រាជធានីភ្នំពេញ ៖ បន្ទាប់ពីចប់ការប្រកួតជើងឯកព្រឹត្តិការណ៍TV5 Knock Out Seriesកាលពីថ្ងៃអាទិត្យទី៦ វិច្ឆិកា ស្ថាប័នប៉ុស្ដិ៍លេខ៥បានប្រកាសបើកព្រឹត្តិការណ៍នេះសម្រាប់រដូវកាលទី២ភ្លាម ដោយមានកីឡាករទម្ងន់៦០កីឡូក្រាមចំនួន៣២រូបចូលរួម ។ ទោបីយ៉ាងណា ការប្រកួតមួយនេះត្រូវគេឃើញប្ដូរពីថ្ងៃអាទិត្យដែលមានអ្នកទស្សនាកកកុញ មកថ្ងៃសៅរ៍ វិញខណៈមន្ត្រីជាអ្នកទទួលបន្ទុកបានបញ្ជាក់ឱ្យដឹងពីមូលហេតុនៃការផ្លាស់ប្ដូរនេះ ។
លោក សេង កដិកា អ្នករៀបចំការប្រកួតប្រចាំប៉ុស្ដិ៍លេខ៥បានអះអាងថា មិនមែនជាលើកទី១នោះទេដែលប៉ុស្ដិ៍លេខ៥បានរៀបចំកម្មវិធីប្រដាល់ក្នុងទ្រង់ទ្រាយធំបែបនេះ ហើយរូបមន្តប្រកួតក៏មានលក្ខណៈខុសគេគឺ៣២រូបប្រកួតគ្នាចាញ់ធ្លាក់ៗរហូតរកឃើញអ្នកខ្លាំងតែម្នាក់ដើម្បីកាន់តំណែងជើងឯក ។ ធៀបនឹងការប្រដាល់ដណ្ដើមជើងឯកនៅតាមសង្វៀនស្ថានីយទូរទស្សន៍ផ្សេង លោកថាសមាសភាពចូលរួមគឺសុទ្ធតែមានសមត្ថភាព ហើយជាកីឡាករវ័យក្មេងរហូតដល់៣២រូបឱ្យឡើងប្រកួតគ្នា ។ លោកថា ការប្រកួត TV5 Knok Out Series រដូវកាលទី១ គឺជាការប្រកួតដណ្ដើមជើងឯកក្នុងប្រភេទទម្ងន់៥៥គីឡូក្រាម ទើបការប្រកួតសម្រាប់រដូវកាលថ្មី គឺសមាសភាពចូលរួមមិនមែនជាកីឡាករដដែល ជាកីឡាករថ្មីទម្ងន់៦០គីឡូក្រាម ។ បើទោះជាព្រឹត្តិការណ៍ TV5 Knock Out Series ទើបតែដំណើរការបាន២លើក ប៉ុន្តែលោកថាការប្រកួតដែលមានរូមមន្តជម្រើសយកកីឡាករថ្មីចាស់រហូតដល់៣២រូបឱ្យឡើងប្រកួតគ្នាចាញ់ធ្លាក់ៗប្រភេទនេះ គឺបានធ្វើឡើងច្រើនសាមកហើយនៅប៉ុស្ដិ៍លេខ៥ ។ លោកថា ការប្រកួតមួយនេះសម្រេចលើកពេលពីថ្ងៃអាទិត្យ មកដាក់ថ្ងៃសៅរ៍ ដោយសារតែប៉ុស្ដិ៍លេខ៥មានគម្រោងរៀបចំការប្រគំតន្ត្រីនៅយប់ថ្ងៃអាទិត្យជារៀងរាល់សប្ដាហ៍ក្នុងពេលខាងមុខ ។ លោកថា ថ្ងៃអាទិត្យ និងថ្ងៃសៅរ៍ មិនមានបញ្ហាខុសគ្នានោះទេ ប៉ុន្តែអ្វីដែលខុសគ្នាគឺកម្មវិធីក្រោយលើកមកកាន់ថ្ងៃផ្សេងពីអ្វីដែលធ្លាប់បានប្រកួត គឺត្រូវប្រើពេលយូរដើម្បីកៀងគរអ្នកទស្សនាជាថ្មី ជាពិសេសបញ្ជ្រាបអារម្មណ៍អ្នកតាមដានឱ្យប្ដូរពីទស្សនាតាមទម្លាប់រៀងរាល់ថ្ងៃអាទិត្យ មកមើលនៅថ្ងៃសៅរ៍វិញ ។ លោកនិយាយថា ប៉ុស្ដិ៍លេខ៥ មិនមានគម្រោងបើកការប្រកួតនៅថ្ងៃអាទិត្យជំនួសឱ្យកម្មវិធីចាស់បានទេ ក្នុងពេលដែលស្ថាប័ននេះនឹងយកម៉ោងល្ងាចថ្ងៃអាទិត្យទៅធ្វើតន្ត្រីបន្តផ្ទាល់ ហើយនឹងធ្វើរាល់អាទិត្យដើម្បីឱ្យអ្នកទស្សនាមានឱកាសបានកម្សាន្តជាមួយបទភ្លេងជាជំនួស ។ លោកនៅតែមានការរំពឹងថាព្រឹត្តិការណ៍ TV5 Knock Out Series រដូវកាលទី២នឹងទទួលបានការចាប់អារម្មណ៍ ដោយសារតែព្រឹត្តិការណ៍មួយនេះមានសមាសភាពកីឡាករប្រភេទ៦០គីឡូក្រាម៣២រូបឡើងប្រកួតគ្នា ។
លោក សេង កដិកា បានអះអាងថា វគ្គថ្មីរបស់ព្រឹត្តិការណ៍មួយនេះ បានបើកដំណើរការកាលពីថ្ងៃសៅរ៍ទី១៩ វិច្ឆិកា ដោយមានកីឡាករ៤រូបក្នុងចំណោម៣២រូបប្រកួតគ្នាចាញ់ធ្លាក់ៗនៅលើសង្វៀន ។ លោកថា បើទោះជាចំនួនអ្នកទស្សនានៅមិនទាន់បានស្មើជាមួយព្រឹត្តិការណ៍ដែលធ្លាប់ធ្វើនៅរៀងរាល់ថ្ងៃអាទិត្យ ប៉ុន្តែមិនយូរប៉ុន្មានគឺអ្នកទស្សនានឹងដឹង ហើយវិលមកគាំទ្រសម្រាប់ថ្ងៃសៅរ៍ក្រោយការផ្លាស់ប្ដូរ។ លោកមិនមានអារម្មណ៍សោកស្ដាយដែលការប្រកួតថ្ងៃអាទិត្យមានភាពអំណោយផលត្រូវបានផ្លាស់ចេញមកដាក់ថ្ងៃសៅរ៍នោះទេ ដោយសារតែរៀងរាល់ថ្ងៃសៅរ៍នៅក្នុងតំបន់ជ្រោយចង្វាជាប់សាកលវិទ្យាល័យន័រតុននោះ ក៏ជាថ្ងៃសម្រាកហើយមានអ្នកទស្សនាមិនតិចដូចគ្នា។ បើទោះជាអះអាងថា ព្រឹត្តិការណ៍ប្រដាល់កាលពីថ្ងៃសៅរ៍មួយត្រូវបានបិទចោល ដោយសារតែហេតុផលខ្វះការគាំទ្រដូចគ្នានឹងរាល់ថ្ងៃអាទិត្យ ក៏លោកបញ្ជាក់ថា ការប្រកួតជម្រុះ៣២រូបចាញ់ធ្លាក់ៗមានភាពទាក់ភ្នែកជាង បើធៀបនឹងការប្រកួតមិត្តភាព និងដណ្ដើមជើងឯកអន្តរជាតិនាពេលកន្លងមក ដែលបានបិទចោលសម្រាប់ថ្ងៃសៅរ៍ ។ លោករំពឹងថា កម្មវិធី TV5 Knock Out Series ដែលបានប្ដូរពេលទៅថ្ងៃសៅរ៍នេះ នឹងមានអ្នកទស្សនាដូចគ្នានឹងការធ្វើនៅថ្ងៃអាទិត្យ ខណៈដែលថ្ងៃបើកឆាកលោកថាក៏មានអ្នកទស្សនាច្រើនផងដែរ បើធៀបនឹងការរៀបចំដែលធ្លាប់ធ្វើឡើងនៅរាល់ថ្ងៃអាទិត្យ ។
ពាក់ព័ន្ធនឹងរូបមន្តប្រកួត លោកថា កីឡាករទាំង៣២រូបត្រូវកំណត់ឱ្យចាប់គូគ្នា ហើយឡើងប្រកួតចាញ់ធ្លាក់ៗជាដំណាក់ៗរហូតនៅសល់តែ២រូបចុងក្រោយ ដើម្បីប្រជែងគ្នាយកពានជើងឯក និងប្រាក់លានស្មើនឹង៤ពាន់ដុល្លារ ។ ការប្រកួតលើកទី១ គឺតម្រូវឱ្យជម្រុះយក១៦នាក់ដើម្បីបន្តទៅប្រកួតជម្រុះយក៨នាក់នៅវគ្គទី២ និងជម្រុះយក៤នាក់ចុងក្រោយបន្តទៀត ទៅកាន់វគ្គផ្ដាច់ព្រ័ត្រ ដើម្បីដណ្ដើមយកចំណាត់ថ្នាក់លេខ១ ដល់លេខ៤ ។ លោកថា មិនមានព្រឹត្តិការណ៍ណាមួយដែលមានសមាសភាពចូលប្រកួតរហូតដល់៣២រូប ហើយកំណត់ឱ្យប្រកួតចាញ់ធ្លាក់ៗបែបហ្នឹងនោះទេ ទើបលោកនៅតែយល់ឃើញថា ការលើកពេលមកធ្វើថ្ងៃសៅរ៍ គឺរឹតតែមានអ្នកទស្សនាកកកុញ ៕
ចែករំលែកព័តមាននេះ