ចក្រភពអង់គ្លេស ៖ ក្រុមហ៊ុន Nintendo នឹងចេញហ្គេម Super Mario Run សម្រាប់ទូរស័ព្ទ iPhone និង iPad នៅទូទាំងពិភពលោក នាថ្ងៃទី១៥ ធ្នូ ខាងមុខ ។ ការចេញហ្គេមនេះ គឺជាព្រឹត្តិការណ៍មួយដែលមានការរង់ចាំពីមនុស្សជាច្រើនបន្ទាប់ពីហ្គេម Pokemon Go ។
វាជាហ្គេមទូរស័ព្ទដំបូងដែលមានតួអង្គដ៏ល្បីល្បាញរបស់ក្រុមហ៊ុន Nintendo ហើយនឹងត្រូវបានអនុញ្ញាតឲ្យទាញយកដោយឥតគិតថ្លៃ ខណៈការទិញដាច់តម្លៃ៩,៩៩ដុល្លារដើម្បីទទួលបានផ្នែកទាំងអស់នៃហ្គេមនេះ ។ ក្រុមហ៊ុនបាននិយាយក្នុងសេចក្តីថ្លែងការណ៍កាលពីថ្ងៃអង្គារថា ហ្គេម Super Mario Run នឹងមានជាភាសាអង់គ្លេស ជប៉ុន និងភាសាជាច្រើនទៀតផងដែរ ។
លោក Neil Campling អ្នកវិភាគក្នុង Northern Trust Capital Markets បានឲ្យដឹងថា ការទាក់ទាញអ្នកលេងតាមរយៈការទាញយកដោយឥតគិតថ្លៃ និងមានការទិញដាច់នេះ គឺជាយុទ្ធសាស្ត្រមួយដ៏ល្អរបស់ Nintendo ។ មានហ្គេមជោគជ័យជាច្រើនដូចជា Clash of Clans របស់ក្រុមហ៊ុន Supercell Oy ដែលប្រើប្រាស់យុទ្ធសាស្ត្រស្រដៀងគ្នានេះដែរ បានប្រទះឃើញអ្នកលេងចំណាយប្រាក់១០០ដុល្លារជារៀងរាល់ឆ្នាំ ។ តម្លៃរបស់ហ្គេម Super Mario Run ធ្វើឲ្យអ្នកលេងគិតថា ពួកគេទទួលបានចំណេញ។
គួរបញ្ជាក់ថា Super Mario Run គឺជាហ្គេមស្មាតហ្វូនលើកទី១ ដែលរួមមានតួអង្គដ៏ល្បីល្បាញរបស់ក្រុមហ៊ុន Nintendo ។ លោក Shigeru Miyamoto ជាមនុស្សម្នាក់ក្នុងចំណោមអ្នកដែលបង្កើតហ្គេម Mario ថែមទាំងបានបង្ហាញពីការលេងហ្គេមថ្មីនេះនាខែកញ្ញាកន្លងមក ក្នុងកម្មវិធីប្រចាំឆ្នាំរបស់ក្រុមហ៊ុន Apple ។
ការចេញហ្គេមថ្មីនេះ នឹងប្រព្រឹត្តទៅបន្ទាប់ពីហ្គេមដ៏ជោគជ័យគឺ Pokemon Go ត្រូវបានបង្កើតឡើងសម្រាប់ប្រព័ន្ធ iOS និង Android ដោយក្រុមហ៊ុន Niantic ក្នុង San Francisco រួមជាមួយក្រុមហ៊ុន Nintendo ផងដែរ និងមានការទាញយករាប់រយលានដងឯណោះ ។ នេះបើតាមក្រុមហ៊ុនផលិតហ្គេម ។
ជាមួយគ្នានេះ វិនិយោគិនក៏បានគាំទ្រដល់ការងាររបស់ក្រុមហ៊ុន Nintendo ទៅកាន់ផ្នែកទូរស័ព្ទដៃផងដែរ ដោយបានធ្វើឲ្យភាគហ៊ុនរបស់ក្រុមហ៊ុនកើនឡើងច្រើនជាង៤៨%ក្នុងឆ្នាំនេះ ។ ក្រុមហ៊ុន Nintendo ក៏មានគម្រោងចេញហ្គេម Animal Crossing និង Fire Emblem សម្រាប់ទូរស័ព្ទនាខែមីនា ខាងមុខផងដែរ ៕
ចែករំលែកព័តមាននេះ