រាជធានីភ្នំពេញ ៖ នៅព្រឹកថ្ងៃអាទិត្យទី២០ វិច្ឆិកា ខានស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ត្រូវគេរំពឹងថា នឹងកក្រើកទៀតហើយ ជាមួយវត្តមានកីឡាករកម្ពុជា២រូបគឺយុគ យក្សផ្លែ និងសេក គឹមរួន ប្រកួត
រាជធានីភ្នំពេញ ៖ នៅព្រឹកថ្ងៃអាទិត្យទី២០ វិច្ឆិកា ខានស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ត្រូវគេរំពឹងថា នឹងកក្រើកទៀតហើយ ជាមួយវត្តមានកីឡាករកម្ពុជា២រូបគឺយុគ យក្សផ្លែ និងសេក គឹមរួន ប្រកួតជាមួយជើងខ្លាំងថៃ២រូប ។ កីឡាករកម្ពុជាសុទ្ធតែបង្ហាញពីទឹកចិត្តចង់បំបាក់កីឡាករថៃ ខណៈកីឡាករថៃវិញក៏បានប្រកាសបែបនេះដូចគ្នា ដូច្នេះមានតែការប្រកួតជាក់ស្ដែងប៉ុណ្ណោះទើបដឹងពីលទ្ធផល ។
ការប្រកួតដែលនឹងធ្វើឡើងចាប់ពីម៉ោង៨ព្រឹកក្រោមការរៀបចំរបស់ទូរទស្សន៍អាស៊ីអាគ្នេយ៍នេះ ត្រូវគេឃើញមានការរំពឹងខ្ពស់ថានឹងក្លាយជាជំនួបស៊ីសាច់ហុតឈាមរបស់កីឡាករគូអន្តរជាតិទាំង៤ ដោយសារតែភាពជាក់ស្ដែងគឺព្រឹត្តិការណ៍នេះដំណើរការចំពេលថ្ងៃអាទិត្យថ្ងៃសម្រាក ដែលមានអ្នកទស្សនាយ៉ាងកកកុញស្រាប់ ។ អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិមួយនេះឲ្យពួកគេប្រកួតគ្នា។ ក្នុងនោះភាគីកីឡាករកម្ពុជាបានទាំងសុំខ្លួនឯងសាកកណ្ដាប់ដៃគ្នាតាំងពីឮមានការផ្គូផ្គងនោះផង ។
លោក ញាណ សុធី អ្នករៀបចំកម្មវិធីប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ យុគ យក្សផ្លែ ដែលជាកីឡាករកូនភ្លោះ និងទើបប្ដូរមកជ្រកក្នុងក្លិបបូរីរាជសីហ៍មានរិទ្ធ ឱ្យឡើងប៉ះប្រកួតជាមួយកីឡាកថៃឈ្មោះខច សានឡេក ក្នុងនាមជាគូបើកឆាកសម្រាប់ប្រដាល់អន្តរជាតិនៅព្រឹកថ្ងៃអាទិត្យស្អែក ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះតែម្ដង ។ លោកថា កីឡាករកម្ពុជាគូនេះ អាចចាត់ទុកថាជាជំនួបជើងខ្លាំងប៉ះជើងខ្លាំងនៅក្នុងព្រឹត្តិការណ៍ចម្រុះអន្តរជាតិនៅក្នុងពិភពប្រដាល់ ។ លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជារូបនេះ ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ បើទោះជាកីឡាករថៃមានសមត្ថភាពមិនអាចមើលស្រាលក្ដី ។ លោកនិយាយថា កីឡាករថៃខ្លាំងប៉ុន្តែលោកនៅតែទុកចិត្តលើយុគ យក្សផ្លែ បើទោះជាមួយរយៈមុនគេមិនសូវបានឡើងរេញ ដែលបណ្ដាលឱ្យមានការភ័យបារម្ភរឿងធ្លាក់ដៃ។ លោកថា កីឡាករថៃខច សានឡេក ធ្លាប់ប្រកួត៧៩លើក ឈ្នះ៦៨លើក ចាញ់៩លើក និងស្មើ២លើក ក្នុងពេលដែលកីឡាករកម្ពុជា ធ្លាប់ប្រកួត១៤៤លើក ឈ្នះ១២៥លើក ចាញ់១៤លើក និងស្មើ៥លើក ដែលនេះគឺជាប្រវត្តិប្រកួតច្រើនជាងដាច់ឆ្ងាយ បើធៀបនឹងកីឡាករថៃទើបលោកទុកចិត្តពីជ័យជម្នះ។ ទោះបីយ៉ាងណា កីឡាករថៃដ្បិតថាប្រកួតបានតិចជាង តែសមត្ថភាពប្រកួតរបស់គេក៏មិនអន់នោះទេជាពិសេសគឺកម្លាំងស៊ុហ្វ និងភាពរហ័ស។
សម្រាប់កីឡាករ សេក គឹមរួន លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងថៃឈ្មោះភេច ណាំអេក នៅក្នុងព្រឹត្តិការណ៍ប្រដាល់អន្តរជាតិនៅព្រឹកថ្ងៃអាទិត្យនោះដែរ។ លោកថា ការប្រកួតរបស់គូនេះ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលសេក គឹមរួន ក៏មានការធ្លាក់ដៃជាងមុន ដែលធ្វើឱ្យអ្នកគាំទ្របាត់បង់ទំនុកចិត្តអស់មួយសន្ធឹក ។ កីឡាករថៃធ្លាប់ប្រកួត៨៥លើក ឈ្នះ៦៧លើក ចាញ់១៦លើក និងស្មើ២លើក រីឯកីឡាករកម្ពុជាធ្លាប់ប្រកួត៧៥លើក ឈ្នះ៦២លើក និងចាញ់១៣លើក។ នៅក្នុងព្រឹត្តិការណ៍ប្រដាល់ពេលរសៀលនៅលើសង្វៀនទូរទស្សន៍អាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិរវាងកីឡាករជើងខ្លាំងនិងជើងខ្លាំងផងដែរ ៕
ចែករំលែកព័តមាននេះ