កសិករសម្រុកដាំត្រសក់ទ្រើង ជាងដំណាំផ្សេងៗ នៅតំបន់ទេសចរណ៍ «អាងកំពូងពួយ»
- បាត់ដំបង
ប្រជាកសិករជាច្រើនគ្រួសារ ដែលមានមុខរបរដាំដំណាំវិលជុំនៅក្នុងទឹកដីឃុំតាគ្រាម និងឃុំស្នឹង ស្រុកបាណន់ ស្ថិតនៅប៉ែកខាងត្បូងតំបន់ទេសចរណ៍
ខេត្តបាត់ដំបង ៖ ប្រជាកសិករជាច្រើនគ្រួសារ ដែលមានមុខរបរដាំដំណាំវិលជុំនៅក្នុងទឹកដីឃុំតាគ្រាម និងឃុំស្នឹង ស្រុកបាណន់ ស្ថិតនៅប៉ែកខាងត្បូងតំបន់ទេសចរណ៍ «អាងកំពូងពួយ» បាននាំគ្នាសម្រុកដាំបន្លែត្រសក់រាប់សិបហិចតា ដោយពួកគេរំពឹងថា នឹងមានទីផ្សារល្អនៅពេលដល់ថ្ងៃប្រមូលផលនាពេលដ៏ខ្លីខាងមុខនេះ។
បើតាមកសិករម្នាក់មានឈ្មោះ នៅ បៀន អាយុ៤១ឆ្នាំ ដែលមានមុខរបរដាំដំណាំវិលជុំនេះជាប្រចាំ បាននិយាយថា បន្លែត្រសក់ហាក់មានទីផ្សារល្អជាងគេក្នុងចំណោមបន្លែជាច្រើនមុខ ដែលគាត់ និងកសិករដទៃទៀតបានដាំ។ លោកថា នេះជាពេលវេលាដែលកសិករកំពុងសម្រុកដាំត្រសក់ បើទោះជាដំណាំនេះ មានតំលៃទីផ្សារមិនទៀងទាត់ក្ដី តែកសិករភាគច្រើនរំពឹងថា នឹងមានទីផ្សារល្អពេលប្រមូលផល។ ដំណាំត្រសក់មានរយៈពេលត្រឹមជាង១ខែបន្តិចប៉ុណ្ណោះ កសិករនឹងចាប់ផ្ដើមប្រមូលផលលក់ដោយគិតចាប់ពីថ្ងៃចាប់ផ្ដើមដាំ។ នេះបើតាមការអះអាងរបស់កសិកដែលនិយមដាំបន្លែលក់នៅក្បែរតំបន់ទេសចរណ៍ «អាងកំពីងពួយ»។ ប៉ុន្តែកសិករត្រូវចំណាយទុនច្រើនគួរសម ក្នុងការដាំដំណាំនេះ តែកសិករក៏អាចទទួលបានផលចំណេញច្រើនគួរសមដែរ ប្រសិនបើទីផ្សារមានតំលៃល្អដូចសព្វថ្ងៃនេះ។
លោក នៅ បៀន ដែលកំពុងដើរពិនិត្យមើលកម្មករតុបតែងទ្រើងត្រសក់នៅលើផ្ទៃដីចំនួន០៧រ៉ៃ បានប្រាប់ថា «ដំណាំត្រសក់របស់ខ្ញុំ ដាំបានជិត២សប្ដាហ៍ហើយ ហើយនឹងត្រូវចាប់ផ្ដើមប្រមូលផល ក្នុងអំឡុងពេលជាង១សប្ដាហ៍ខាងមុខទៀតនេះ»។
តើពេលនេះកសិករនិយមដាំដំណាំអ្វីច្រើនជាងគេ?
កសិកររូបនេះ បានផ្ដល់ចម្លើយដោយគ្មានស្ទាក់ស្ទើរថា «ពេលនេះ ខែនេះ ភាគច្រើនកសិករដាំត្រសក់ ហើយបើតាមខ្ញុំដឹងនៅតំបន់នេះ មានកសិករបាននាំគ្នាដាំត្រសក់លើផ្ទៃដីយ៉ាងតិចជាង១០ហិចតា តែនៅមានដំណាំដទៃទៀត ដូចជា ម្រះ និងត្រឡាច តែមិនច្រើនដូចដំណាំត្រសក់ទេ»។
បើតាមការសាកសួរអំពីមូលហេតុ ដែលនាំឲ្យកសិករនាំគ្នាសម្រុកដាំដំណាំត្រសក់នៅពេលនេះ កសិករភាគច្រើនហាក់មានជំនឿថា «បន្លែត្រសក់ នៅតែមានទីផ្សារល្អ ហើយបើទោះជាតម្លៃធ្លាក់ទាបជាងការរំពឹងទុកបន្តិច ក៏អាចទប់ទល់នឹងទុនចំណាយបានដែរ» នេះជាហេតុផល ដែលនាំឲ្យកសិករនៅតំបន់នោះ នាំគ្នាសម្រុកដាំដំណាំត្រសក់នាពេលនេះ ខណៈដំណាំដទៃទៀតត្រូវផ្អាក់ដាំមួយអន្លឺសិន។
លោក នៅ បៀន ដែលមានបទពិសោធន៍ដាំដំណាំជាច្រើនឆ្នាំកន្លងទៅនេះ បានរៀបរាប់អំពីខ្ទង់ចំណាយ និងទិន្នផលដែលប្រមូលបានយ៉ាងដូច្នេះថា «ផ្ទៃដីខ្ញុំដាំត្រសក់នៅពេលនេះមានទំហំ០៧រ៉ៃ។ ខ្ញុំត្រូវចំណាយទុនប្រមាណ៣០០០ដុល្លារ ដើម្បីទិញពូជ ទិញជី ទិញសម្ភារៈស្រោចស្រប សម្ភារៈកសិកម្មដទៃទៀត រួមទាំងថ្លៃកម្មករតុបតែងទ្រើងផង លុះដល់ថ្ងៃប្រមូលផល ខ្ញុំត្រូវចំណាយលើកម្មករបេះទៀត»។ ដូច្នេះយើងត្រូវចំណាយទុនច្រើនគួរសមដែរ។
ប៉ុន្តែកសិករដែលមានបទពិសោធដាំបន្លែរូបនេះ បានបញ្ជាក់ថា សព្វថ្ងៃតម្លៃត្រសក់អាចលក់បានចន្លោះពី១៥០០រៀល ទៅ ២០០០រៀលក្នុង១គីឡូក្រាម តែមិនទៀងទាត់ទេ វាអាស្រ័យលើដល់ខែប្រមូលផលជាក់ស្ដែង ជូនកាលអាចឡើងថ្លៃជាងនេះ ឬ ធ្លាក់ចុះជាងនេះ។
កសិករបាននិយាយថា ការដាំដំណាំត្រសក់ក្នុងអំឡុងខែនេះ មិនសូវទទួលបានផលច្រើនទេ។ ក្នុងផ្ទៃដី១ហិចតាអាចប្រមូលផលបានចន្លោះពី២០តោនទៅ២៥តោន តែបើដាំចាប់ពីអំឡុងខែតុលាឡើងទៅ ដំណាំនេះអាចទទួលបាលទិន្នផលខ្ពស់ក្នុងចន្លោះតោនទៅ៥០តោន។
យ៉ាងណាក្ដី ពាក់ព័ន្ធនឹងដំណាំត្រសក់នេះ បើតាមកសិករដែលមានបទពិសោធន៍ច្រើន លោក នៅ បៀន បានបង្ហាញពីការប្រឈមសំខាន់ៗក្នុងការប្រកបមុខរបរដាំបន្លែត្រសក់នេះថា ដំណាំត្រសក់អាចប្រឈមនឹងផលវិបាកចំនួន០២ ដែលកសិករប្រឈមនឹងការខាតបង់។ ដោយទី១ ដំណាំត្រសក់ប្រឈមនឹងសត្វល្អិតដែលយើងពីបាកថែទាំបន្តិច និងទី២ បើប៉ះចំរដូវភ្លៀងជោកជាំ ដំណាំនេះអាចរលាកស្លឹក និងដើម ដែលនាំឲ្យការលូតលាសមិនបានល្អ ទទួលបានទិន្នផលតិច ប៉ុន្តែយ៉ាងណា ក៏កសិករមិនខាតបង់រហូតដាច់ដើមដែរ ប្រសិនបើទីផ្សារនៅមានតម្លៃស្ថេរដូចសព្វថ្ងៃនេះ៕
ចែករំលែកព័តមាននេះ