សប្បុរសជប៉ុនជួយកសាងអគារសិក្សា និងបណ្ណាល័យ
ខេត្តកំពង់ឆ្នាំង ៖ អតីតសាលាបុណ្យដែលត្រូវបានគេបោះបង់ចោលជាច្រើនឆ្នាំមានសភាពចាស់ផងនោះបានក្លាយទៅជាសាលារៀនសម្រាប់ផ្តល់ចំណេះដឹងដល់សិស្សានុសិស្សដែលមានទីតាំងស្ថិតនៅ
ខេត្តកំពង់ឆ្នាំង ៖ អតីតសាលាបុណ្យដែលត្រូវបានគេបោះបង់ចោលជាច្រើនឆ្នាំមានសភាពចាស់ផងនោះបានក្លាយទៅជាសាលារៀនសម្រាប់ផ្តល់ចំណេះដឹងដល់សិស្សានុសិស្សដែលមានទីតាំងស្ថិតនៅភូមិស្តុកអាចម៌រមាស ឃុំតាំងក្រសាំង ស្រុកទឹកផុស ។ ពិតជាមានសំណាងត្រូវបានសប្បុរសជនប្រទេសជប៉ុនផ្តល់អគារសិក្សា១ខ្នង សាងសង់ពីបេតុងប្រក់ក្បឿង បន្ទប់ទឹក អណ្តូងទឹក ទោងក្មេងលេង ព្រមទាំងបណ្ណាល័យ១ខ្នងទៀត សម្រាប់ដាក់សៀវភៅឲ្យសិស្សអាន ដើម្បីបង្កើនចំណេះដឹង ។
លោក កោះ ច័ន្ទតារា នាយកសាលាបឋមសិក្សាស្តុកអាចម៌រមាស មានប្រសាសន៍ឲ្យដឹងនៅព្រឹកថ្ងៃទី១៨ ខែវិច្ឆិកា ឆ្នាំ២០១៦ថា រូបលោកបានចំណាយពេលវេលាច្រើន ដោយត្រូវធ្វើដំណើរចម្ងាយផ្លូវជាង៧គីឡូម៉ែត្រ ដើម្បីទៅបង្រៀនសិស្សនៅសាលាបឋមសិក្សាខ្លុងពពក រយៈពេល១៣ឆ្នាំក្រោយមកទៀត ក៏បានសុំទៅការិយាល័យអប់រំស្រុកទឹកផុស ដើម្បីសុំមកបង្រៀនសិស្សនៅក្បែរផ្ទះវិញ ដើម្បីឲ្យមានលក្ខណៈងាយស្រួលបន្តិចកុំឲ្យនឿយហត់ពេក ។
លោក កោះ ច័ន្ទតារា នាយកសាលាបឋមសិក្សាស្តុកអាចម៌រមាស មានប្រសាសន៍បន្តថា ក្នុងអំឡុងឆ្នាំ២០០៥ គឺរូបលោកបានចាប់ផ្តើមបង្រៀនសិស្សមានតែ១ថ្នាក់ទេ គឺថ្នាក់ទី១ ក្រោមដំបូលសាលាបុណ្យចាស់ដែលត្រូវបានគេបោះបង់ចោលនោះ ។ ហើយបន្តមកដល់ឆ្នាំ២០០៦ សិស្សបានកើនដល់ទៅ២ថ្នាក់បង្រៀនតែម្នាក់ឯង ឆ្នាំ២០០៧ បានកើនដល់ទៅ៣ថ្នាក់ ខ្វះគ្រូបង្រៀនត្រូវបានការិយាល័យអប់រំស្រុកបានផ្តល់គ្រូម្នាក់ឲ្យមកជួយបង្រៀន ។ បន្ទាប់មកទៀតនៅឆ្នាំ២០១១ ក្នុងពេលដែលរូបលោកកំពុងបង្រៀនសិស្សនោះ ស្រាប់តែមានអ្នកទេសចរណ៍ជនជាតិជប៉ុន១ក្រុម បានជិះកង់កម្សាន្តលេងកាត់តាមមុខសាលារៀន ដោយមានរថយន្តតួរីស១គ្រឿងបើកតាមពីខាងក្រោយ ប្រសិនណាបើជិះកង់អស់កម្លាំងពេកអាចនឹងឡើងជិះរថយន្តអង្គុយឲ្យបានស្រួលរួចនឹងបន្តដំណើរទៅមុខទៀត ។ តែនៅពេលដែលជិះហួសសាលារៀនបន្តិច បែរជាអ្នកទេសចរណ៍ជប៉ុននោះ បាននាំគ្នាត្រឡប់មកក្រោយដោយបានឈានជើងចូលក្នុងសាលារៀនរបស់លោក ដែលមានសភាពចាស់រខេករខាក ហាក់បីដូចជាមាននិស្ស័យដោយបានសួរនាំរូបលោក រួមទាំងមានអ្នកបកប្រែខ្មែរម្នាក់ផងដែរ។ ក្នុងពេលដែលសួរសំណេះសំណាលចុះឡើងក៏អ្នកទេសចរណ៍ជប៉ុន បានសន្យានឹងផ្តល់អគារសិក្សាថ្មី១ខ្នងសាងសង់អំពីបេតុងប្រក់ក្បឿងមាន៥បន្ទប់ ដោយមានសេចក្តីត្រេកអរក្នុងចិត្តមិនថា ត្រឹមតែគ្រូ ក៏ដូចជាមាតាបិតាសិស្ស បានរៀបចំបែបបទ ដើម្បីសុំដីពីអាជ្ញាពាក់ព័ន្ធដែលមានទទឹងទំហំ៦០ម៉ែត្រ និងបណ្តោយ៧០ម៉ែត្រ រួមទាំងការិយល័យអប់រំស្រុក និងខេត្ត ។
១សប្តាហ៍ក្រោយមកបន្ទាប់ពីបានសន្យាក្រុមសាងសង់សាលារៀនរបស់ជប៉ុនបានដឹកសម្ភារមក ដើម្បីស្ថាបនាសាលារៀន១ខ្នងមែន នៅថ្ងៃទី១៤ ឧសភា ២០១២ សាលារៀនបានសង់រួចនឹងដាក់ឲ្យសម្ពោធជាផ្លូវការ ។ ដោយឃើញនូវកង្វះខាតនោះសមាគមជំនួយខ្មែនៃសតវត្សទី២១ រួមនឹងសមាគមខូបិយូណេស្កូរបស់ជប៉ុន បានបន្តជួយបន្ថែមទៀត មានបន្ទប់ទឹកបង្គន់អានាម័យ អណ្តូងស្នប់ ទោងសម្រាប់ក្មេងជិះលេង តារាងបាល់ទាត់ និងចុងក្រោយបានជួយផ្តល់បណ្តាល័យ១ខ្នងទៀតថ្មីស្រឡាង សម្រាប់ដាក់សៀវភៅឲ្យសិស្សអាន ត្រូវបានដាក់សម្ពោធឲ្យប្រើប្រាស់នៅព្រឹកថ្ងៃទី១៨ វិច្ឆិកា ២០១៦ រួមទាំងការផ្តល់នូវអាហារថ្ងៃត្រង់របស់ជប៉ុនដែលមានរស់ជាតិឆ្ងាញ់ផង សម្រាប់ឲ្យសិស្សទទួលទានផងដែរ ។ រាល់ថ្ងៃដោយមានកំណើនសិស្សពីមួយឆ្នាំទៅមួយឆ្នាំនោះ រូបលោកនូវមានកង្វះខាតអគារសិក្សា១ខ្នងទៀត មាន៣បន្ទប់សម្រាប់ថ្នាក់មត្តេយ្យ២បន្ទប់ និងការិយាល័យ១បន្ទប់ ទើបអាចបំពេញតម្រូវការបានគ្រប់គ្រាន់។
លោក កាតូយុ ស៊ីអុ ប្រធានសមាគមខូបយូណេស្កូ មានប្រសាសន៍ឲ្យដឹងថា រូបលោកធ្លាប់បានធ្វើដំណើរមកកាន់សាលាបឋមសិក្សាស្តុកអាចម៌រមាសនេះ ចំនួន៤ទៅ៥ដងមកហើយ ដើម្បីផ្តល់នូវសមិទ្ធផលនានាមានការខ្វះខាត ទើបបានត្រឡប់ទៅប្រទេសជប៉ុនវិញ រៃអង្គាសលុយពីប្រជាជនជប៉ុននិងសមាគមរបស់លោកបានលុយមកកសាងសាលារៀន ។ ហើយនៅថ្ងៃនេះ (១៨ វិច្ឆិកា ២០១៦) បានមកសម្ពោធបណ្ណាល័យ១ខ្នង ជាមួយនឹងសិស្សជប៉ុន និងសមាជិកក្រុមការងារ១៩នាក់ ក្នុងពេលមកឃើញស្នាមញញឹមរបស់សិស្សតូចៗ រូបលោកពិតជាមានក្តីសប្បាយរីករាយ។ ហើយសូមឲ្យចៅៗត្រូវតែប្រឹងប្រែងរៀនសូត្រ ក្នុងការអានសៀវភៅនៅបណ្ណាល័យ ជាមួយនោះសប្បុរសជនជប៉ុនបានផ្តល់ជូននូវអាហារថ្ងៃត្រង់ស្រស់ស្រូបជាមួយគ្នាផងដែរ ៕
ចែករំលែកព័តមាននេះ