រាជធានីភ្នំពេញ ៖ កីឡាករ ឡុង ជិន មកពីក្លិបខ្លារខិនមានរិទ្ធ និងកីឡាករ សុខ វាសនា មកពីក្លិបឃ្លាំងមឿងកីឡាខេត្តពោធិ៍សាត់ ត្រូវបានគេរៀបចំឱ្យជួបប្រកួតជា
មួយកីឡាករថៃជាលើកដំបូងនៅលើសង្វៀនទូរទស្សន៍
រាជធានីភ្នំពេញ ៖ កីឡាករ ឡុង ជិន មកពីក្លិបខ្លារខិនមានរិទ្ធ និងកីឡាករ សុខ វាសនា មកពីក្លិបឃ្លាំងមឿងកីឡាខេត្តពោធិ៍សាត់ ត្រូវបានគេរៀបចំឱ្យជួបប្រកួតជា
មួយកីឡាករថៃជាលើកដំបូងនៅលើសង្វៀនទូរទស្សន៍ស៊ីអិនស៊ីថ្ងៃអាទិត្យទី២០ វិច្ឆិកា ខានស្អែកនេះ ។ អ្នកនិយមទស្សនាកីឡាប្រដាល់ភាគច្រើនកំពុងទន្ទឹងរង់ចាំមើល ថាតើកីឡាករកម្ពុជាទាំងពីររូបនេះទៅរួចអត់ ខណៈកីឡាករថៃត្រូវគេដឹងថាមានសមត្ថភាពពិបាកផ្ដួលអីុចឹងនោះ។
ឡុង ជិន ដែលធ្លាប់ប្រកួតបាន៣៤ដង ឈ្នះ២៦ដង ចាញ់៥ដង និងស្មើ៣ដង ត្រូវជួបប្រកួតជាមួយកីឡាករថៃឈ្មោះភិត អេក លូកណងយ៉ាយធៀម ក្នុងប្រភេទទម្ងន់៥៧
គីឡូក្រាម ។ កីឡាករថៃរូបនេះធ្លាប់ប្រកួតបានដល់ទៅ៨០ដង ឈ្នះ៦០ដង ចាញ់១៨ដង ស្មើ២ដង និងផ្ដួលគូប្រកួតឱ្យសន្លប់បាន១០ដង។ ឡុង ជិន ទើបតែបង្ហាញខ្លួននៅលើសង្វៀនអន្តរជាតិជាលើកទី១បែរជាមកប៉ះដៃគូជាជើងខ្លាំងមានប្រវត្តិប្រកួតច្រើនជាងពាក់កណ្ដាល ។ ម្យ៉ាងមួយរយៈនេះ ឡុង ជិន មិនសូវឃើញលេចមុខនៅលើសង្វៀន
ញឹកញាប់ទៀតផង ទើបការប្រកួតលើកនេះពិបាកសង្ឃឹមបន្តិចហើយ ។
មួយគូអន្តរជាតិទៀត កីឡាករ សុខ វាសនា ដែលធ្លាប់ប្រកួតបាន៤២ដង ឈ្នះ៣១ដង ចាញ់៨ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន៩ដង នឹងត្រូវជួបប្រកួតជាមួយកីឡាករថៃ ឈ្មោះវ៉ាត់ ធារ៉ាក់ដេត ស.ដានឆ័យ ក្នុងប្រភេទទម្ងន់៦០គីឡូក្រាម។ កីឡាករថៃរូបនេះធ្លាប់ប្រកួតបាន៨៤ដង ឈ្នះ៦២ដង ចាញ់១៧ដង ស្មើ៥ដង និងធ្លាប់
ផ្ដួលគូប្រកួតឱ្យសន្លប់បាន២០ដង ។ យោងតាមប្រវត្តិប្រកួតរវាងកីឡាករទាំងពីរបង្ហាញឱ្យឃើញថាកីឡាករកម្ពុជាហាក់ចាញ់ប្រៀបកីឡាករថៃច្រើន ដូច្នេះ សុខ វាសនា មិនអាចធ្វេសប្រហែសបានឡើយ បើមិនដូច្នោះទេគឺពិបាកសង្ឃឹមខ្លាំងណាស់ ។
ក្រៅពីគូអន្តរជាតិទាំង២គូនេះទៅ នៅលើសង្វៀនដដែលក៏មានការប្រកួតរវាងកីឡាករកម្ពុជា និងកម្ពុជាចំនួន៤គូទៀត។ កីឡាករ សុខ កាន មកពីក្លិបឃ្លាំងមឿងកីឡា ត្រូវជួបប្រកួតជាមួយកីឡាករ សិទ្ធ លីដា មកពីក្លិបសាមគ្គីកូនខ្មែរ ។ កីឡាករ ឡុង សុធា មកពីក្លិបខ្លារខិនមានរិទ្ធ ប្រកួតជាមួយកីឡាករ ធន់ អៀងឡៃ មកពីសមាគមកីឡាប្រដាល់ក្រសួងការពារជាតិ ។ កីឡាករ រៀវ ចំណាប់ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ នឹម នន មកពីក្លិបកងទ័ពឆត្រយោង៩១១ និងគូចុងក្រោយ កីឡាករ ណាក់ សុខា មកពីក្លិបសុភានូមានជ័យ ប្រកួតជាមួយកីឡាករ ជា កំសត់ មកពីក្លិបកងពលតូចលេខ៧០ ៕
ចែករំលែកព័តមាននេះ