ខេត្តបាត់ដំបង ៖ កម្លាំងសមត្ថកិច្ចបានកំណត់ថា បុរសម្នាក់ជាមុខសញ្ញាដ៏សកម្មក្នុងការដើរគាស់ផ្ទះប្រជាពលរដ្ឋ លួចទ្រព្យសម្បត្តិ ដោយត្រូវបានឃាត់ខ្លួន កាលពីវេលាម៉ោង០២ និង៣០នាទីរសៀលថ្ងៃទី២១ វិច្ឆិកា ស្ថិតនៅបន្ទប់ក្នុងផ្ទះសំណាក់មួយកន្លែង ភូមិកម្មករ សង្កាត់ស្វាយប៉ោ ក្រុងបាត់ដំបង ។
មន្ត្រីនគរបាលក្រុងបាត់ដំបងបាននិយាយថា ជនសង្ស័យឈ្មោះស៊ីម ទិត្យ អាយុ៣២ឆ្នាំ រស់នៅភូមិចំការសំរោង២ សង្កាត់ចំការសំរោង ក្រុងបាត់ដំបង ហើយត្រូវឃាត់ខ្លួនពេលកំពុងសំងំស្នាក់នៅក្នុងបន្ទប់ផ្ទះសំណាក់យីហោ «វល័ក្ខ» នៅភូមិ-ឃុំកើតហេតុខាងលើ ។
មន្ត្រីដដែលបន្តថា ជននេះត្រូវឃាត់ខ្លួនពាក់ព័ន្ធក្នុងករណីគាស់ផ្ទះប្រជាពលរដ្ឋមួយកន្លែង នៅភូមិកម្មករ សង្កាត់ស្វាយប៉ោ ដែលសង្ស័យថា បានប្រព្រឹត្តនៅចន្លោះពីម៉ោង១រំលងអធ្រាត្រ ទៅម៉ោង៥ទៀបភ្លឺថ្ងៃទី២០ វិច្ឆិកា ខណៈម្ចាស់ផ្ទះចាក់សោទ្វារទុក
ចោល។
បើតាមការបំភ្លឺពីម្ចាស់ផ្ទះឈ្មោះវ៉ាន់ រស្មី ភេទស្រី អាយុ២៣ឆ្នាំ បានប្រាប់សមត្ថកិច្ចថា ខ្លួនមិនបានស្នាក់នៅផ្ទះទេ នៅយប់កើតហេតុនោះ ប៉ុន្តែដឹងនៅព្រឹកឡើង ។ ម្ចាស់ផ្ទះរូបនេះបញ្ជាក់ថា ជនដៃដល់បានគាស់ទ្វារចូលលួចបានទូរស័ព្ទម៉ាកអាយហ្វូន៣គ្រឿង, លុយខ្មែរ៨ម៉ឺនរៀល, លុយ៨០០ដុល្លារ និងសម្ភារមួយចំនួនទៀត ។
ដោយឡែក ជនសង្ស័យបានសារភាពថា ខ្លូនពិតជាបានគាស់ផ្ទះជនរងគ្រោះខាងលើ លួចទ្រព្យសម្បត្តិមែន ។ ជននេះបានសារភាពទៀតថា កន្លងមកខ្លួន ធ្លាប់ធ្វើសកម្មភាពបែបនេះ តែមិនដែលលួចបានទ្រព្យសម្បត្តិធំដុំទេ។
លោកប៉ាង ហៀង អធិការក្រុងបាត់ដំបងបាននិយាយថា ជនសង្ស័យរូបនេះ ភាគច្រើនមិនសូវស្នាក់នៅផ្ទះរបស់ខ្លួនទេ។ ជននេះតែងស្នាក់នៅផ្ទះជួល ឬផ្ទះសំណាក់ ដើម្បីងាយស្រូលដើរធ្វើសកម្មភាពពេលយប់។ ជាមួយនឹងការឃាត់ខ្លួន មន្ត្រីជំនាញរឹបអូសបាននូវវត្ថុតាងមួយចំនួនរួមមាន ទូរស័ព្ទម៉ាកអាយហ្វូនគ្រប់ស៊េរីចំនូន១៦គ្រឿង, ថ្នាំញៀន, កាបូបលុយ, កូនសោ, ដង្កាប់, ម៉ា
ឡេត និងសម្ភារមួយចំនួន។
ចែករំលែកព័តមាននេះ