រាជធានីភ្នំពេញ ៖ អតីតអ្នកបើកបររថយន្តក្រុងរបស់ក្រុមហ៊ុន កាពីតូល ចំនួន៣០នាក់តំណាងឱ្យគ្នាចំនួន៤៥នាក់ បានលើកគ្នាយកញត្តិមួយច្បាប់មកដាក់ជូនខុទ្ទការល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីសុំការអន្តរាគមន៍ពីសម្តេចទៅអាជ្ញាធរ និង នាយកក្រុមហ៊ុន កាពីតូល ដឹកជញ្ជូនអ្នកដំណើរ ទទួលយកថ្នាក់ដឹកនាំ និងសមាជិកសហជីពចំនួន ៤៥ រូប ឲ្យបានចូលបំពេញការងារ និងប្រាក់រំលឹក ដោយបញ្ឈប់ការរើសអើងផងដែរ។
ការដាក់ញាត្តិសុំការអន្តរាគមន៍នេះដែរ បានធ្វើឡើងកាលពីវេលាម៉ោង ៨ និង៤៥នាទីព្រឹក ថ្ងៃទី១៨ ខែវិច្ឆិកា ឆ្នាំ២០១៦ នៅត្រង់ចំណុចដើមពោធិ មុខវត្តបុទមវតី ផ្លូវស៊ូស្រ៊ុន ក្នុងសង្កាត់ចតុមុខ ខណ្ឌដូនពេញ។ តាមប្រភពពីអ្នកតំណាងម្នាក់បានរៀបរាប់ប្រាប់ថា ក្រោយពីក្រុមហ៊ុន កាពីតូល ដឹកញ្ជូនអ្នកដំណើរបានធ្វើការបញ្ឈប់បុគ្គលិក ដែលជាក្រុមអ្នកបើកបររថយន្តក្រុងចំនួន ៤៥នាក់ ជាបន្តបន្ទាប់ កាលពីពេលកន្លងមកនេះ និងនៅមិនមានដំណោះស្រាយ ។
ក្នុងពេលនេះដែររូបលោកក៏ដូចជាអ្នកតំណាងដទៃទៀតបានយកញាត្តិមួយច្បាប់មកដាក់ជូនខុទ្ទកាល័យរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីសុំឲ្យសម្តេចជួយធ្វើអន្តរាគមន៍ទៅជាជ្ញាធរ នាយកក្រុមហ៊ុនខាងលើទទួលយកថ្នាក់ដឹកនាំ និងសមាជិកសហជីពចំនួន ៤៥រូប ចូលធ្វើការវិញ និងគិតប្រាក់រំលឹក ដោយបញ្ឈប់ការើសអើងផងដែរ។ យើងខ្ញុំទាំងអស់គ្នាជាកម្មករនិយោជិក នៃក្រុមហ៊ុន កាពីតូល ដឹកអ្នកដំណើរ មានកិត្តិយសសូមជម្រាបជូនសម្តេចតេជោ មេត្តាជ្រាបថា (ក្រុមហ៊ុន កាពីតូល មានអាសយដ្ឋានស្ថិតនៅផ្ទះលេខ ១៤ AEo ផ្លុវលេខ១៨២ សង្កាត់បឹងព្រលឹត ខណ្ឌ៧មករា រាជធានីភ្នំពេញ) ដោយក្រុមហ៊ុននេះ បានរំលោភច្បាប់ជាតិ និងអន្តរាជាតិ ស្តីពីលក្ខខណ្ឌការងារជាច្រើនឆ្នាំមកហើយ។
នៅថ្ងៃទី០៨ ខែកក្កដា ឆ្នាំ២០១៥ កម្មករនិយោជិកបានបង្កើតសហជីព ពេលនោះក្រុមហ៊ុនបានរើសអើងសហជីពយ៉ាងពេញទំហឹង និងបញ្ឈប់ថ្នាក់ដឹកនាំសហជីពចំនួន ៥រូប នៅថ្ងៃទី១០ ខែកក្កដា ឆ្នាំ២០១៥ ។ ដោយមូលហេតុកាត់បន្ថយបុគ្គលិក បន្ទាប់មកកម្មករនិយោជិកក៏ផ្ទុះការតវ៉ាប្រឆាំងទៅនឹងក្រុមហ៊ុនកើតឡើងតែម្តង។ តាមប្រភពដដែលបានប្រាប់បន្តទៀតថា តែការតវ៉ានេះត្រូវបានក្រសួងការងារ និងបណ្តុះបណ្តាលវិជ្ជាជីវៈ បានស្នើសុំឱ្យកម្មករចូលធ្វើការឡើងវិញ នៅថ្ងៃទី២៣ ខែកក្កដា ឆ្នាំ២០១៥ ហើយក្រុមប្រឹក្សាអាជ្ញាកណ្តាល និងសាលារាជធានីភ្នំពេញ ក៏បានបង្គាប់ឲ្យកម្មករចូលធ្វើការជាបន្តបន្ទាប់នៅថ្ងៃខាងមុខៗវិញផងដែរ។ ដោយតម្រូវឲ្យកម្មករនិយោជិកបញ្ឈប់ការធ្វើកូដកម្ម និងចូលធ្វើការតាមធម្មតាដោយឥតលក្ខខណ្ឌ ពេលនោះកម្មករនិយោជិក បានឯកភាពចូលបម្រើការវិញ។
ផ្ទុយទៅវិញ ពេលដែលកម្មករនិយោជិតចូលធ្វើការទៅតាមការស្នើសុំពីបញ្ហាបង្គាប់របស់ស្ថាប័នទាំង៣ខាងលើនោះ ស្រាប់តែនិយោជកតម្រូវឲ្យនិយោជិកដាក់ពាក្យសុំចូលបម្រើការជាថ្មីឡើងវិញជូនក្រុមហ៊ុនជាមុនសិន ទើបក្រុមហ៊ុនអនុញ្ញាតឲ្យចូលធ្វើការ។ ដោយហេតុនោះហើយបានជាពួកគាត់នាំគ្នាធ្វើការតវ៉ា រហូតដល់កាប្រើអំពើរហិង្សាមកលើពួកគាត់ បណ្តាលឲ្យរងរបួសជាច្រើនាក់ និងចាប់ឃាត់ខ្លួនជាបន្តបន្ទាប់ក៏មានរហូតទៅដល់ ៤៥នាក់ និងរហូតមកទល់នឹងពេលនេះទើបពួកគាត់សុំឲ្យមានការអន្តារគមន៍អំពីសំណាក់សម្តេចតេជោឲ្យជួយអន្តរាគមន៍ ឲ្យពួកគាត់បានចូលបម្រើការងារវិញផង។
ក្នុងការដាក់ញាត្តិសុំការអន្តរាគមន៍របស់អ្នកតំណាងទាំង ៣០នាក់ ក្នុងចំណោមគ្នា ៤៥នាក់របស់អតីតអ្នកបើកបររថយន្តក្រុងរបស់ក្រុមហ៊ុនដឹកអ្នកដំណើរក្រុមហ៊ុន កាពីតូល នោះដែរ ត្រូវបានមន្ត្រីរបស់ខុទ្ទការល័យសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានទទួលយកហើយ ទើបធ្វើការរំសាយទៅផ្ទះវិញរៀងៗខ្លួន៕
ចែករំលែកព័តមាននេះ