ការកំណត់តម្លៃលក់ផ្ទះ រាប់ជាចំណុចសំខាន់ដែលអ្នកលក់តែងកង្វល់ចិត្តថា នឹងលក់ប៉ុន្មានល្អ ហើយមិនខាតទុន ។ អ្នកខ្លះបានកំណត់តម្លៃខ្ពស់ខ្លាំងពេក ដោយសង្ឃឹមនឹងទទួលបានចំណេញច្រើន រហូតធ្វើឱ្យលក់យឺតយ៉ាវ
ការកំណត់តម្លៃលក់ផ្ទះ រាប់ជាចំណុចសំខាន់ដែលអ្នកលក់តែងកង្វល់ចិត្តថា នឹងលក់ប៉ុន្មានល្អ ហើយមិនខាតទុន ។ អ្នកខ្លះបានកំណត់តម្លៃខ្ពស់ខ្លាំងពេក ដោយសង្ឃឹមនឹងទទួលបានចំណេញច្រើន រហូតធ្វើឱ្យលក់យឺតយ៉ាវ ឬលក់មិនដាច់ ហើយខ្លះទៀតកំណត់តម្លៃទាបរហូតដល់មើលមិនឃើញប្រាក់ចំណេញ ។ ដូច្នេះ ការកំណត់តម្លៃលក់ត្រូវអាស្រ័យលើគោលការណ៍រួម និងគណនាលើមូលដ្ឋានការពិត ។ តម្លៃផ្ទះមានដូចជា ៖
*តម្លៃដើមដែលទិញមក ៖ គិតត្រឡប់ក្រោយថា អ្នកទិញមកក្នុងតម្លៃប៉ុន្មាន ហើយទីតាំងនេះមានសក្តានុពលក្នុងការដំឡើងថ្លៃប៉ុន្មានភាគរយក្នុង១ឆ្នាំ ។
*ថ្លៃតុបតែង និងជួសជុល ៖ មើលតាមសភាពថា ផ្ទះនេះបានជួសជុលអ្វីមកខ្លះ ឬមានការថែមថយអ្វីដែលបង្កើតតម្លៃឡើងបានទៀតដូចជា ពង្រីកផ្ទះបាយ១បន្ទប់ទៀត ។
*តម្លៃទីផ្សារ ៖ ស្ទង់មើលផ្ទះផ្សេងទៀតដែលមានលក្ខណៈស្រដៀងនឹងផ្ទះអ្នក ដើម្បីប្រៀបធៀបមើលថា បើសិនជាផ្ទះអ្នក គួរតែលក់ក្នុងតម្លៃប៉ុន្មាន ដូចជា ផ្ទះដែលមានទំហំប្រហាក់ប្រហែលគ្នា ប៉ុន្តែស្ថិតនៅចុងផ្លូវ ចូលទៅជ្រៅ លក់តម្លៃ៥លានបាត ។ ប៉ុន្តែផ្ទះរបស់អ្នកស្ថិតស្ថិតនៅដើមផ្លូវ ងាយស្រួលជាង អាចលក់ប្រមាណ៥,២-៥,៣លានបាត។
*ពន្ធ ៖ ជាទូទៅ អ្នកលក់នឹងត្រូវចំណាយលើការចាយវាយក្នុងការលក់ដូចជា ពន្ធលើប្រាក់ដែលបានមក ។
*ការប្រាក់កម្ចី ៖ ក្រៅពីថ្លៃដើមដែលទិញមកហើយ កុំភ្លេចការប្រាក់ដែលអ្នកបង់ទៅធនាគារនាពេលកន្លងមកដូចជា ទិញផ្ទះមក១០ឆ្នាំ ចំណាយលើការប្រាក់អស់៤០%នៃប្រាក់ដើម។ ដូច្នេះ ការប្រាក់ដែលចំណាយអស់១០ឆ្នាំ ត្រូវរួមបញ្ចូលទៅក្នុងតម្លៃលក់ផងដែរ ។
ការកំណត់តម្លៃលក់ផ្ទះមានចំណុចលម្អិត៨យ៉ាងដូចជា ៖
១-គណនាតាមអនឡាញ ៖
បច្ចុប្បន្ន មានវែបសាយជាច្រើនដែលអាចគណនាតាមអនឡាញ និងដឹងពីតម្លៃទីផ្សារលំនៅឋានដែលប្រកាសលក់ ។ វាជាការចាប់ផ្តើមក្នុងការសិក្សាព័ត៌មានការលក់ដែលល្អបំផុត ទាំងឆាប់រហ័ស ងាយ និងមិនអស់ថ្លៃចំណាយផ្សេងៗ ហើយអាចជួយសន្សំសំចៃពេលវេលាក្នុងការស្ទង់មើលតម្លៃទីផ្សារទៀតផង ។ វាជួយឱ្យឃើញតម្លៃរបស់ការលក់ផ្សេងទៀតក្នុងទីតាំងដូចគ្នា និងក្បែរខាងថា មានការប្រកាសលក់បែបណាខ្លះ ។
២-គិតថាខ្លួនជាអ្នកទិញ ៖
ខណៈដែលដាក់តម្លៃលក់ អ្នកកំពុងគិតក្នុងឋានៈជាអ្នកលក់ ពិតណាស់ អ្នកសង្ឃឹមថា នឹងទទួលបានប្រាក់ចំណេញច្រើន និងចង់លក់ក្នុងតម្លៃខ្ពស់បំផុត ។ វាអាចធ្វើឱ្យផ្ទះរបស់អ្នកលក់ដោយលំបាក ។ បើអាចគិតថា យើងជាអ្នកទិញវិញ គឺនៅតែមានអារម្មណ៍ថា តម្លៃនេះសមហេតុផលនឹងទិញឬអត់ ។ បើអាចគិតបានទាំង២យ៉ាងបែបនេះ នឹងធ្វើឱ្យការកំណត់តម្លៃត្រូវចំណុចកណ្តាល និងសមហេតុផលច្រើនបំផុត ។
៣-រកចំណុចប្រៀបធៀបជាមួយគូប្រជែង៖
គូប្រជែងក្នុងទីនេះ គឺសំដៅដល់ផ្ទះផ្សេងទៀតដែលប្រកាសលក់ក្នុងបរិវេណជិតៗ ។ ដូចបានបកស្រាយហើយថា ការកំណត់តម្លៃលក់ គួរអាស្រ័យលើតម្លៃទីផ្សារ ព្រោះអ្នកទិញនឹងស្ទង់មើលទីផ្សារ ហើយនៅពេលដឹងតម្លៃទីផ្សារត្រួសៗហើយ បើអ្នកដាក់តម្លៃខ្ពស់ជាងទីផ្សារនោះ ក៏នឹងធ្វើឱ្យការលក់លំបាកដែរ ។ លើកលែងតែផ្ទះអ្នកមានចំណុចលេចធ្លោដែលគូប្រជែងគ្មាន ដូចជា ទីតាំងនៅកាច់ជ្រុង ប្រើសម្ភារមានតម្លៃពេញផ្ទះ ព្រមទាំងគ្រឿងសង្ហារិមជាដើម ។ ចំណុចខ្លាំងទាំងនេះ ជាអ្វីដែលអ្នកដឹងច្បាស់បំផុត និងអាចចរចាជាមួយអ្នកទិញបាន ។
៤-វែកញែករវាងការលក់តាមឈ្មួញកណ្តាល និងខ្លួនឯង ៖
ចំណុចមួយត្រូវសង្កេត គឺផ្ទះនេះលក់តាមរយៈឈ្មួញកណ្តាល ឬលក់ដោយខ្លួនឯង ព្រោះការលក់ទាំង២យ៉ាងនឹងធ្វើឱ្យតម្លៃខុសគ្នា ។ បើអ្នកលក់តាមឈ្មួញកណ្តាល ភាគច្រើននឹងមានការចំណាយ៣%ទៅលើពួកគេ ហើយធ្វើឱ្យផ្ទះមានតម្លៃថ្លៃ ។ ប៉ុន្តែបើអ្នកលក់ដោយខ្លួនឯង គឺតម្លៃនឹងស្មើទីផ្សារ ។
៥-ប្រឹក្សាជាមួយអ្នកជំនាញ ៖
បើអ្នកមិនស្ថិតនៅក្នុងក្រុមអចលនទ្រព្យ ឬមិនធ្លាប់តាមដានព័ត៌មានអំពីអចលនទ្រព្យពីមុននោះ អាចជារឿងលំបាក និងចាប់ចុងសំយុងគល់មិនសូវត្រូវ ។ បើអ្នកស្គាល់មនុស្សដែលអាចណែនាំទៅលើរឿងនេះបាន គួរប្រឹក្សាជាមួយពួកគេឱ្យបានច្រើន ដើម្បីមិនឱ្យកើតរឿងខុសឆ្គងនៅពេលលក់ផ្ទះ ។
៦-ចរចាតម្លៃ ៖
ត្រូវត្រៀមចិត្តថា អ្នកទិញនឹងសុំបញ្ចុះតម្លៃយ៉ាងពិតប្រាកដ មិនថាអ្នកដាក់តម្លៃស្មើ ឬទាបជាងទីផ្សារ ។ ដូច្នេះ គួរតែដាក់តម្លៃឱ្យគេអាចសុំបញ្ចុះប្រមាណ៥%-១០%យ៉ាងតិច សម្រាប់ពេលបញ្ចុះតម្លៃនោះនឹងមិនបាត់បង់ប្រាក់ចំណេញខ្លាំងពេក ។
៧-រួមថ្លៃចំណាយផ្សេងៗ ៖
អ្វីដែលអ្នកលក់ផ្ទះតែងភ្លាត់បំផុតនោះ គឺមិនបានបូកបញ្ចូលនូវថ្លៃចំណាយផ្សេងៗជាមួយតម្លៃផ្ទះ ។ ដូចបាននិយាយខាងដើមហើយថា តម្លៃផ្ទះ ក្រៅពីតម្លៃដើមជាមួយថ្លៃលើទីផ្សារហើយ កុំភ្លេចបញ្ចូលថ្លៃចំណាយផ្សេងៗផងដូចជា ការជួសជុល ថ្លៃតុបតែង ថ្លៃពន្ធ និងការប្រាក់ជាដើម ។
៨-ជួសជុលផ្ទះដើម្បីលក់បានថ្លៃ ៖
ការជួសជុលនូវចំណុចចាំបាច់ក្នុងផ្ទះ នឹងជួយដល់ការកំណត់តម្លៃលក់បានខ្ពស់។ ក្រៅពីនេះ ការតុបតែងផ្ទះឱ្យមើលទៅថ្មី នឹងអាចជំរុញអ្នកទិញធ្វើការសម្រេចចិត្តដោយងាយ ដូចជា ជួសជុលប្រព័ន្ធភ្លើងឱ្យប្រើបានទាំងអស់ ឬជួសជុលប្រព័ន្ធទឹកមិនឱ្យជ្រាប និងលាបពណ៌ថ្មី ។ ទាំងនេះជាកត្តាសំខាន់ នឹងជួយបំពេញតម្លៃផ្ទះឱ្យខ្ពស់ ព្រមទាំងបិទបាំងចំណុចខ្សោយរបស់ផ្ទះទៀតផង ប៉ុន្តែកុំភ្លេចបូកថ្លៃជួសជុល ឬតុបតែងទៅក្នុងតម្លៃលក់ផងដែរ ៕
ចែករំលែកព័តមាននេះ