ខេត្តរតនគិរី ៖ យុវជនទំនើងចំនួន៦នាក់ ដែលកម្លាំងការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត បានឃាត់ខ្លួនពួកគេ ពាក់ព័ន្ធករណីដាក់បំពង់ស៊ីម៉ាំងម៉ូតូប្រែនៗនិងប្រើប្រាស់ចំពាមកៅស៊ូគ្រាប់ដែក ធ្វើសក្មភាពនៅវេលាម៉ោង១៧និង៣០នាទីល្ងាច ថ្ងៃទី១០ ខែមិថុនា ឆ្នាំ២០២២ ស្ថិតនៅក្នុងក្រុងបានលុងនោះ ត្រូវឱ្យត្រឡប់ទៅជួបជុំក្រុមគ្រួសារវិញ ហើយនារសៀលថ្ងៃទី១១ ខែមិថុនា ឆ្នាំ២០២២នេះ។
ប្រភពពីនគរបាលជំនាញបង្ក្រាបនោះ បានឱ្យដឹងថា ក្មេងទំនើងទាំង៦នាក់ ក្នុងនោះមាន ៖ ទី១- ឈ្មោះ សែត សេងឃាង ភេទប្រុស អាយុ១៩ឆ្នាំ ជនជាតិខ្មែរ រស់នៅភូមិថ្មី ឃុំទីងចាក់ ស្រុកបរកែវ ខេត្តរតនគិរី។ ទី២- ឈ្មោះ ប៉ុម រក្សវង្ស ភេទប្រុស អាយុ២១ឆ្នាំ ជនជាតិខ្មែរ មុខរបរបុគ្គលិក ABA រស់នៅភូមិជ្រីសង្កាត់យក្ខឡោម ក្រុងបានលុង ខេត្តរតនគិរី។
ទី៣-ឈ្មោះ ខុន ភារុន ភេទប្រុស អាយុ១៦ឆ្នាំ ជនជាតិខ្មែរ មុខរបរកសិករ រស់នៅភូមិតឺន ឃុំតឺន ស្រុកកូនមុំ ខេត្តរតនគិរី។ ទី៤- ឈ្មោះ ហេង ម៉ុងហាក់ ភេទប្រុស អាយុ២៨ឆ្នាំ ជនជាតិខ្មែរ មុខរបរជាងដែក រស់នៅភូមិអូរកន្ទិល សង្កាត់បឹងកន្សែង ក្រុងបានលុង ខេត្តរតនគិរី។ ទី៥-ឈ្មោះ ធៀក ផុង ភេទប្រុស អាយុ១៤ឆ្នាំ ជនជាតិគ្រឹង មុខរបរលាងឡានរស់នៅភូមិអូរកន្ទិលសង្កាត់បឹងកន្សែងក្រុងបានលុងខេត្តរតនគិរី(កាន់ជំពាមកៅស៊ូ)។ និង៦- ឈ្មោះ ឆេង រ៉ា ភេទប្រុស អាយុ១៩ឆ្នាំ ជនជាតិវៀតណាម មុខរបរជាងឈើរស់នៅភូមិជ័យជំនះសង្កាត់ឡាបានសៀក ក្រុងបានលុង ខេត្តរតនគិរី។
បន្ទាប់ពីបានឃាត់ខ្លួននាំមកសាកសួរនៅការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត ដើម្បីអប់រំ ណែនាំជាលើកទី១ និងនៅថ្ងៃទី១១ ខែមិថុនានេះ បានហៅអាណាព្យាបាលឱ្យមកធានាយកទៅអប់រំបន្ត និងអនុញ្ញាតិឱ្យត្រឡប់ទៅលំនៅដ្ឋានរៀងៗខ្លួនវិញហើយ៕
ចែករំលែកព័តមាននេះ