ផ្ទះមិននៅ រវល់ទៅធ្វើការបាត់ ។ ពេលលួចបាន យកទៅលក់ឱ្យអ្នកទិញអេតចាយមួយចំនួនហើយ បន្ទាប់មកបន្តទៅគាស់ផ្ទះគេថែមទៀត ប៉ុន្តែចៃដន្យត្រូវមិត្តភក្ដិម្ចាស់ផ្ទះទៅទាន់ ក៏ទូរស័ព្ទហៅម្ចាស់ផ្ទះគេឱ្យទៅមើលនិងធ្វើការព័ទ្ធចាប់បានម្នាក់តែម្តង ដែលពាក់របាំងមុខ.ស ហើយម្នាក់ទៀតពាក់របាំងមុខខ្មៅបានរត់គេចខ្លួនបាត់ស្រមោល ។
ហេតុការណ៍នោះ កើតឡើងកាលពីវេលាម៉ោង០៤ និង៤០នាទីល្ងាចថ្ងៃទី២១ វិច្ឆិកា ស្ថិតនៅចំណុចភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។ ជនសង្ស័យដែលចាប់ខ្លួនឈ្មោះណែម កែវសុវណ្ណ អាយុ១៧ឆ្នាំ ជាអតីតកម្មករ ក្នុងសិប្បកម្មផលិតរបាំងមុខ ។ ចំណែកបក្សពួកដែលពាក់របាំងមុខពណ៌ខ្មៅ បានរត់គេចខ្លួនមិនត្រូវស្គាល់អត្តសញ្ញាណទេ ។ រីឯស្ត្រីម្នាក់ ដែលត្រូវនគរបាលឃាត់ខ្លួន សង្ស័យជាអ្នកទទួលផលចោរកម្មឈ្មោះអ៊ុយ សុឃីម អាយុ៤៨ឆ្នាំ ជាអ្នកលក់ទិញអេតចាយ មានទីលំនៅក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ។
នគរបាលបាននិយាយថា ក្រោយពេលសួរនាំជននោះរួច ក៏ឈានទៅចាប់ខ្លួនស្ត្រីអ្នកលក់ទិញអេតចាយម្នាក់ទៀត អ៊ុយ សុឃីម នៅក្នុងភូមិជ្រៃកោង ដែលបានទទួលទិញរបស់ចោរ គឺទ្វារបង្អួចខាងលើពីបទទទួលផលចោរកម្ម ។ បន្ទាប់ពីសាកសួរស្ត្រីរូបនោះបានប្រាប់ថា គាត់ពិតជាបានទិញរបស់ខាងលើនោះមែន ក្នុងតម្លៃ៤២,០០០រៀល ដែលជនសង្ស័យបានយកទៅលក់។
មិនតែប៉ុណ្ណោះស្ត្រីខាងលើ ថែមទាំងបានឱ្យរទេះទៅជនសង្ស័យ ដើម្បីយកទៅដឹកអូសរបស់ដែលលួចបាននោះយកមកលក់ឲ្យខ្លួនថែមទៀតផង ។
ចែករំលែកព័តមាននេះ