ខេត្តព្រះសីហនុ ៖ ជនសង្ស័យម្នាក់បានត្រូវសមត្ថកិច្ចការិយាល័យកណ្តាលនគរបាលព្រហ្មទណ្ឌនៃស្នងការដ្ឋានខេត្ត ឃាត់ខ្លួនកាលពីវេលាម៉ោង៧យប់ ថ្ងៃទី២១ មីនា នៅចំណុចភូមិថ្មី (ភូមិ៣) សង្កាត់លេខ៣ ក្រុងព្រះសីហនុ ពីបទចោរកម្ម និងសម្លាប់ជនជាតិអ៊ីតាលី ។
យោងតាមលោកវរសេនីយ៍ត្រី ខេង សុផល អនុប្រធានការិយាល័យកណ្តាលនគរបាលព្រហ្មទណ្ឌខេត្តបានឱ្យដឹងថា ការឃាត់ខ្លួននេះ គឺធ្វើឡើងតាមពាក្យបណ្តឹងរបស់ជនរងគ្រោះឈ្មោះកុល វណ្ណាលី ភេទស្រី អាយុ២១ឆ្នាំ មានទីលំនៅក្រុម១៧ ភូមិ២ សង្កាត់លេខ៣ ក្រុងព្រះសីហនុ ដែលបានបាត់សំភាររួមមានទូរស័ព្ទចំនួន២គ្រឿង ម៉ាកអាយហ្វូន និងទូរស័ព្ទម៉ាកណូគៀ ចំនួន២គ្រឿង កាបូបដាក់លុយចំនួន១ ក្នុងនោះមានលុយចំនួន៩០០ដុល្លារ ក្រវិលប្លាទីនចំនួន១គូ និងក្បាលខ្សែក្រវាត់ចំនួន១ កាលពីវេលាម៉ោង២រំលងអធ្រាត្រឈានចូលថ្ងៃទី២១ មីនា។
ប្រភពដដែលបានបន្តទៀតថា ជនសង្ស័យដែលឃាត់ខ្លួននេះឈ្មោះញឹម ឡាយ ភេទប្រុស អាយុ១៩ឆ្នាំ មុខរបរ និងទីលំនៅមិនពិតប្រាកដ។ អ្វីដែលគួរឱ្យកត់សំគាល់និងជាមោទនភាពនាពេលនេះ គឺកម្លាំងជំនាញយើងបំបែកសំណុំរឿងបានចំនួន២ ក្នុងពេលតែមួយ ដែលសំណុំរឿងទី១ គឺចោរកម្ម និងសំណុំរឿងទី២ គឺប្លន់សម្លាប់ជនជាតិអ៊ីតាលី លោក RICCIARINI អាយុ៥២ឆ្នាំ កាលពីថ្ងៃទី៨ កុម្ភៈ ឆ្នាំ២០១១នៅចំណុចក្រុមទី១១ ភូមិ២ សង្កាត់លេខ៣ ក្រុងព្រះសីហនុ ។
យោងតាមចម្លើយសារភាពរបស់ជនសង្ស័យបានឱ្យដឹងថា ករណីលួចសំភារ និងប្លន់សម្លាប់ជនបរទេសនោះ គឺខ្លួនជាអ្នកប្រព្រឹត្តដោយកាលនោះខ្លួនគ្មានបំណងសម្លាប់ទេគឺចូលក្នុងផ្ទះជនបរទេសនោះក្នុងបំណងលួចសំភារ តែដោយសារជនបរទេសតដៃខ្លួនក៏យកឈើជ្រុងវាយសម្លាប់តែម្តង ។ បន្ទាប់ពីសម្លាប់រួច ខ្លួនក៏ប្រមូលលុយ ទូរស័ព្ទដៃ និងកុំព្យូទ័រយួរដៃមួយគ្រឿង ។ ជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនទៅតុលាការ ៕
ចែករំលែកព័តមាននេះ