រាជធានីភ្នំពេញ ៖ ស្ត្រីមេម៉ាយម្នាក់ដែលមានកូនរហូត៥នាក់ក្នុងបន្ទុក បានលើកដៃសំពះសុំឱ្យសប្បុរសជននានាមេត្តាជួយឧបត្ថម្ភដល់កូននាងម្តងទៀត ដែលកន្លងមកស្ត្រីមេម៉ាយរូបនេះធ្លាប់បានទទួលនូវការជួយឧបត្ថម្ភក្នុងគ្រាដ៏លំបាកម្តងមកហើយពីសប្បុរសជន ។ នាងជាស្ត្រីមេម៉ាយត្រូវប្តីចុះចោលទៅមានប្រពន្ធចុង ហើយបោះបង់រូបនាង និងកូនឱ្យរស់នៅកំព្រាក្នុងស្ថានភាព ជីវភាពលំបាកលំបិន និងខ្វះខាតយ៉ាងខ្លាំង ។
នាងគ្មានការងារ និងមុខរបរអ្វីធំដុំ ដើម្បីរកលុយមកផ្គត់ផ្គង់ក្នុងគ្រួសារ សំរាប់ទិញបាយឱ្យកូនហូប និងឱ្យកូនបានទៅរៀនសូត្រដូចគ្រួសារដទៃឡើយ គឺនាងធ្វើជាសន្តិសុខរោងចក្រ កាត់ដេរ ប៉ុន្តែការងារនោះមិនជាប់លាប់ឡើយ ធ្វើបានតែមួយរយៈប៉ុណ្ណោះ ឯពេលនេះនាងត្រូវបានគេបញ្ឈប់ដោយថៅកែប្រាប់ថា គ្មានការងារធ្វើ រោងចក្រត្រូវផ្អាក មិនត្រូវការអ្នកយាមទៀតទេ ។ ដោយសារតែបែបនេះហើយទើបធ្វើឱ្យនាងជួបការលំបាកគ្មានលុយទិញអង្ករដាំបាយឱ្យកូនហូប គ្មានលុយសំរាប់ឱ្យកូនទៅរៀន និងគ្មានលុយថ្លៃជួលផ្ទះទៀតផង ។
ស្ត្រីរូបនេះបាននិយាយថា នាងឈ្មោះឡាំង បុប្ផា អាយុ៣៥ឆ្នាំ មានកូនស្រី៥នាក់ និងមានស្រុកកំណើតក្នុងភូមិភ្នំ ឃុំកំពង់ភ្នំ ស្រុកលើកដែក ខេត្តកណ្តាល ។ ប្តីរបស់នាងឈ្មោះស៊ឺ លីហៀង អាយុ៥៥ឆ្នាំ បានចុះចោលនាងទៅមានស្រីថ្មីទៀត តាំងពីឆ្នាំ២០០៨មកម៉្លេះ ដែលពេលនោះនាងមានផ្ទៃពោះកូនស្រីពៅ ។ ស្ត្រីរូបនេះបានបន្តទៀតថា ក្រោយពេលប្តីចាកចោលនាងបានចាកចេញពីស្រុកកំណើតមកស្នាក់នៅបន្ទប់លេខ៦ ផ្ទះជួល អគារលេខ៥៤ សួនឧស្សាហកម្មកាណាឌីយ៉ា ភូមិត្រពាំងថ្លឹង សង្កាត់ចោមចៅ ខណ្ឌដង្កោ ដោយធ្វើជាសន្តិសុខយាមរោងចក្រ ។
ស្ត្រីរូបនេះបានបន្តទៀតថា ផ្ទះជួលដែលនាងស្នាក់នៅ១ខែ ១៥ដុល្លារ បូករួមជាមួយថ្លៃទឹក និងថ្លៃភ្លើងផង១ខែអស់ជាង២០ដុល្លារ ប៉ុណ្ណោះ ប៉ុន្តែដោយសារនាងគ្មានលទ្ធភាពទើបពេលដល់ខែម្តងៗគ្មានលុយឱ្យថ្លៃជួលផ្ទះ ឯម្ចាស់ផ្ទះស្ទើរតែលែងចង់ឱ្យស្នាក់នៅទៅហើយ ។ ពេលនេះនាងសុំអង្វរករដល់សប្បុរសជននានាមេត្តាជួយដល់នាងផង ហើយការខ្វះខាតនេះមិនមែនបានន័យថា នាងមិនខំប្រឹងរកស៊ីនោះទេ គឺនាងបានដើររកការងារធ្វើដែរ ប៉ុន្តែរកពុំទាន់បាននៅឡើយ ៕
ចែករំលែកព័តមាននេះ