ខេត្តព្រះសីហនុ ៖ លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុបានឱ្យដឹងថា ក្នុងឱកាសបុណ្យអុំទូក៣ថ្ងៃ ភ្ញៀវទេសចរបានធ្វើដំណើរទៅកម្សាន្តនៅតាមបណ្ដាកោះនានា ពិសេសកោះរ៉ុង មានចំនួន ៨.១២៧នាក់ ក្នុងនោះភ្ញៀវទេសចរជាតិមានចំនួន៥.៣០៩នាក់ និងភ្ញៀវទេសចរអន្តរជាតិមានចំនួន២.៨១៨នាក់ ។ ដោយឡែកភ្ញៀវទេសចរមកតាមជើងយន្តហោះមានចំនួន១៩ជើង មានភ្ញៀវសរុបចំនួន ៩១១នាក់ ។
លោកប្រធានមន្ទីរទេសចរណ៍ខេត្តព្រះសីហនុ បានឱ្យដឹងបន្តថា ការថយចុះនៃចំនួនទេសចរមកលេងកម្សាន្តខេត្តព្រះសីហនុ ក្នុងឱកាសពិធីបុណ្យអុំទូករយៈពេល៣ថ្ងៃនៅខេត្តព្រះសីហនុ ដោយសារតំបន់ទេសចរណ៍នៅកម្ពុជាមានច្រើនកន្លែងមានដូចជាអង្គរវត្ត ខេត្តសៀមរាប ភូមិភាគឦសាន ។ ម្យ៉ាងទៀតដោយសារគោលនយោបាយរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានផ្លូវមានសង្ឃឹម ធ្វើឱ្យប្រជាពលរដ្ឋធ្វើដំណើរទៅលេងកម្សាន្តតំបន់ភូមិភាគឦសាន មានការកើនឡើងផងដែរ ។
លោក តាំង សុចិត្តគ្រឹស្នា បន្តទៀតថា ខេត្តព្រះសីហនុ រាជរដ្ឋាភិបាលកម្ពុជាបានចាត់ទុកជាគោលដៅទេសចរណ៍ និងសេដ្ឋកិច្ច ដោយមានកំពង់ផែអន្តរជាតិទឹកជ្រៅ តំបន់ពាណិជ្ជកម្ម ឧស្សាហកម្ម កសិកម្ម និងទេសចរណ៍ ។ ពិសេសខេត្តព្រះសីហនុមានតំបន់សេដ្ឋកិច្ចពិសេសបិតត្រាំង ក្រុងព្រះសីហនុ ទាក់ទាញវិនិយោគិនបរទេសមកបោះទីតាំងជាង១០០រោងចក្រ ហើយសង្ឃឹមថា នៅឆ្នាំខាងមុខនឹងទទួលបានវិនិយោគិនកាន់តែច្រើនឡើងបន្ថែមទៀត ៕
ចែករំលែកព័តមាននេះ