រាជធានីភ្នំពេញ ៖ អត្តពលិកកម្ពុជាចំនួន៤រូប គ្រូបង្វឹក១រូប និងប្រធានប្រតិភូ១រូបសរុប៦រូប នឹងធ្វើដំណើរទៅចូលរួមប្រកួតកីឡាប៊ូល និងប៉េតង់ដណើ្តមពានជើងឯកពិភពលោកនៅប្រទេសម៉ាដាហ្គាស្កា នាថ្ងៃទី២៧ វិច្ឆិកា ខាងមុខនេះដោយមានអត្តពលិកមកពី៥៤ប្រទេសចូលរួម ។
លោក សូម៉ៃ សុខគា អគ្គលេខាធិការរងសហព័ន្ធកីឡាប៊ូល និងប៉េតង់កម្ពុជា និងជាប្រធានប្រតិភូដឹកនាំអត្តពលិកកម្ពុជាទៅចូលរួមប្រកួតក្នុងព្រឹត្តិការណ៍នេះ បានឱ្យដឹងថា នេះគឺជាលើកទី២ហើយ ដែលសហព័ន្ធបានបញ្ជូនអត្តពលិកផ្នែកបុរសទៅចូលរួមប្រកួតនៅក្នុងព្រិត្តិការណ៍បែបនេះ ។ តាមដែលលោកដឹងនៅឆ្នាំ២០០៧ កម្ពុជាធ្លាប់បានបញ្ជូនអត្តពលិកផ្នែកបុរសទៅចូលរួមប្រកួតរួចម្ដងមកហើយ ដោយដណ្ដើមបានមេដាយសំរឹទ្ធ១គ្រឿង ។ ចំណែកលើកនេះ លោកមានសង្ឃឹមច្រើនព្រោះបើតាមការពិនិត្យទៅលើកម្រិតនៃការហ្វឹកហាត់ជាច្រើនខែរបស់ពួកគេឃើញថា មានការរីកចម្រើនជាងមុន ទាំងបច្ចេកទេស និងស្មារតី ។ ប៉ុន្តែទន្ទឹមនឹងនោះ លោកក៏ព្រួយបារម្ភខ្លះដែរ ដោយសារតែសព្វថ្ងៃនេះ កម្រិតនៃការលេងរបស់អត្តពលិកបណ្ដាប្រទេសដទៃនៅលើពិភពលោកមានការជឿនលឿនខ្លាំងណាស់ ។ មួយវិញទៀតប្រទេសម៉ាដាហ្គាស្កាមានព្រំប្រទល់ជាប់ប្រទេសកេនយ៉ា ដូច្នេះការធ្វើដំណើរត្រូវចំណាយពេលជាច្រើនថ្ងៃទើបដល់ ។ ប្រតិភូកីឡាប៊ូល និងប៉េតង់កម្ពុជា នឹងធ្វើដំណើរចាកចេញពីប្រទេសកម្ពុជានៅថ្ងៃទី២៧ វិច្ឆិកា ខណៈការប្រកួតជាផ្លូវការចាប់ផ្ដើមពីថ្ងៃទី១ ដល់ថ្ងៃទី៤ធ្នូ ។ វិញ្ញាសាដែលត្រូវប្រកួតមាន វាយ៣នាក់ទល់នឹង៣នាក់ក្នុងនោះមានកីឡាករបម្រុង១រូប និងប្រកួតវាយយកពិន្ទុ ។
លោកបានឱ្យដឹងទៀតថា ការប្រកួតកីឡាប៊ូល និងប៉េតង់កម្រិតពិភពលោកបែបនេះធ្វើឡើងរយៈពេល២ឆ្នាំម្ដង ។ សម្រាប់ការប្រកួតផ្នែកនារី ក៏ត្រូវធ្វើឡើងរយៈពេល២ឆ្នាំម្ដងដូចគ្នា គឺធ្វើនៅឆ្នាំ២០១៧ ។ កាលពីឆ្នាំ២០១៥ ពេលប្រទេសថៃធ្វើជាម្ចាស់ផ្ទះនោះ កីឡាការិនី កែ ឡេង ជាអ្នកដណ្ដើមបានមេដាយមាសលើវិញ្ញាសាវាយយកពិន្ទុ ។
សូមបញ្ជាក់ថា ប្រតិភូកីឡាដែលត្រូវធ្វើដំណើរទៅចូលរួមប្រកួតលើកនេះដឹកនាំដោយលោក សូម៉ៃ សុខគា គ្រូបង្វឹកគឺលោក អឹុម ផាត រីឯអត្តពលិកទាំង៤រូបមានលោក សុខ ចាន់មាន, លោក ញ៉ែម បូរ៉ា, លោក ថោង ឈឿន និងលោក យ៉ា ចាន់ដារ៉ារិទ្ធ ៕
ចែករំលែកព័តមាននេះ