កសិករផ្លាស់ប្ដូរពីការធ្វើស្រូវទៅធ្វើដំណាំឈូកវិញម្តង
- បាត់ដំបង
ខេត្តបាត់ដំបង៖ «ឈូក» គឺជាដំណាំម្យ៉ាងដែលងាយដាំ និងងាយថែទាំបំផុត នៅក្នុងទឹកឬភក់។ វាផ្ដល់ផលប្រយោជន៍ច្រើនយ៉ាងដល់មនុស្ស គឺ «ផ្កា ផ្លែ និងក្រអៅ…
ខេត្តបាត់ដំបង៖ «ឈូក» គឺជាដំណាំម្យ៉ាងដែលងាយដាំ និងងាយថែទាំបំផុត នៅក្នុងទឹកឬភក់។ វាផ្ដល់ផលប្រយោជន៍ច្រើនយ៉ាងដល់មនុស្ស គឺ «ផ្កា ផ្លែ និងក្រអៅ ឬមើម» សម្រាប់យកទៅលក់លើទីផ្សារធ្វើជាអាហាររបស់មនុស្ស ឬយកទៅកែច្នៃធ្វើជាគ្រឿងបរិភោគផ្សេងៗទៀត ។ ដោយសារតែដំណាំ«ឈូក»មានទីផ្សារល្អ ងាយស្រួលដាំដុះ ងាយស្រូលថែទាំ និងផ្ដល់ទិន្នផលល្អប្រសើរ និង បានយូរអ្វែងជាងដំណាំស្រូវ ទើបរយៈពេល០២ឆ្នាំចុងក្រោយនេះ គេឃើញកសិករមួយចំនួន រស់នៅក្នុងឃុំតាគ្រាម និងឃុំស្នឹង ស្រុកបានណន់ បាននាំគ្នាផ្លាស់ប្ដូរដីស្រែពីការធ្វើដំណាំស្រូវ ទៅដាំដំណាំឈូកវិញ រហូតកសិករខ្លះស្វះស្វែងរកជួលដីស្រែគេ ដើម្បីសម្រុកដាំដំណាំឈូកនេះ
ទៀតផង។
កសិករដាំឈូកម្នាក់រស់នៅភូមិតាង៉ែន ឃុំតាគ្រាម លោក ចាន់ វិន អាយុ៥១ឆ្នាំ បានផ្ដល់បទសម្ភាសន៍ជាមួយកោះសន្តិភាពថា សព្វថ្ងៃនេះ គាត់មានដំាំណាំឈូកចំនួន០៤ហិកតា នៅចំណុច«ភ្នំដំបងវែង» ស្ថិតក្នុងភូមិតាង៉ែន ឃុំតាគ្រាម ប៉ែកខាងត្បូងតំបន់ទេសចរណ៍«អាងកំពីងពួយ» ដែលទើបដាំបានរយៈពេល០២ឆ្នាំកន្លងទៅនេះ ហើយពេលនេះគាត់កំពុងប្រមូលផលបាន០២ខែហើយ។ នៅខាងមុខកូនខ្ទមតូចមួយ កសិកររូបនេះបានលើកឡើងថា កសិករដែលធ្វើស្រូវមួយចំនួនកំពុងផ្ដោតខ្លាំងទៅលើដំណាំឈូកនេះ ព្រោះវាមានទីផ្សារល្អជាដំណាំស្រូវ ។ គាត់បាន
បញ្ជាក់ថា បច្ចុប្បន្ននេះ ដំណាំឈូកដែលប្រជាកសិករសម្រុកដាំច្រើនបំផុត គឺនៅតំបន់ប៉ែកខាងត្បូង «អាងកំពីងពួយ»។
កសិករខ្លះដាំលើដីខ្លួនឯង តែមួយចំនួនធំជួលដីគេដាំ។ តំបន់ប៉ែកខាងត្បូងនៃ «អាងកំពីង» គឺផ្នែកខ្លះស្ថិតក្នុងទឹកដី ភូមិបឹងក្រសាល ឃុំស្នឹង ស្រុកបាណន់ និងផ្នែកខ្លះទៀត ស្ថិតក្នុងទឹកដី ភូមិតាង៉ែន ឃុំតាគ្រាម ស្រុកបាណន់ដែរ ។ បើយើងទៅដល់ទីនោះ គេឃើញមានដំណាំឈូករាប់សិបហិកតាលាតសន្ធឹងដាច់កន្ទុយភ្នែកពីទិសខាងកើត ទៅទិសខាងលិចតាមបណ្ដោយ នៃទំនប់អាងកំពីងពួយប៉ែកខាងត្បូង ។ នេះជារដូវដែលកសិករកំពុងមមារញឹកខ្លាំងក្នុងការប្រមូលផល ។ ផ្លែឈូកទុំគេបេះយកគ្រាប់ថ្លឹងលក់ រីឯផ្លែឈូកចាស់គេបេះយកទៅស្ងោរលក់ ឬ លក់ផ្លែឆៅ រីឯក្រអៅ ឬ មើមឈូកគេបេះយកលក់ធ្វើជាម្ហូបអាហារផ្សេងៗ ។ អ្នកភូមិបឹងក្រសាល ដែលពីមុនមកធ្លាប់តែបង្កបង្កើនផលស្រូវតាមប្រពៃណី ស្រាប់តែពេលនេះកសិករមួយចំនួនបានបោះបង់ស្រូវ បែរជាមកចាប់យកដំណាំឈូកយ៉ាងពេញទំហឹងទៅវិញ ។
ជាងមួយឆ្នាំកន្លងទៅនេះ គេឃើញអ្នកភូមិនេះបានផ្លាសប្ដូរដីពីការធ្វើស្រូវ ងាកទៅដាំឈូកវិញ
គួរឲ្យកត់សម្គាល់។ កសិករដាំឈូកនៅក្នុងភូមិនេះបាននិយាយថា បើផ្អែកលើទីផ្សារ រវាងផលស្រូវ និង ផលឈូកនាសព្វថ្ងៃនេះ គឺ តំលៃឈូកល្អជាងតំលៃស្រូវឆ្ងាយណាស់ ដោយសារខុសគ្នាស្រឡះបែបនេះហើយ ទើបអ្នកភូមិមួយចំនួននាំគ្នាប្ដូរពីស្រូវ មកដាំឈូកវិញ។ ពួកគេបានពន្យល់ថា ដំាំណាំស្រូវចំណាយទុនច្រើនដូចជា ថ្លៃពូជ ថ្លៃជី ថ្លៃភ្ជួររាល់ និង ថ្លៃច្រូតកាត់ ហើយធ្វើម្ដងប្រមូលផលបានតែម្ដងប៉ុណ្ណោះ រីឯតំលៃទីផ្សារទាបស្ទើរតែមិនអាចរួចថ្លៃចំណាយ ។ ដោយឡែកដំាំណាំឈូកវិញ មិនចំណាយទុនច្រើន ឬ ប្រើពេលថែទាំដូចស្រូវទេ ហើយធ្វើតែម្ដង(ដាំ) ប្រមូលផលបានច្រើនឆ្នាំ រីឯទីផ្សារមានតំលៃល្អ បើសិនជាធ្លាក់ថ្លៃក៏មិនប៉ះពាល់ធ្ងន់ធ្ងរដូចស្រូវដែរ។
បើតាមកសិករដាំឈូកបានអះអាងប្រហាក់ប្រហែលគ្នាថា សព្វថ្ងៃឈ្មួញបានដើរទិញគ្រាប់ឈូកដល់ចំការ តែតំលៃហាក់មិនសូវស្ថិតស្ថេរទេ។ ប៉ុន្តែតំលៃជាធម្មតាដែលឈ្មួញកំពុងដើរប្រមូលទិញគ្រាប់ឈូកទុំ នាសព្វថ្ងៃនេះចន្លោះពី៦០០០រៀល ទៅ៦៥០០រៀល ក្នុង១គីឡូក្រាម តែពេលខ្លះក៏អាចលើងថ្លៃជាងនេះ ឬ ទាបជាងនេះដែរ (ឡើងចុះដោយខែ)។ កសិករនិយមដាំឈូក បានបង្ហាញពីទិន្នផលស្រូវ និងទិន្នផលឈូកថា បើប្រៀបធៀបទិន្នផលស្រូវ និង ទិន្នផលឈូក លើផ្ទៃដី០១ហិចតា ដំណាំស្រូវទទូលបានទិន្នផលស្រូវចន្លោះពី៣តោនទៅ៣,៥តោនប៉ុណ្ណោះ ហើយតំលៃមិនលើសពី១លានរៀលទេ ក្នុង០១តោន។ ប៉ុន្តែបើនិយាយពីទិន្នផលឈូកវិញ ផ្ទៃដី១ហិចតាដូចគ្នា ទទួលបានទិន្នផលចន្លោះពី១តោនទៅ១,៥តោន ។
បើទូទាត់តំលៃលើទីផ្សា គឺ ផលឈូកល្អជាងផលស្រូវ។ គុណសម្បត្តិ នៃដំណាំឈូក គឺដាំរយៈពេលខ្លីបានប្រមូលផល និងប្រមូលបានរយៈយូរអង្វែង ខុសពីស្រូវដែលធ្វើម្ដងប្រមូលបានតែម្ដង ហើយថែមទាំងចំណាយទុនច្រើនទៀត។ ដូច្នេះហើយ ទើបប្រជាកសិករមួយចំនួនដែលមានដីធ្វើស្រែ ងាកប្ដូរមកដាំឈូកជំនួសដំណាំស្រូវវិញ។ មិនតែប៉ុណ្ណោះ កសិករខ្លះទៀត បានស្វះស្វែងរកជួលដីគេបន្ថែម ដើម្បីដាំដំណាំឈូកនេះទៀតផង។ បើតាមការអះអាងរបស់កសិករបានបញ្ជាក់ថា បច្ចុប្បន្ន ដំណាំឈូកកំពុងពេញនិយមបំផុត ដែលកសិករបាននិងកំពុងដាំរាប់រយហិកតា ស្ថិតនៅប៉ែកខាងត្បូង នៃតំបន់ទេសចរណ៍ «អាងកំពីងពួយ» ខណៈដំណាំឈូកនេះ ដែលពីមុនមកគេនិយមដាំច្រើនបំផុតនៅក្នុង «អាងកំពីងពួយ» ពេលនេះ ត្រូវហិនហោចស្ទើរដាច់ពូជដោយសារសត្វខ្យងចង្រៃស៊ីបំផ្លាញ (ខ្យងក្រហម) ៕
ចែករំលែកព័តមាននេះ