កូនប្រុសទំនើងរបស់លោកដុកទ័រ ត្រូវបញ្ជូនទៅមណ្ឌលកែប្រែឱកាសខ្ញុំ
រាជធានីភ្នំពេញ ៖ លោក កែវ សុជាតិ ព្រះរាជអាជ្ញារងអមសាលាដំបូងរាជធានីភ្នំពេញ បានធ្វើការចោទប្រកាន់កូនប្រុសទំនើងរបស់លោកដុកទ័រ
រាជធានីភ្នំពេញ ៖ លោក កែវ សុជាតិ ព្រះរាជអាជ្ញារងអមសាលាដំបូងរាជធានីភ្នំពេញ បានធ្វើការចោទប្រកាន់កូនប្រុសទំនើងរបស់លោកដុកទ័រមានជម្លោះជាមួយឧត្តមសេនីយ៍ឯក នន្ទ សុខា មេបញ្ជាការរងកងរាជអាវុធហត្ថលើផ្ទៃប្រទេស ពីបទប្រើប្រាស់គ្រឿងញៀនដោយខុសច្បាប់ កាលពីព្រឹកថ្ងៃទី២២ វិច្ឆិកា ២០១៦ នេះ ។
លោកព្រះរាជអាជ្ញារងនៃអយ្យការអមសាលាដំបូងរាជធានីដែលកាន់សំណុំរឿងនេះក្រោយពីការចោទប្រកាន់ហើយ ក៏បានបញ្ជូនកូនប្រុសរបស់លោកដុកទ័ររូបនោះ ទៅដាក់មណ្ឌលអប់រំកែប្រែឱកាសខ្ញុំ ដើម្បីព្យាបាលជម្ងឺញៀនថ្នាំ(គ្រឿងញៀន) ។
សូមបញ្ជាក់ថា ក្រោយពីឃាត់ខ្លួនយុវជនឈ្មោះ ចាន់ សោភា អាយុ២៣ឆ្នាំ មន្ត្រីអាវុធហត្ថបានធ្វើការពិនិត្យទឹកនោមនៅព្រឹកថ្ងៃទី១៩ ខែវិច្ឆិកា កន្លងមកឃើញថាមានសារធាតុញៀន ។ ក្រោយពីពិនិត្យទឹកនោមរួចហើយ យុវជននេះក៏បានសារភាពខ្លួនឯងដែរថា ខ្លួនបានប្រើប្រាស់គ្រឿងញៀនផងដែរ ។ ការពិនិត្យទឹកនោមនេះធ្វើឡើងនៅទីបញ្ជាការអាវុធហត្ថក្រុងភ្នំពេញ ។
គួររម្លឺកថា រឿងក្តីកូនប្រុសលោកដុកទ័របានធ្វើឱ្យកក្រើកដល់បណ្តាញសង្គមហ្វេសប៊ុក បន្ទាប់ពីលោកដុកទ័របានបង្ហោះវីដេអូឃ្លីប ព្រមទាំងបង្ហាញពីទុក្ខវិយោគរបស់លោកដោយសារតែកូនជាទីស្រឡាញ់របស់លោក ត្រូវបានចាប់ខ្លួន និងខ្លួនឯងជាឪពុកបានគំរាមធ្វើអត្តឃាតផងដែរ ។ សម្រាប់សាធារណជន កាយវិការបស់លោកដុកទ័រនេះ មិនត្រូវបានទទួលការគាំទ្រនោះទេ ដោយសារតែរឿងរ៉ាវដែលបានកើតឡើង គឺផ្តើមចេញពីកូនប្រុសរបស់លោកជាជនទំនើបដែលព្រហើនកោងកាចគ្មានសុជីវធម៌ ។
យុវជនរូបនេះឈ្មោះ ចាន់ សោភា អាយុ២៣ឆ្នាំ ជាសិស្សយោធា ដែលទើបបញ្ចប់ និងត្រូវជាកូនលោកវេជ្ជបណ្ឌិតនៅមន្ទីរពេទ្យព្រះកុសុមៈ ដែលមានអាការ:ស្រវឹងស្រាខ្លាំង ព្រមទាំងជាអ្នកជក់ថ្នាំញៀនផង បានបើករថយន្តចង់បំបុករថយន្តរបស់លោកឧត្តមសេនីយ៍ឯក នន្ទ សុខា មេបញ្ជាការរងកងរាជអាវុធហត្ថលើផ្ទៃប្រទេស និងបង្កឲ្យមានការភ្ញាក់ផ្អើលកាលពីយប់ថ្ងៃទី១៨ វិច្ឆិកា ស្ថិតនៅម្តុំផ្សារថ្មី ខណ្ឌដូនពេញ រហូតមានអន្តរាគមន៍ពីកម្លាំងអាវុធហត្ថខណ្ឌ ចុះទៅតាមចាប់ខ្លួនយកមកដោះស្រាយតាមច្បាប់ ។
លោកឧត្តមសេនីយ៍ឯក នន្ទ សុខា មានប្រសាសន៍ថា មុនពេលកើតហេតុ រថយន្តរបស់ជនទំនើងនេះបានបើកថយ ហើយពេលនោះស្ទើរតែប៉ះរថយន្តរបស់លោក លោកក៏ចុចស៊ីផ្លេ។ ស្រាប់តែក្មេងស្ទាវចុចកញ្ចក់ ហើយស្រែកមកលោកថា «ឡានអញបុកឡានហ្អែងនៅ បើបុកអញសង ហ្អែងដឹងថា អញកូននរណាគេទេ? ចាំមើលអញបើកបុកហ្អែង! »។
មិនទាន់ស្រែកចប់ផង ស្រាប់តែយុវជននេះបានបើករថយន្តបំណងទៅបុកលោក និងអង្គរក្សមួយទំហឹង តែសំណាងល្អ លោកលោតគេចទាន់ ហើយបើករត់ ពេលនោះ លោកបើករថយន្តដេញតាមរហូតទាន់ ហើយដកកាំភ្លើងភ្ជង់ឱ្យឈប់ ។ ភ្លាមៗកម្លាំងអាវុធហត្ថខណ្ឌទៅដល់ ក៏ឃាត់យកទៅខណ្ឌភ្លាមៗតែម្តង ។ ទាក់ទិននឹងឥរិយាបថរបស់លោកដុកទ័រដែលគំរាមធ្វើអត្តឃាត ដេកឱបដាវសាម៉ូរ៉ៃ ក៏ត្រូវបានសម្តេចតេជោ Comment តាមបណ្តាញសង្គមផងដែរ ៕
ចែករំលែកព័តមាននេះ