(ត្បូងឃ្មុំ)៖ ដើមពោធិ៍អ្នកតាក្រហម.កដួលរលើងទាំងឬស ស្ថិតនៅភូមិជើងខាល ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ នាពេលកន្លងទៅ ដោយសារតែបាតុភូតធម្មជាតិខ្យល់កន្ត្រាក់ ហើយត្រូវបានកម្លាំងរដ្ឋបាលព្រៃឈើ សហការជាមួយអាជ្ញាធរមូលដ្ឋានរួមទាំងស្ថាប័នជំនាញ បានធ្វើការស្ទូចដាំដុះឡើងវិញរហូតដល់ពេលនេះ បានចេញស្លឹកត្រួយខ្ចីជាបណ្ដើរៗ រហូតមកដល់ព្រឹកថ្ងៃទី១០ មិថុនា ឆ្នាំ២០២២ ត្រូវបានឯកឧត្តមបណ្ឌិតជាម ច័ន្ទសោភ័ណ អភិបាលខេត្ត និងលោកជំទាវ ព្រមទាំងសហការីជាច្រើននាក់ បានរៀបចំពិធីក្រុងពាលីបញ្ចុះបឋមសីលាសាងសង់អាស្រមអ្នកតាក្រហម.ក និងធ្វើរបងព័ទ្ធជុំវិញទីតាំងប្រវត្តិសាស្ត្រទំុទាវនេះ ដើម្បីទាក់ទេភ្ញៀវទេសចរឲ្យមកចូលកម្សាន្តលេង។
ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តបានគូសបញ្ជាក់ថា កន្លងទៅ ទីតាំងនេះមិនទាន់បានរៀបចំឲ្យមានសោភណ្ឌភាពល្អគួរឱ្យកត់សម្គាល់នៅឡើយទេ ហើយម្យ៉ាងទៀតភ្ញៀវទេសចរមួយចំនួនក៏មិនបានស្គាល់ពីទីតាំងនេះច្បាស់នោះនៅឡើយដែរ ទើបធ្វើឲ្យតំបន់ទេសចរណ៍ប្រវត្តិសាស្ត្រមួយនេះ ត្រូវបានគេមើលរំលង ប៉ុន្តែចាប់ពីគ្រានេះតទៅ អាជ្ញាធររួមជាមួយជំនាញមន្ទីរវប្បធម៌ខេត្តនឹងរៀបចំប្រែក្លាយឱ្យទៅជាកន្លែងទាក់ទាញសម្រាប់ភ្ញៀវជាតិ និងអន្តរជាតិមកទស្សនាកម្សាន្ត ។
គួររំលឹកថា លោកកួ ហុក ប្រធានមន្ទីរវប្បធម៌និងវិចិត្រសិល្បៈខេត្តត្បូងឃ្មុំឲ្យថា ឯកឧត្តមអភិបាលខេត្តលោកជំទាវ ព្រមទាំងប្រធានមន្ទីរមួយចំនួនជុំវិញខេត្ត ធ្លាប់បានអញ្ជើញចុះពិនិត្យទីតាំងប្រវត្តិសាស្ត្រនេះ ដើម្បីរៀបចំអោយក្លាយទៅជាតំបន់ទេសចរណ៍ប្រវត្តិសាស្ត្រសម្រាប់បងប្អូនប្រជាពលរដ្ឋមកទស្សនាកំសាន្ត និងសិក្សាពីប្រវត្តិសាស្ត្រ។ ដោយជំហានដំបូងត្រូវសិក្សាធ្វើរបងព័ទ្ធជុំវិញ និងដាំកូនឈើបន្ថែមលើបរិវេណដើមពោធិ៍ ចាក់ដីទីទួលឱ្យស្មើ ។
ប្រធានមន្ទីរវប្បធម៌ខេត្តត្បូងឃ្មុំប្រាប់បន្តឲ្យដឹងទៀតថា ក្រោយពីរៀបចំបរិវេណដើមពោធិ៍ឱ្យមានភាពស្រស់ស្អាតជាមួយនោះនឹងធ្វើអាស្រមសម្រាប់ដាក់អ្នកតាក្រហមកដោយសាងសង់អំពីបេតុងធំល្មម ។ ចំណែកផ្លូវចូលមកត្រូវរៀបចំចាក់បេតុងក្នុងពេលខាងមុខដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋរស់នៅតំបន់ទាំងទីជិតទីឆ្ងាយ ដែលត្រូវមកកម្សាន្តលេងងាយស្រួលក្នុងការធ្វើដំណើរ។
នៅមិនឆ្ងាយប៉ុន្មានពីដើមពោធិ៍អ្នកតាក្រហម.ក គឺមានដើមពោធិ៍មួយដើមទៀតដែលជាទឹកតាងបញ្ជាក់ពីទុំទាវ ដែលបានស្លាប់ហើយត្រូវគេរៀបចំបញ្ចុះសពនៅក្រោមដើមពោធិនោះ។ សូមបញ្ជាក់ថា ទាក់ទងទៅនិងរឿងទុំទាវនេះគឺជាប្រភេទអក្សរសីល៍ប្រជាប្រិយ ដែលត្រូវអ្នកនិពន្ធបានតាក់តែងឡើងនៅក្នុងអំឡុងឆ្នាំ១៦០០ជាង ដោយបានសរសេរពីភូមិសាស្រ្តច្បាស់លាស់នៅក្នុងឃុំមង់រៀវ ស្រុកត្បូងឃ្មុំ ក្រោយមករឿងនេះបានប្រែក្លាយទៅជារឿងប្រវត្តិសាស្ត្រ។
ប្រធានមន្ទីរវប្បធម៌ និងវិចិត្រសិល្បៈខេត្តត្បូងឃ្មុំបញ្ជាក់ថា ទីតាំងដើមពោធិ៍ទាក់ទងប្រវត្តិទុំទាវនេះត្រូវបាន គេធ្លាប់មកថតខ្សែភាពយន្តដល់ទីកន្លែងនេះផងដែរ ។នៅចម្ងាយប្រហែល៣០០ ម៉ែត្រ ដោយឆ្លងផ្លូវជាតិទៅម្ខាងទៀតទីនោះនិងមានទួលយាយផាន់ ដែលសុទ្ធសឹងទាក់ទងទៅនឹងរឿងប្រវត្តិទុំទាវ ។ ត្រូវបានអាជ្ញាធរខេត្តចាត់ឱ្យមន្ទីរវប្បធម៌រៀបចំអភិរក្សចាក់ដីនិងធ្វើរបងរក្សានូវកេរដំណែលពីបុរាណកាលនេះទុកដល់ក្មេងជំនាន់ក្រោយបានឃើញជាទឹកតាងនិងងាយស្រួលស្រាវជ្រាវក្នុងការសិក្សាទៀតផង។
តាមគំនិតរបស់លោកមិនយូរប៉ុន្មាន នឹងរៀបចំសាងសង់ចេតិយតូចល្មមដែលធ្វើពីរថ្មត្បូងក្បាច់បុរាណដើម្បីជាទឹកតាងបញ្ជាក់ពីទីកន្លែងមរណៈភាពរបស់ទុំទាវនៅក្រោមដើមពោធិ៍ក្នុងស្រុកត្បូងឃ្មុំ ។ រឿងទុំទាវតាមការស្រាវជ្រាវ គឺទាក់ទងពីប្រពៃណីរបស់ខ្មែរដោយកូនស្រីសម័យនោះអាយុ១៨ឆ្នាំត្រូវចូលម្លប់ ចំណែកកូនប្រុសអាយុ៥ឆ្នាំ ត្រូវបួសជាសង្ឃ ដើម្បីសងគុណឪពុក
ម្ដាយ៕
ចែករំលែកព័តមាននេះ